އީރާނުގެ ދެކުނުގައިވާ މީނާބް ސިޓީގެ އަންހެން ކުދިންގެ ސްކޫލަކަށް އެމެރިކާއިން ދިން ވައިގެ ހަމަލާއެއްގައި 160 އަށްވުރެ ގިނަ ދަރިވަރުން މަރުވި ހާދިސާއާ ގުޅިގެން ޗައިނާއިން ފުން ހިތާމަފާޅުކޮށް، އެ ހަމަލާގައި މަރުވި ކުދިންގެ އާއިލާތަކަށް އެހީވެދޭން ނިންމައިފިއެވެ. އިސްރާއީލާއި އެމެރިކާއިން އީރާނަށް ހަމަލާދޭން ފެށި ދުވަސް ކަމަށްވާ، ފެބްރުއަރީ 28ގައި "ޝަޖަރަތުއްތައްޔިބާ" ސްކޫލަށް އަމާޒުވި މި ހަމަލާއަކީ އާންމުންނާއި އަސްކަރީ ނޫން ތަންތަނަށް އަމާޒުކޮށް ދެމުންދާ ހަމަލާތަކުގެ ތެރެއިން ހިނގި ވަރަށް ހިތާމަވެރި ހާދިސާއެއް ކަމަށް ޗައިނާއިން ވަނީ ސިފަކޮށްފައެވެ. ޗައިނާ ސަރުކާރުން ނެރުނު ބަޔާނެއްގައި ބުނެފައިވަނީ، އެއްވެސް ކުށެއް ނެތް މަޢުޞޫމު ކުޑަކުދިންތަކެއްގެ ފުރާނަ ގެއްލިގެން ދިއުމަކީ މުޅި އިންސާނިއްޔަތަށް ލިބުނު ވަރަށް ބޮޑު ގެއްލުމެއް ކަމަށެވެ. އަދި މި ހާދިސާގައި މަރުވި ކުދިންގެ އާއިލާތަކަށް ޗައިނާގެ ރައްޔިތުންގެ ނަމުގައި ތައުޒިޔާ ފޮނުވާ ކަމަށްވެސް އެ ބަޔާނުގައި ވެއެވެ. ސްކޫލްތަކާއި ކުޑަކުދިންނަށް އަމާޒުކޮށް ދޭ މިފަދަ ހަމަލާތަކަކީ އެއްވެސް ގޮތަކަށް ބަލައިގަނެވޭނެ ކަމެއް ނޫންކަމަށް ޗައިނާއިން ވަނީ ބުނެފައެވެ. ޗައިނާގެ ކަމާބެހޭ ފަރާތްތަކުން ފާހަގަކުރި ގޮތުގައި، މިއީ ބައިނަލްއަޤްވާމީ އިންސާނީ ހައްގުތަކުގެ ގާނޫނުތަކާއި އިންސާނިއްޔަތުކަމާ ކަނޑައެޅިގެން ޚިލާފު އަމަލެކެވެ. ހަނގުރާމައިގެ ހާލަތްތަކުގައި ވެސް އާންމު ރައްޔިތުންނާއި، ޚާއްސަކޮށް ކުޑަކުދިންނާއި ސްކޫލްތައް ފަދަ މަދަނީ ތަންތަނަށް ހަމަލާދިނުމަކީ ބައިނަލްއަޤްވާމީ މުޖުތަމައުން ހަރުކަށި އިބާރާތުން ކުށްވެރިކުރަންޖެހޭނެ ކަމެއްކަމަށް އެ ގައުމުން ވަނީ ގޮވާލާފައެވެ. މީގެ އިތުރުން، ހަނގުރާމައިގެ މައިދާނުގައި ހަރަކާތްތެރިވާ ހުރިހާ ފަރާތްތަކުންވެސް އާންމުންގެ ރައްކާތެރިކަމަށް އިސްކަންދިނުމަށް ޗައިނާއިން ވަނީ ގޮވާލާފައެވެ. އާންމުންނަށް އަމާޒުކޮށް ދޭ ހަމަލާތައް ވަގުތުން ހުއްޓާލުމަށް އިލްތިމާސްކުރަމުން، ޗައިނާއިން ބުނީ ބައިނަލްއަޤްވާމީ ގާނޫނުތަކަށް ހުރުމަތްތެރިކޮށް ހިތުމަކީ ކޮންމެ ގައުމެއްގެ މައްޗަށްވެސް ލާޒިމުކުރާ ކަމެއް ކަމަށެވެ. މިފަދަ އަމަލުތަކުގެ ސަބަބުން ސަރަހައްދުގެ ސުލްހަ މަސަލަސްކަން އިތުރަށް ގޯސްވެ، އާންމު ރައްޔިތުންގެ ދިރިއުޅުމަށް އިއާދަނުކުރެވޭވަރުގެ ގެއްލުންތަކެއް ލިބެމުންދާކަންވެސް ޗައިނާއިން ވަނީ ފާހަގަކޮށްފައެވެ. މި ހިތާމަވެރި ހާދިސާގައި މަރުވި ދަރިވަރުންގެ އާއިލާތަކަށް އެހީތެރިވުމުގެ ގޮތުން، ޗައިނާގެ ރެޑް ކްރޮސް ސޮސައިޓީން ވަނީ އީރާން ރެޑް ކްރެސެންޓް ސޮސައިޓީ (އީރާން އާރްސީއެސް) އަށް 200،000 އެމެރިކާ ޑޮލަރުގެ އިމަޖެންސީ އިންސާނީ އެހީތެރިކަން ފޯރުކޮށްދިނުމަށް ނިންމާފައެވެ. މި ފައިސާގެ އެހީ މައިގަނޑު ގޮތެއްގައި ޚަރަދުކުރުމަށް ހަމަޖެހިފައިވަނީ ހަމަލާގައި ދަރިން ގެއްލުނު ހިތާމަވެރި އާއިލާތަކަށް ބޭނުންވާ ނަފްސާނީ އަދި މާލީ އެހީތެރިކަން ފޯރުކޮށްދިނުމަށެވެ. ޗައިނާ ރެޑް ކްރޮސްއިން ބުނީ، މިއީ މި ދަތި ދަނޑިވަޅުގައި އީރާނުގެ ރައްޔިތުންނާއެކު ޗައިނާ އޮތްކަން ހާމަކޮށްދޭ ރަމްޒީ އެހީތެރިކަމެއް ކަމަށެވެ. އަދި ކުރިއަށް އޮތް ތަނުގައިވެސް އީރާނަށް ބޭނުންވާ އިންސާނީ އެހީތެރިކަން ފޯރުކޮށްދިނުމުގައި ދެމިއޮންނާނެ ކަމުގެ ޔަގީންކަން އެ ޖަމާއަތުން ވަނީ ދީފައެވެ. މީގެ އިތުރުން، ބައިނަލްއަޤްވާމީ އެހެނިހެން ޖަމާއަތްތަކުންވެސް މި ހާދިސާގައި ގެއްލުން ލިބުނު ފަރާތްތަކަށް އެހީތެރިކަން ފޯރުކޮށްދިނުމަށް ޗައިނާ ރެޑް ކްރޮސްއިން ވަނީ ގޮވާލާފައެވެ. ފެބްރުއަރީ 28 ވަނަ ދުވަހު އީރާނުގެ މީނާބްގައި ހުންނަ "ޝަޖަރަތުއްތައްޔިބާ" ސްކޫލަށް ދިން މި ހަމަލާއަކީ އެމެރިކާގެ އަސްކަރިއްޔާއިން ދިން ހަމަލާއެއްކަމަށް ރިޕޯޓުތައް ބުނެއެވެ. އެމެރިކާގެ އަސްކަރިއްޔާގެ ތަހުގީގުތަކާ ހަވާލާދީ ނޫސްތަކުން ރިޕޯޓުކޮށްފައިވާ ގޮތުގައި، މި ހަމަލާއަކީ އީރާނުގެ އަސްކަރީ މަރުކަޒަކަށް ހަމަލާދޭން އުޅުމުގެ ތެރޭގައި، މައުލޫމާތުގެ ކުށަކުން ސްކޫލަށް އެރި ހަމަލާއެކެވެ. އެމެރިކާގެ ސެންޓްރަލް ކޮމާންޑުން މި ހަމަލާ ދީފައިވަނީ ޑިފެންސް އިންޓެލިޖެންސް އޭޖެންސީން ފޯރުކޮށްދިން ބާވެފައިވާ މައުލޫމާތެއްގެ މައްޗަށް ބިނާކޮށް ކަމަށް ރިޕޯޓުތައް ބުނެއެވެ. މި ހާދިސާގައި 160 އަށްވުރެ ގިނަ ކުދިން މަރުވެފައިވާއިރު، މިއީ ފަހުގެ ތާރީޚެއްގައި ހިނގި އެންމެ ހިތާމަވެރި އެއް އަސްކަރީ ކުށް ކަމަށް މާހިރުން ސިފަކުރެއެވެ. ޓޮމަހޯކް މިސައިލެއް ބޭނުންކޮށްގެން ދިން މި ހަމަލާގެ ސަބަބުން މުޅި ސްކޫލް އިމާރާތް ވަނީ ބިމާ ހަމަވެފައެވެ. މި ހާދިސާއާ ގުޅިގެން މެދުއިރުމަތީގެ މަސްރަހު އިތުރަށް ގޯސްވެފައިވާއިރު، ބައިނަލްއަޤްވާމީ މުޖުތަމައުން ދަނީ ސުލްހައަށް ގޮވާލައި، މިފަދަ ހާދިސާތައް ތަކުރާރު ނުވުމަށް ބާރުއަޅަމުންނެވެ.