ވައިގެ މަގުން ރާއްޖެއަށް ދެ މިލިއަން ރުފިޔާގެ ހެރޮއިން އެތެރެކުރަން އުޅުނުކަމަށް ތުހުމަތުކޮށް މައްސަލައިގައި ބިދޭސީ އަންހެނެއްގެ އިތުރުން ދިވެހި ދެ ފިރިހެނަކު ހައްޔަރުކޮށްފިއެވެ. ފުލުހުން މިއަދު ބުނީ މި މައްސަލައާއި ގުޅިގެން ޖުމްލަ ތިން މީހަކު ހައްޔަރުކޮށްފައިވާ ކަމަށެވެ. އަދި އެ ތިން މީހުން ހައްޔަރުކޮށްފައި ވަނީ މިދިޔަ ހޮނިހިރު ދުވަހު ކަމަށް ފުލުހުން ވަނީ މައުލޫމާތު ދީފައެވެ. ފުލުހުން ބުނީ މި މައްސަލައާ ގުޅިގެން ހައްޔަރުކޮށްފައިވަނީ ރަންޖިނި ޖީވަނަންތަން ނަމަކަށް ކިޔާ އުމުރުން 38 އަހަރުގެ މެލޭޝިއާ އަންހެނަކާއި ގދ. ވާދޫ، ފުރުސަތު، އުމުރުން 29 އަހަރުގެ ލޫޠު އިބްރާހީމްގެ އިތުރުން ގއ. ދާންދޫ، ސަންލައިޓްވިލާ، އުމުރުން 21 އަހަރުގެ އަޙްމަދު ރިޝްމާހް ކަމަށެވެ. އަދި މި ތިން މީހުންގެ ތެރެއިން ރަންޖިނި ޖީވަނަންތަން ހައްޔަރުކޮށްފައިވަނީ ވެލާނާ އިންޓަނޭޝަނަލް އެއާޕޯޓުން ކަމަށާއި ލޫޠު އިބްރާހީމްއާއި އަޙްމަދު ރިޝްމާހް ހައްޔަރުކޮށްފައިވަނީ މާލެއިން ކަމަށް ފުލުހުން މައުލޫމާތު ދެއެވެ. މި މައްސަލައާ ގުޅިގެން މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ރަންޖިނި ޖީވަނަންތަންއާއި ލޫޠު އިބްރާހީމް 15 ދުވަަހަށް އަދި އަޙްމަދު ރިޝްމާހް ފަސްދުވަހަށް ބަންދުކުރުމަށް އަމުރުކޮށްފައިވާކަމަށް ފުލުހުން ވަނީ ބުނެފައެވެ. ފުލުހުން ބުނީ މި މައްސަލަ ފުލުހުން ތަހުގީގުކުރަމުން ގެންދާކަމަށެވެ. ރާއްޖެއަށް ވައިގެ މަގުން އެތެރެކޮށްފައިވާ ދެ މިލިއަން ރުފިޔާގެ ހެރޮއިން އަތުލައިގަނެފައި ވާކަމަށް ކަސްޓަމުން މައުލޫމާތު ދިނީ އިއްޔެގައެވެ. އެ ތަކެތި އަތުލައިގަނެފައި މިދިޔަ ހުކުރު ދުވަހު ރާއްޖެ އައި މީހެއްގެ އަތުން ކަމަށާއި އެ މަސްތުވާތަކެތީގެ ބަރުދަން 2.2 ކިލޯއަށް އަރާއިރު، އޭގެ މަގުމަތީ އަގަކީ ގާތްގަނޑަކަށް 2.2 މިލިއަން ރުފިޔާ ކަމަށް ކަސްޓަމުން ވަނީ ބުނެފައެވެ. https://www.sun.mv/218563 ރާއްޖޭގައި މަސްތުވާތަކެތީގެ މައްސަލަ ވަރަށް ބޮޑުވެފައިވާއިރު، މަސްތުވާތަކެތި އެތެރެކުރާ މީހުންނަށް ސުޕްރީމް ކޯޓުގެ އިއްތިފާގާ އެކު މަރުގެ އަދަބުދޭން ފާސްކޮށް، ގާނޫނަކަށް ހަދަން މަޖިލީހުން ވަނީ މިދިޔަ ޑިސެންބަރު މަހު ފާސްކޮށްފައެވެ. އޭގެ ތިން ދުވަސް ފަހުން ރައީސް ޑރ. މުޙައްމަދު މުޢިއްޒު ވަނީ އެ ބަދަލު ތަސްދީގުކުރައްވައިފައެވެ.