ދެމީހަކު ހަމަޖެހިލައިގެން ތިބެ ވާހަކަ ދައްކާނަމަ އެންމެ ގިނައިން ދެކެވޭ ވާހަކައަކަށްވެފައި އޮންނަނީ ތިމާ އެބައެއްގެ ކިބައިން ނުވަތަ އެމީހެއްގެ ކިބައިން ލޯބި ހޯދަން މަސައްކަތްކުރިޔަސް އެލޯބި ނުލިބޭ ކަމުގެ ޝަކުވާއެވެ. ބައިވެރިޔާގެ ލޯބި ނުލިބޭ ކަމުގެ ޝަކުވާއެވެ. ދަރިންގެ ލޯބި ނުލިބޭ ކަމުގެ ޝަކުވާއެވެ. ޢާއިލާގެ މީހުންގެ ލޯބި ނުލިބޭ ކަމުގެ ޝަކުވާއެވެ. އެކުވެރިންގެ ލޯބި ނުލިބޭ ކަމުގެ ޝަކުވާއެވެ. މިއީ ހުސްވާ ޝަކުވާއެއް ނޫނެވެ. 
އެހެންވެ އަހުރެން ކިޔައިދޭން މިއުޅެނީ އެބައެއްގެ ފަރާތުން ލޯބި ބޭނުންވެގެން ތިއައުޅޭ އެންމެ ލޯތްބާއި އަދި ދުނިޔޭގެ އެންމެންނާއި އަދި އުޑުތަކުގައިވާ މަލާއިކަތުންގެ ލޯބިވެސް ލިބެން އޮތް ގޮތެވެ. 
އަޑުއަހާށެވެ! މީސްތަކުންގެ ރުހުމާއި ތާއީދު ހޯދަން މަސައްކަތްކުރަން ފަށާ ހިސާބުން ﷲ ތަޢާލާގެ ޙަޟްރަތުގައި އެމީހާގެ ޤަދަރުކުޑަވާން ފަށާނެއެވެ. އަދި ކީއްހެއްޔެވެ؟ އެއްވެސް މީހަކަށް ދުނިޔޭގައި އުޅޭ އެންމެންގެ ރުހުމާއި ތާއީދެއް ނުހޯދޭނެއެވެ. 
ކޮންމެ މީހަކު ދެކެވެސް ރުޅި އައިސް ނަފްރަތުކުރާ ބައަކާއި ރުހި ތާއީދުކުރާ ބައަކު ތިބޭނެއެވެ. ނަފްރަތުކުރާ މީހުން ރުއްސަން ކިތަންމެ ގިނަ މަސައްކަތެއް ކުރި ނަމަވެސް އެކަމެއް ނުވާނެއެވެ. އެމީހުންގެ ރުހުން ނުވަތަ ލޯބި ނުލިބިގެން ކަންބޮޑުވުމެއްވެސް ނެތެވެ. 
އަހަރެމެން ދުނިޔެއަށް ފޮނުއްވަވާފައި މިވަނީ ދުނިޔޭގައި ދިރިއުޅޭ އެންމެންގެ ރުހުން ހޯދާކަށް ނޫނެވެ. ﷲ ތަޢާލާގެ ރުހިވޮޑިގަތުން ހޯދުމަށެވެ. ވީމާ ﷲ ތަޢާލާގެ ރުހިވޮޑިގަތުން ހޯދަން ގަދައަޅައި މަސައްކަތްކުރާށެވެ. ﷲ ތަޢާލާގެ ރުހުވޮޑިގަތުން ލިބިއްޖެނަމަ ދުނިޔޭގައި އުޅޭ އެންމެންގެ ރުހުމާއި ތާއީދުވެސް ލިބިގެންދާނެއެވެ. އިން ޝާ ﷲ 
އެކަމަކު ރަނގަޅަށް ހަނދާންކުރާށެވެ! އަހަރެމެން ކޮންމެ މީހަކުވެސް ދުނިޔެއަށް ފޮނުއްވަވާފައި މިވަނީ ﷲ ތަޢާލާ ދުނިޔޭގައި ލެއްވެވި އެންމެހައި މަޚްލޫޤުންނަށް ހެޔޮކޮށް ހިތާށެވެ. އިންސާނުންނާއި ޖަނަވާރާއި ދޫނި ސޫފާސޫފިވެސް ހިމެނޭގޮތުންނެވެ. 
އެހެންކަމަށްވާއިރު ކޮންމެ މީހަކުވެސް އަނބިދަރިންނަށް، ފިރިންނަށް، މައިންބަފައިންނަށް، ޢާއިލާގެ މީހުންނަށް، ޚާއްޞަކޮށް ރަޙިމުގެ ގުޅުން ބަހައްޓަންޖެހޭ އެންމެންނަށް ހެޔޮކޮށްހިތަންޖެހޭނެ މިންވަރު ހިތްމައްޗަށް ގެންނާށެވެ. މިބަޔާންކުރި މީހުންނަށް ހެޔޮކޮށް ހިތައި ލޯބިހޯދަން މަސައްކަތްކުރުމަކީ ﷲ ތަޢާލާގެ ރުހިވޮޑިގަތުން އެންމެ ފަސޭހައިން ހޯދެން އޮތް އެއްމަގެވެ! ގަދައަޅައި މަސައްކަތްކުރަންވީ އެކަމަށެވެ! 
އެއިރުން އެމީހަކަށް ﷲ ތަޢާލާގެ ލޯބިވެވޮޑިގަތުން ލިބޭނެއެވެ. އެހިސާބުން ކުރިން ބަޔާންކުރި ހުރިހާ ލޯތްބެއް އެމީހަކަށް ލިބުނީއެވެ. އިތުރަކަށް ބޭނުމެއް ނުވާނެއެވެ. އިން ޝާ ﷲ
 
- އިސްލާމީ ތިލަފަތުގެ ދަރުސަކުން