ހަވީރު ނޫހުގެ އިދާރާގައި އަލިފާން ރޯކޮށްލި މައްސަލައާ ގުޅިގެން އެއްވެސް މީހަކު އަދި ހައްޔަރުކޮށްފައި ނުވާ ކަމަށް ފުލުހުން ބުނެފި އެވެ. ފުލުހުންގެ މީޑިއާ އޮފިޝަލް "ސަން"އަށް ވިދާޅުވީ އެ މައްސަލަ އަންނަނީ ތަހުގީގު ކުރަމުން ކަމަށާއި މިހާތަނަށް އެ މައްސަލާގައި މީހަކު ހައްޔަރުކޮށްފައިނުވާ ކަމަށެވެ. ހަވީރު ނޫހުގެ އިދާރާގެ ރިސެޕްޝަންގައި ރޯކޮށްލާފައި ވަނީ މިދިޔަ ބުރާސްފަތި ދުވަހުގެ ރޭ މެންދަމުގެ ވަގުތެއްގައެވެ. މަންޒަރު ދުށް މީހަކު ބުނީ އެތަނުގައި އަލިފާން ރޯކޮށްލި މީހާ އެ އިދާރާ ތެރެއަށް ވަނީ ފުރުގާން މިސްކިތުގެ ފާރުމަތިން ފުންމާލައިގެން ކަމަށާއި އަލިފާން ރޯކޮށްލުމަށްފަހު އޭނާ ވަނީ ފިލާފައި ކަމަށެވެ. ހަވީރު ނޫހުގެ އިދާރާގެ ރިސެޕްޝަންގައި ރޯކޮށްލި އަލިފާންގަނޑު އިމާރާތަށް ނުފެތުރެނީސް ގަލޮޅު ޕޮލިސް ސްޓޭޝަންގައި ޑިއުޓީގައި ތިބި ފުލުހުން ވަނީ އަލިފާން ނިއްވާލާފަ އެވެ. އަލިފާން ނިއްވާލަން ސިފައިން އެ ސަރަހައްދަށް ދިއުމުގެ ކުރިން، "ހަވީރު" އިދާރާ ހިންގާ ގޯތީގެ ފާރުމަތިން މީހަކު ފުންމާލައިގެން ފިލިތަން ފެނުނު ކަމަށް މަންޒަރު ދުއް މީހަކު ބުންޏެވެ. އޭނާ ފިލީ ދަބަހެއް އެއްލާލުމަށްފަހު ކަމަށް އެ މީހާ ބުންޏެވެ. އެ ސަރަހައްދަށް ނޫސްވެރިން ދިޔައިރު، އެތަނުގެ ބޭރުގައި ދަބަހެއް އޮތެވެ. އަދި ތޮތްޕެއް ވެސް އޮތެވެ. ޒިބު ހުޅުވާފައިވާ އެ ދަބަހުގެ ތެރޭގައި ފަސްލީޓަރު ބޮޑު ފުޅިއެއް އޮތްތަން ވެސް ނޫސްވެރިންނަށް ވަނީ ފެނުނެވެ.