ސެޕްޓެމްބަރު މަހުގެ ތެރޭގައި ބާއްވާ ރިޔާސީ އިންތިހާބުގެ ވޯޓު ކަރުދާސްކޮޅުގައި އެމްޑީޕީގެ ރިޔާސީ ކެންޑިޑޭޓު ރައީސް މުހައްމަދު ނަޝީދުގެ ނަންފުޅު ގެނައުމަކީ ކުރެވޭނެ ކަމެއް ނޫން ކަމަށް އުމަރުގެ ޓީމުން ބުނެފިއެވެ.
އާޓިފިޝަލް ބީޗުގައި ރޭބޭއްވި ޖަލްސާގައި ވާހަކަ ދައްކަވަމުން އުމަރުގެ ކެމްޕޭން މެނޭޖަރު މާޒް އަހުމަދު ސަލީމު ވިދާޅުވީ 2013 ގެ އިންތިހާބަށް އުމަރު ނަސީރު ރައްޔިތުންނަށް ވެވަޑައިގަންނަވާ ވައުދަކީ ރައީސް ނަޝީދު ޖަލަށް ލާނެ ކަމުގެ ވައުދު ކަމަށެވެ. އަދި އުމަރުގެ ޓީމު އޮއްވާ ރައީސް ނަޝީދުގެ ނަންފުޅު މިފަހަރުގެ އިންތިހާބުގެ ވޯޓު ކަރުދާސްކޮޅުގައި ގެނައުމަކީ ކުޅަދާނަ ކަމެއް ނޫން ކަމަށެވެ.
ޕީޕިއެމްގެ ރިޔާސީ ޕްރައިމަރީގައި ވާދަ ކުރައްވާ އަބުދުﷲ ޔާމީނަށް ރޭގެ ޖަލްސާގައި ވަރަށް ބޮޑަށް ފާޑު ވިދާޅުވި ސަލީމު ވިދާޅުވީ ރިޔާސީ އިންތިހާބުގައި ނުބައި މީހެއްގެ އަތަށް ވެރިކަން ދެވިއްޖެ ނަމަ ރައީސް ނަޝީދުގެ ތިން އަހަރަށް ވުރެ ދިވެހިންނަށް ހިތިވާނެ ކަމަށެވެ. އެހެން ކަމުން ޕީޕީއެމްގެ ރިޔާސީ ޓިކެޓު އުމަރަށް ދިނުމަސް ސަލީމު ގޮވާލެއްވިއެވެ. އިތުރަށް ވާހަކަ ދައްކަވަމުން ސަލީމު ވިދާޅުވީ ރައީސް ނަޝީދު އަލުން ވެރިކަމަށް އަޔަ ނުދީ ހިފަހައްޓަން ޖެހޭ ކަމަށާއި އެކަން ދެން ވެސް ކުރެވޭނީ އުމަރަށް ކަމަށެވެ.
މިފަހަރުގެ ވޯޓު ކަރުދާސްކޮޅުގައި ރައީސް ނަޝީދުގެ ނަންފުޅު ހިމެނުނަ ނުދޭނެ ކަމަށް އުމަރުގެ ޓީމުން ބުނެފައިވާ އިރު ރައީސް ނަޝީދުގެ ނަންފުޅު ވޯޓު ކަރުދާސްކޮޅުގައި ގެނެސްދޭނެ ކަމަށް އެމްޑީޕީއާއި ރައީސް ނަޝިދުވަނީ ވައުދުވެވަޑައިގެންފައެވެ. އަދި ބައިނަލް އަގުވާމީ ބައެއް ފަރާތްތަކުން ވެސްވަނީ ރައީސް ނަޝީދަށް ވާދަ ނުކުރެވޭ ނަމަ އިންތިހާބު ބަލައި ނުގަންނާނެ ކަމުގެ އިޝާރާތްތަކެއް ވެސް ކޮށްފައެވެ.