މިދިޔަ މަހު މާފުށީ ޖަލުގައި ހިންގި މާރާމާރީގައި ގައިދީއަކު ޒަހަމްކޮށްލި މައްސަލާގައި ޖަވާބުދާރީވެވަޑައިގަތުމަށް ހޯމް މިނިސްޓަރު އުމަރު ނަސީރު މަޖިލީހުގެ ކޮމިޓީއަށް މިއަދު ހާޒިރުވެވަޑައެއް ނުގެންނެވި އެވެ. ސަރުކާރުން މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ހާޒިރުވެވަޑައިގަތުމަށް އުޒުރުވެރިވެވަޑައިގަތީ، މިނިސްޓަރުންނާ ސުވާލުކުރުމަށް މަޖިލީހުގެ ގަވާއިދުގައި ބުނެފައިވާ 14 ދުވަހުގެ މުއްދަތު ލިބިވަޑައިނުގަތުމުން ކަމަށް އުމަރު ވިދާޅުވި ކަމަށް ކޮމިޓީގެ މުގައްރިރު، ތޮއްޑޫ ދާއިރާގެ މެމްބަރު އަލީ ވަހީދު ވިދާޅުވި އެވެ. ކޮމިޓީގެ މިއަދުގެ ބައްދަލުވުމުގައި އަލީ ވަހީދު ސުވާލުކުރައްވަނީ: ޖަލުގައި ހިންގި މާރާމާރީއާ ގުޅިގެން ކަރެކްޝަނަލް ސާވިސް އިން ޖަވާބުދާރީއެއް ނުވި. -- ހަވީރު ފޮޓޯ: ނަސްރުﷲ ސޯލިހް މަޖިލީހުގެ ގަވާއިދުގައި، މިނިސްޓަރުންނާ ސުވާލުކުރުމަށް 14 ދުވަހުގެ މުއްދަތެއް ދޭން ޖެހޭނެ ކަމަށް ބުނެފައިވަނީ މަޖިލީހުގެ ތަޅުމުގައި ސުވާލުކުރުމަށް ކަމަށް އަލީ ވަހީދު ވިދާޅުވި އެވެ. ކޮމިޓީއަށް ހާޒިރުކުރުމަށް އެ މުއްދަތު ދޭން ނުޖެހޭނެ ކަމަށް އޭނާ ވިދާޅުވި އެވެ. ފެބްރުއަރީ 24 ވަނަ ދުވަހުގެ ރޭ ޖަލުގައި ހިންގި މާރާމާރީގައި ޒަހަމްވި ގައިދީއަށް އައިޖީއެމްއެޗްގެ އައިސީޔޫގައި ފަރުވާ ދެމުންދާއިރު، އެކަމާ ގުޅޭ ގޮތުން މައުލޫމާތު ދެއްވުމަށް ކަރެކްޝަނަލް ސާވިސްގެ ކޮމިޝަނާ އޮފް ޕްރިޒަންސް މޫސާ އާޒިމް ވެސް މިއަދު ކޮމިޓީއަށް ވަޑައެއްނުގަންނަވަ އެވެ. ކޮމިޓީއަށް ވަޑައިގަތީ ޑެޕިއުޓީ ޕްރިޒަންސް ކޮމިޝަނަރު ހަސަން ޒިލާލާއި ސުޕްރިންޓެންޑެންޓް މުހައްމަދު އިބްރާހިމް އަދި ކަރެކްޝަނަލް ސާވިސްގެ ގާނޫނީ ވަކީލް މުހައްމަދު ޒާހިރެވެ. ޖަލުގައި ހިންގި މާރާމާރީއާ ބެހޭ ގޮތުން އެ ބޭފުޅުން ހުށަހެޅުއްވި ރިޕޯޓަށް ފަހު ކޮމިޓީގެ މެމްބަރުން ކުރެއްވި ސުވާލުތަކަށް އެ ތިން ބޭފުޅުން ވެސް ޖަވާބެއް ނުދެއްވަ އެވެ. ކޮމިޓީގެ މިއަދުގެ ބައްދަލުވުމުގައި ކަރެކްޝަނަލް ސާވިސްގެ ބައެއް އޮފިޝަލުން: ޖަލުގައި ހިންގި މާރާމާރީއާ ގުޅިގެން އެ ތަނުން ޖަވާބުދާރީއެއް ނުވި. -- ހަވީރު ފޮޓޯ: ނަސްރުﷲ ސޯލިހް "ރަނގަޅު ބަޔަކާ ނޫން ކަންނޭނގެ ތިސުވާލު ކުރެއްވެނީ،" ކޮމިޓީއަށް ހާޒިރުވި ތިން ބޭފުޅުންނަކީ މާރާމާރީއާ މެދު ޖަވާބުދާރީވުމަށް އެންމެ އެކަށީގެންވާ ތިން ބޭފުޅުން ނޫން ކަމަށް ފާހަގަކުރެއްވުމުގެ ގޮތުން ޒިލާލު ވިދާޅުވި އެވެ. އެ ބޭފުޅުން ކޮމިޓީއަށް ވަޑައިގެންނެވީ އާޒިމް ވިދާޅުވުމުން ކަމަށާއި މައްސަލަތަކާ ބެހޭ ގޮތުން ފުރިހަމަ މައުލޫމާތު ލިބިވަޑައިނުގަންނަވާ ކަމަށް ވެސް ޒިލާލު ވިދާޅުވި އެވެ.