ޑީއާރުޕީގެ ލޯކަލް ކައުންސިލް އިންތިހާބުގެ ކެމްޕޭނުގައި ޒައީމް އަލްއުސްތާޒު މައުމޫން އަބްދުލްގައްޔޫމް ރަސްމީކޮށް ބައިވެރިވެވަޑައިގަތުމަށް ބާއްވާ ހާއްސަ ހަފުލާއެއް އަންނަ ބުރާސްފަތި ދުވަހުގެ ރޭ ބާއްވާ ގޮތަށް ހަމަޖައްސާފައިވާ ކަމަށް މައުމޫންގެ ތަރުޖަމާން ވިދާޅުވެއްޖެ އެވެ.ސަން އޮންލައިން އާ ވާހަކަ ދައްކަވަމުން މައުމޫނުގެ ތަރުޖަމާން މުހަންމަދު ހުސެން ޝަރީފް (މުންދު) މިއަދު ވިދާޅުވީ ލޯކަލް ކައުންސިލް އިންތިހާބުގައި ޑީއާރުޕީގެ ޓިކެޓުގައި ވާދަކުރައްވާ ގިނަ ކެންޑިޑޭޓުންތަކެއް މާލޭގައި ތިއްބެވުމާ އެކު އެ ފަރާތްތަކާ ބައްދަލުކޮށްލައްވައި ހިޔާލު ބަދަލުކޮށްލެއްވުމަށް ޒައީމް މައުމޫން ބޭނުންފުޅުވާތީ އެކަމަށް ޓަކައި ހާއްސަ ހަފުލާއެއް އަންނަ ބުރާސްފަތި ދުވަހުގެ ރޭ ބާއްވާނެ ކަމަށާއި އެ ހަފުލާގައި މައުމޫން ވާހަކަފުޅު ދައްކަވާނެ ކަމަށެވެ."ރައީސްގެ ނިޔަތަކީ އެއް ފުރާޅެއްގެ ދަށުން ނުވަތަ އެއްތަނަކުން ބައްދަލުކޮށްލެއްވުމުގެ ފުރުސަތެއް ހޯއްދެވުން. އެބޭފުޅުންނާ ބައްދަލުކޮށްލައްވައި ތައާރަފްވެ ވަޑައިގަތުން. ޕާޓީގެ ލީޑަޝިޕްގެ ބޭފުޅުންނެއް ނޫން ގިނަ ދާއިރާތަކުން މި ކުރިމަތިލައްވަނީ. އެހެންވީމާ އެއީ ރަށު ފެންވަރުގައި ވަރަށް ހަރަކާތްތެރި ޕާޓީގެ މެންބަރުން. ރައީސް ބޭނުންވޭ އެބޭފުޅުންނާ ބައްދަލުކުރައްވަން،" މުންދު ވިދާޅުވި އެވެ.ނަމަވެސް އެ ހަފުލާ ބާއްވާނެ ވަކި ތަނެއް އަދި ހަމަޖެހިފައި ނުވާ ކަމަށާއި ނަމަވެސް މާދަމާ އެ ތަނެއް އިއުލާން ކުރައްވާނެ ކަމަށް މުންދު ވިދާޅުވި އެވެ.މިދިޔަ ހުކުރު ދުވަހުގެ ރޭ ވަނީ ޑީއާރުޕީގެ ލޯކަލް ކައުންސިލް އިންތިހާބު ހދ. ހަނިމާދޫގައި ރަސްމީކޮށް އިފުތިތާހުކޮށްފަ އެވެ. އެ ރަސްމިއްޔާތު ހަނިމާދޫގައި ބޭއްވީ އެ ޕާޓީގެ އެއް ނާއިބު ލީޑަރު އިލްހާމް އަހުމަދު، އެ ޖަލްސާ މައުމޫން ވަޑައިގަންނަވަންދެން ފަސްކޮށް ދިނުމަށް އެދިވަޑައިގެންފައި ވަނިކޮށެވެ.  ރައީސް މައުމޫން މެލޭޝިޔާގައި ހުންނެވުމަށް ފަހު ރާއްޖެވަޑައިގަތީ ވެސް އެ ރެ އެވެ. އެރޭ މައުމޫން ވިދާޅުވީ ޑީއާރުޕީގެ ކެމްޕެއިން ރަސްމީކޮށް ލޯންޗުކުރުމުގެ ޖަލްސާ ބާއްވާކަން އެ މަނިކުފާނަށް އެނގިވަޑައިގެންފައިނުވާ ކަމަށެވެ.ރައީސް މައުމޫން ބައިވެރިވެވަޑައިގެން ބުރާސްފަތި ދުވަހުގެ ރޭ ބާއްވާ ހާއްސަ ހަފުލާ، ފުރަތަމަ ބޭއްވުމަށް ހަމަޖެއްސީ، މުންދު ވިދާޅުވި ގޮތުގައި ދަރުބާރުގޭގަ އެވެ. ނަމަވެސް އޭނާ ވިދާޅުވީ، ދަރުބާރުގެ އިން ފަހުން ވަނީ އެހަފުލާ ބޭއްވުމަށް އުޒުރުވެރިވާ ކަމަށް ވިދާޅުވެ އެޑްވާންސަށް ނެގި ފައިސާ ވެސް އަލުން އަނބުރާ ރައްދުކޮށްފައި ކަމަށް އޭނާ ވިދާޅުވި އެވެ.މުންދު ވިދާޅުވީ ވަކި ބޭފުޅެއް އިސްތިސްނާ ނުވާ ގޮތަށް ޑީއާރުޕީގެ ލީޑަޝިޕްގެ ހުރިހާ ބޭފުޅުންނަށް ވެސް މިއަދުގެ ވަގުތެއްގައި ދައުވަތު ކާޑުތައް ރައްދުކުރެވޭނެ ކަމަށާއި އެ ހަފުލާއަކީ ބޮޑު ހަފުލާއަކަށް ވެގެން ދާނެ ކަމަށެވެ."އެނގިވަޑައިގަންނަވާނެ ރައީސް ބައިވެރިވެ ވަޑައިގަންނަވާ ޖަލްސާތަކުގެ ސްޓްރެންތު ގަދަވާނެ،" މުންދު ވިދާޅުވި އެވެ.އޭނާ ވިދާޅުވީ ޒައީމް މައުމޫން މާލެ ވަޑައިގެންނެވި ފަހުން ޑީއާރުޕީގެ އިސް ބައެއް ބޭފުޅުން މައުމޫނާ ބައްދަލުކުރެއްވި ކަމަށާއި އެހެނަސް ޑީއާރުޕީގެ ލީޑަރު ތަސްމީން އަލީ އާއި އަދި މަޝްވަރާއެއް ރައީސް ކުރެއްވިކަމެއް އެނގިވަޑައިގެންފައި ނުވާ ކަމަށެވެ."ޒައީމް އެރޭވެސް ވިދާޅުވި ނޫންތޯ ޒައީމްގެ ގެކޮޅުގެ ދޮރު ހުންނާނީ އަބަދު ވެސް ޑީއާރުޕީގެ ކޮންމެ ބޭފުޅަކަށް ވެސް ހުޅުވިފައޭ. އެގޮތުން މިހާރު ވެސް ބައެއް ބޭފުޅުން ވަޑައިގެންފި މައުމޫންގެ ފައިންޕުޅުދެކެން. އެކަމަކު ތަސްމީނާ އެއްވެސް މަޝްވަރާއެއް ކުރެއްވިކަމެއް އަދި ނޭނގޭ،" މުންދު ވިދާޅުވި އެވެ.ޑީއާރުޕީގެ ކެމްޕެއިންގައި ބައިވެރިވެވަޑައިގަންނަވާނެ ކަން ޒައީމް އިއުލާނުން ކުރެއްވި ފަހުން ވަރަށް ގިނަ ފަރާތްތަކުން މައުމޫނަށް ދައުވަތުތައް ދެއްވާ ކަމަށާއި އެ ދައުވަތުތައް މިހާރު ލިސްޓުކުރުމުގެ މަސައްކަތް ކުރަމުން އަންނަ ކަމަށް މުންދު ވިދާޅުވި އެވެ. އަދި ވިދާޅުވީ ޑީއާރުޕީން ރައީސް މައުމޫނަށް އެއްވެސް ސިފައެއްގައި ޕާޓީގެ ލޯކަލް ކައުންސިލް އިންތިހާބުގެ އެއްވެސް ކަމެއްގައި ބައިވެރިވުމަށް ދައުވަތެއް ދީފައިނުވާ ކަމަށެވެ.ރައީސް މައުމޫން އެންމެ ފަހުން ނޫސްވެރިންނާ ބައްދަލުކުރައްވައި ވިދާޅުވެފައި ވަނީ އެމަނިކުފާނަށް ވަގުތު ވީވަރަކުން ޕާޓީގެ ލޯކަލް ކައުންސިލް ކެމްޕެއިންގެ ކަންކަމުގައި އަމަލީ ގޮތުން ބައިވެރިވެ ވަޑައިގަންނަވާނެ ކަމަށެވެ.