އުމަރު ނަސީރަކީ "މަގުމަތީ މީހާ" ކަމަށް ބުނިނަމަވެސް އެކަމާ ޖެލުންވެވަޑައި ނުގަންނަވާ ކަމަށާއި އޭގެ ބަދަލުގައި އެކަމާ ފަޚުރުވެރިވާކަމަށް އޭނާ ވިދާޅުވެއްޖެ އެވެ.
އާޓިފިޝަލް ބީޗްގައި މިރޭ ބޭއްވި ޕީޕީއެމް ޕްރައިމަރީ ކެންޕޭން ޖަލްސާގައި ވާހަކަދައްކަވަމުން އުމަރު ވިދާޅުވީ އޭނާ އަކީ "މަގުމަތީ މީހާއޭ" ބުނާއިރު އޭގެ ފަހަތުގައި އޮތީ ކެރުމާއި ހިތްވަރާ މުރާލިކަމާ ޖެހިލުން ކުޑަކަން ކަމަށެވެ. އަދި އެއާކޮންޑިޝަންގެ ތެރޭގައި އިނދެ ފޯނުކޮށްގެން ކަންކަން ކުރާ މީހެއް ޕީޕީއެމްގެ މެންބަރުން ބޭނުން ނުވާކަމަށް ވިދާޅުވެ އުމަރު ވަނީ އޭނާގެ އިނދިކޮޅު ކެނޑިޑޭޓް ޔާމީނަށް ފާޑުވިދާޅުވެ ވާހަކަ ދައްކަވާފަ އެވެ.
ޔާމީނަށް ވަރަށް ބޮޑަށް ފަޑުވިދާޅުވަމުން އުމަރު ވިދާޅުވީ ފާއިތުވި ދުވަސްތަކުގައި އަތޮޅުތަކުގެ ވަރަށް ގިނަ ރަށްރަށަށް އޭނާ ދަތުރު ކުރައްވާފައިވާ ކަމަށާއި އޭގެ ތެރޭގައި 13 އަހަރު ވަންދެން ޔާމީން ރައްޔިތުންގެ މަޖިލީހުގެ މެންބަރުކަން ކުރެއްވި ނ. އަތޮޅު ވެސް ހިމެނޭ ކަމަށެވެ. އަދި މިހާރު ޔާމީން މެންބަރުކަން ކުރައްވަމުން ގެންދަވާ މ. އަތޮޅުގެ ހުރިހާ ރަށްތަކަށް ދާދިފަހުން އޭނާ ވަޑައިގެންފައިވާ ކަމަށާއި ވަރަށް ހިތި ތަޖުރިބާތަކެއް ކުރަންޖެހިފައިވާކަމަށް އެރަށްތަކުގެ ގިނަ މީހުން ބުނެފައިވާ ކަމަށް ވެސް އުމަރު ވިދާޅުވި އެވެ.
ތޭރަ އަހަރު ވަންދެން ނ. އަތޮޅުގައި މެންބަރުކަން ކުރެއްވި އިރުގައި އެއަތޮޅުގެ ރަށްތަކަށް ޔާމީން ވަޑައިގެންފައި ވަނީ އެންމެ ދެފަހަރު ކަމަށާއި އަދި މ. އަތޮޅުގައި ހަތަރު އަހަރު މެންބަރުކަން ކުރައްވާފައިވާއިރު އެންމެ ފަހަރަކު ވެސް ޔާމީން އެއަތޮޅުގެ ހުރިހާ ރަށަކަށް ވަޑައިގެންފައި ނުވާކަމަށް އެ އަތޮޅުގެ ރަށްތަކުގެ ގިނަ މީހުން ބުނެފައިވާ ކަމަށް ވެސް އުމަރު ވިދާޅުވި އެވެ.
"ދާދިފަހުން އަޅުގަނޑު މިއައީ އަތޮޅުތަކަށް ދަތުރުކޮށްފައި. ވަރަށް ގިނަ އަތޮޅުތަކުގެ ބޭބޭފުޅުންނާ އަޅުގަނޑާ ބައްދަލުވި އަޅުގަނޑު މިއައީ އަޅުގަނޑުގެ ވާދަވެރިޔާ އޮނަރަބަލް ޔާމީން 13 އަހަރު ވަންދެން މެންބަރުކަން ކުރެއްވި ނ. އަތޮޅުގެ ބައެއް ރަށްރަށަށް ގޮސްފައި. އަދި އަޅުގަނޑު މިއައީ އަޅުގަނޑުގެ ވާދަވެރިޔާ އޮނަރަބަލް ޔާމީން މިހާރު ރައްޔިތުންގެ މަޖިލީސްގެ މެންބަރުކަން ކުރައްވާ މ. އަތޮޅުގެ ހުރިހާ ރަށަކަށް ގޮސްފައި. އަޅުގަނޑު އެބޭބޭފުޅުން ކުރެން އަހާލިން ކޮންކަހަލަ ތަޖުރިބާއެއްތޯ ތިބޭފުޅުންނަށް ކުރެވުނީ އެއީ ބައެއް ބޭފުޅުން ވިދާޅުވި އުމަރު ނަސީރުގެ ތަޖުރިބާއެއް ނެތޭ. އެބޭފުޅުންގެ ތެރެއިން ވަރަށް ގިނަ ބޭފުޅުން ވިދާޅުވި ވަރަށް ހިތިތަޖުރިބާ އެކޭ ތިމަންނަމެން ކުރީ. 13 އަހަރު ދުވަހު ނ. އަތޮޅުގައި މެންބަރުކަން ކުރެއްވި އިރުގައި ދެފަހަރަށޭ ނ. އަތޮޅަށް ވަޑައިގެންނެވީ. މ. އަތޮޅުގަ ހަތަރު އަހަރު މެންބަރުކަމުގައި ހުންނެވި އިރު އަދި އެންމެ ފަހަރަކު ވެސް ހުރިހާ ރަށަކަށް ނާދެވެޔޭ،" އުމަރު ވިދާޅުވި އެވެ.
އުމަރު ވިދާޅުވީ އޭނާ އަކީ "މަގުމަތީ މީހާ" ކަމަށް ބުނާއިރު ފާއިތުވި ފަސް އަހަރުގެ ތެރޭގައި ރާއްޖޭގެ 175 ރަށަކަށް އޭނާ ވަޑައިގެންފައިވާ ކަމަށާއި އެއީ މަގުމަތީ މީހަކަށް ވެގެން އޭނާކޮށްފައިވާ ކަމެއް ނޫންކަމަށެވެ. އަދި އެކަމުގެ ފަހަތުގައި ވަނީ މުރާލިކަމާ ހީވާގި ކަން ކަމަށް ވެސް އުމަރު ވިދާޅުވި އެވެ.
މިރޭގެ ޖަލްސާގައި އުމަރު ވަނީ ޕީޕީއެމްގެ ޕްރައިމަރީ އިންތިޚާބުގައި ފައިސާއަށް ވޯޓު ގަންނަން އުޅޭކަމަށް ދޭހަވާ ގޮތަށް ވާހަކަތަކެއް ދައްކަވާފަ އެވެ.
އޭނާ ވިދާޅުވީ "ވަރަށް ގިނަ މީހުން ފައިސާ ދަބަސް ދަބަހަށް" އަޅައިގެން އަންނާނެ ކަމަށާއި ނަމަވެސް ފައިސާއަށް ވޯޓު ވިއްކާ ނުލުމަށް ޕީޕީއެމްގެ މެންބަރުނަނަށް އިލްތިމާސް ކުރައްވާ ކަމަށެވެ.
މީގެކުރިން ބޭއްވި ކެންޕޭން ޖަލްސާއެއްގައި އޭނާއާ އެކު ބަހުސްއަކަށް ވަޑައިގަތުމަށް ޔާމީނަށް ދައުވަތު ދެއްވާފައިވާނެ ކަމަށާއި ނަމަވެސް ބަހުސްއަކަށް ވަޑައިގަތުމަށް ޔާމީނަށް ކެރިވަޑައި ނުގެންނެވި ކަމަށް ވިދާޅުވެ އުމަރު ވަނީ ޔާމީނަށް ވަރަށް ބޮޑަށް ފާޑުވިދާޅުވެފަ އެވެ. އަދި ގައުމުގައި ހުރި ބޮޑެތި ކަންތައްތަކާ ބެހޭގޮތުން އޭނާއާ އެކު ކުރިއަށް އޮތް ދުވަސްކޮޅުގެ ތެރޭގައި ބަހުސްއަކަށް ވަޑައިގަތުމަށް ދެވަނަ ފަހަރަށް ޔާމީނަށް ދައުވަތު އަރުވާ ކަމަށް ވެސް އުމަރު ވިދާޅުވި އެވެ.