ލޯކަލް ގަވަމަންޓް އޮތޯރިޓީ (އެލްޖީއޭ) ގެ ބޯޑަށް އަތޮޅުތަކުން އިންތިހާބު ކުރަންޖެހޭ ހަތަރު ކައުންސިލަރުންގެ މަގާމަށް 15 ބޭފުޅަކު ކުރިމަތިލައްވައިފި އެވެ. އެލްޖީއޭ ބޯޑަށް އަތޮޅުތަކުން އިންތިހާބު ކުރާނީ ހަތަރު ކައުންސިލަރެކެވެ. އެ ކައުންސިލަރުން އިންތިހާބު ކުރާނީ އަތޮޅުތައް ހަތަރު ސަރަހައްދަކަށް ބަހާލައިގެން ކޮންމެ ސަރަހައްދަކުން ކައުންސިލަރެކެވެ. އެލްޖީއޭ އިން ބުނީ ސަރަހައްދު އެކަކުން ތިން ކައުންސިލަރަކު އެލްޖީއޭގެ ބޯޑަށް ކުރިމަތިލާ އިރު އަނެއް ތިން ސަރަހައްދުގެ ތެރެއިން ކޮންމެ ސަރަހައްދަކުން ހަތަރު ކައުންސިލަރުން އެ އިންތިހާބުގައި ވާދަ ކުރައްވާނެ ކަމަށެވެ. އެ އިންތިހާބު އޮންނާނީ މިމަހުގެ 18 ވަނަ ދުވަހު އެވެ. އަދިި މާދަމާ އެ ކައުންސިލަރުންގެ ކެންޑިޑޭޓް ނަމްބަރު ތަރުތީބު ކުރުން އޮންނާނެ އެވެ.  ކައުންސިލްތަކުން އެލްޖީއޭ ބޯޑަށް އައްޔަން ކުރަންޖެހޭ ހަތަރު ބޭފުޅުން ހޮވާނީ 19 އަތޮޅެއްގެ 130 ކައުންސިލަރެއްގެ މެދުގައި ނަގާ ވޯޓަކުންނެވެ. އެލްޖީއޭގެ ބޯޑުގައި ތިއްބަވަނީ ޖުމްލަ ނުވަ މެންބަރުންނެވެ. ކައުންސިލްތަކުން ބޯޑަށް އައްޔަން ކުރާ ހަތަރު މެންބަރުންގެ އިތުރުން ދެން ތިއްބަވާނީ ކޮންމެ ސިޓީ ކައުންސިލަކުން މެންބަރަަކާއި ރައީސުލްޖުމްހޫރިއްޔާ އެލްޖީއޭގެ ބޯޑަށް އައްޔަން ކުރައްވާ ވަޒީރަކާއި މަދަނީ ޖަމްއިއްޔާތައް ތަމްސީލް ކުރައްވާ ބޭފުޅެއް އަދި އާންމު ރައްޔިތުން ތަމްސީލް ކުރާނެ މެންބަރެކެވެ. އެލްޖީއޭގެ ބޯޑުގައި މިވަގުތު ތިއްބެވީ ތިން ބޭފުޅެކެވެ. އެއީ ދާދި ފަހުން މާލޭ ސިޓީ ކައުންސިލްގެ ފަރާތުން ބޯޑަށް އައްޔަން ކުރި ޝަމާއު ޝަރީފާއި އެ އޮތޯރިޓީގެ ރައީސް މުހައްމަދު ނާޒިމް އަދި އާންމު ރައްޔިތުންގެ ފަރާތުން އެ ބޯޑުގައި ހުންނަވާ ސުޖާއު ހުސައިނެވެ.