އުރެދުމެއް ނުވާ ކޮންމެ ކަމެއްގައި ވަލީޔުލް އަމުރަށް (ވެރި މީހާ) ތަބާވާންޖެހޭ ކަމަށް ޖަމިއްޔަތުއް ސަލަފްގެ ރައީސް ޝައިޚް ޢަބްދުﷲ ބިން ޖަނާބު ވިދާޅުވެއްޖެއެވެ.
ޝައިހް އަބްދުﷲ މިއަދު ކުރެއްވި ޓްވީޓެއްގައި ވިދާޅުވީ ވަލިޔުލް އަމުރާއި މެދު އަހްލުއްސުއްނަތް ވަލް ޖަމާއަތުގެ އަގީދާ އަކީ، މާތްﷲ އަށް އުރެދުމަކަށް ނުވާ ކޮންމެ ކަމެއްގައި ވަލިޔުލް އަމުރުގެ އަމުރަށް ތަބާވުން ކަމަށެވެ.
ޝައިހް އަބްދުﷲ މިހެން ވިދާޅުވެފައިވާއިރު ވެރިމީހާ ކުފުރަށް ދައުވަތު ނުދެނީސް ވެރިކަން ވައްޓާލައިގެން ނުވާނެ ކަމަށް ރާއްޖޭގެ މަޝްހޫރު ދީނީ އިލްމުވެރިޔާ ޝެއިހް ހުސެއިން ރަޝީދު މީގެކުރިން ވަނީ ވިދާޅުވެފައެވެ.
އެގޮތުން ޝެއިހް ހުސެއިން ވިދާޅުވީ ވެރިމީހާއަކީ ރައްޔިތުންގެ މުދާ ފޭރޭ މީހެއްކަމުގައި ވިޔަސް އަދި ރައްޔިތުންނަށް އަނިޔާވެރި ދީނާއި ދުރު މީހެއްކަމުގައި ވިޔަސް ރައްޔިތުންނަށް ކުފުރަށް ދައުވަތު ނުދޭހާ ހިނދަކު ނުވަތަ ކުފުރަށް އިއުލާން ނުކުރާހާ ހިނދަކު ވެރިކަމާއި ދެކޮޅަށް ތެދުވެ ވެރިކަން ވަށްޓާލައިގެން ނުވާނެ ކަމަށެވެ.
"ތިމާގެ ވެރިމީހާއަކީ ތިމާމެންގެ މުދާ ފޭރޭ މީހެއްކަމުގައި ވިޔަސް އަދި ތިމާމެންނަށް އަނިޔާ ކުރާ މީހެއް ކަމުގައި ވިޔަސް އަދި ތިމާމެންގެ ދީނީ ކަންކަމަށް ކިތަންމެ ފަރުވާ ކުޑަ މީހެއް ކަމުގައި ވިޔަސް އެ ވެރިޔާ ކުފުރަށް އިއުލާނު ނުކުރަނީސް ވެރިމީހާއި ދެކޮޅަށް ނުކުމެގެން ނުވާނެ" ޝެއިހް ހުސެއިން ވިދާޅުވެފައެވެ.