އައްޑޫ ސިޓީގައި އަމިއްލަ ފަރާތަކުން އިސްނަގައިގެން ހިންގާ ޙިރާ ސްކޫލް އިމާރާތް ކުރުމަށް ސަރުކާރުން 37،884 އަކަފޫޓުގެ ބިމެއް ދެއްވައި ހިރާ ފައުންޑޭޝަނާއި އެކު ބިން ލިބުނު ކަމުގެ އެގްރިމެންޓެއްގައި ސޮއި ކޮށްފިއެވެ. ޙިރާގެ ފަރާތުން ސޮއި ކުރެއްވީ ފައުންޑޭޝަންގެ މެމްބަރު ޝައިޚް ޙަސަން ލަތީފް މޫސާއާއި މުޙައްމަދު އާމިރެވެ. އަދި ސަރުކާރުގެ ފަރާތުން ސޮއި ކުރެއްވީ އައްޑޫސިޓީ ކައުންސިލްގެ މޭޔަރު ޢަބްދުﷲ ޞޯދިޤާއި ކައުންސިލަރު ޙުސެއިން ޙިލްމީއެވެ.ދިރާސީ އާ އަހަރުގެ ކިޔެވުން ފެށެންވާ އިރަށް ވަގުތީ އިމާރާތެއް ހަދައިގެން ކިޔެވުން ފެށުމަށް ކުރިން ނިއްމާފައިވި ނަމަވެސް އިމާރާތް ކުރުމަށް ބޭނުންވާ ބައެއް ސާމާން ލިބުމުގައި ދަތިތަކެއް ހުރުމުން މިވަގުތަށް މަސައްކަތް ފެށުމަކީ ދަތި ކަމެއް ކަމަށް އެ ސްކޫލުން ހާމަ ކުރައްވައެވެ.“ކުރިން ޚިޔާލުކޮށްފައި އޮތީ އަހަރުގެ މެދު ތެރެއިން ބިން ލިބުނު ނަމަ ވަގުތީ ޢިމާރާތެއް ހަދައިގެން ނަމަވެސް އަންނަ އަހަރު ފެށެންވާ އިރަށް ބަދަލުވުމަށް. އެކަމަކު މާބޮޑަށް ލަސްވުމުގެ ސަބަބުން އެހެން ވާކަށް ނެތް. ދެން މިހާރު މިހުރިތަނުގައި އިތުރު ކުލާސް ތަކެއް ހަދައިގެން ނަމަވެސް އަންނަ އަހަރަށް ގްރޭޑް އުފެއްދުމަށް ވިސްނަމުން މިދަނީ” އެސްކޫލުގެ ބޯޑު މެމްބަރަކު ވިދާޅުވިއެވެ.އައްޑޫސިޓީގައި މިއަހަރުގެ ނޮވެމްބަރު މަހު ބާއްވަން ހަމަޖެހިފައިވާ ސާކްސަމިޓަށް ތައްޔާރުވުމުގެ ގޮތުން ބޮޑެތި އުމްރާނީ މަސައްކަތް ތަކެއް ކުރެވެމުންދާތީ ކޮންސްޓްރަކްޝަން ކުންފުނިތަކުން ދަނީ ސިމެންތި އާއި ހިލަވެލި ހޯދުމުގައި ދަތިތަކާއި ކުރިމަތިލަމުން ކަމުން ލަފާ ކުރެވޭ ގޮތުން މި ސްކޫލުގެ އިމާރާތް ފެއްޓޭވަރު ވާނީ ސާކުސަމިޓްގެ ފަހުން ކަމަށް ސްކޫލްގެ މެނޭޖްމެންޓުން އަންދާސާ ކުރައްވައެވެ.2010 ވަނަ އަހަރުން ފައްޓައިގެން ޕްރީސްކޫލެއްގެ ގޮތުގައި ހިންގަމުންދާ މި ސްކޫލުގެ ކިޔެވުން ވަގުތީ ގޮތުން ހިންގަމުންދަނީ ހިރާ ފައުންޑޭޝަންގެ މެމްބަރު  ހިތަދޫ ޕްލާޒާ މުޙައްމަދު އަޙްމަދު ދީދީގެ އަމިއްލަ ގޭގައެވެ.ޙިރާ ސްކޫލުގައި މިއަހަރު 135 ދަރިވަރުން ތަޢުލީމް ހާސިލް ކުރަމުންދާއިރު މި އަންނަ އަހަރު ގްރޭޑް 1 އުފައްދައި އިތުރު 165 ދަރިވަރަކަށް ޖާގަ ދިނުމަށް ހަމަޖެހިފައިވާ ކަމަށް އެ ސްކޫލްގެ ފަރާތުން ހާމަކުރައްވައެވެ. ސްކޫލުގެ ރަސްމީ މުޤައްރަރަކީ އިނގިރޭސި ކަމުގައިވިޔަސް ޤައުމީ މުޤައްރަރުގެ އިތުރުން އަރަބި ބަސް ކިޔަވައި ދިނުމަށް ވެސް ހަމަޖެހިފައިވާ ކަމަށް އެ ސްކޫލްގެ ފަރާތުން ހާމަ ކުރައްވައެވެ. ޕްރައިމަރީ ލެވެލް ގެ ކިޔެވުމަށް ތައްޔާރުވުމުގެ ގޮތުން ޓްރެއިނިންގ ޓީޗަރުން ހޯދުމުގެ މަސައްކަތް ވަރަށް އަވަހަށް ފަށާނެކަމަށް ވެސް އެ ސްކޫލްގެ ފަރާތުން ހާމަ ކުރައްވައެވެ.ޙިރާ ސްކޫލް އިމާރާތް ކުރުމަށް ބިން ހަވާލް ކުރެވުނު ދުވަހަކީ ސްކޫލުގެ އެންމެ އިސް އެއް ފައުންޑަރ މެމްބަރ އަލް އަޚް ޢަލީ އާދަމް މި ދުނިޔެ ދޫކުރެއްވި ދުވަސް ކަމަށްވުމުން އެ ހިތާމައިގައި ބައިވެރިވެ ޙިރާ ސްކޫލްގެ ހިންގުމަކީ އެ މަރްޙޫމަށް ދެމިގެންވާ ޞަދަޤާތެއްކަމުގައި ލެއްވުން އެދި ދުޢާ ކުރާކަމަށް ޙިރާ ފައުންޑޭޝަނުން ހާމަ ކުރައްވައެވެ.ޙިރާ ސްކޫލަކީ ޒަމާނީ ފެންވަރަށް ނާސަރީން ފެށިގެން ގްރޭޑް 12 އާ ހަމައަށް ކިޔަވައިދިނުމަށް އައްޑޫ ސިޓީގައި ޤާއިމްކުރެވިފައިވާ ސްކޫލެކެވެ. ޖާގައިގެ ދަތިކަމާއި ހުރެ ބިން ހޯދުމުގެ މަސައްކަތް މުޅި އަހަރު އެކީ ކަހަލަ ގޮތަކަށް ޙިރާގެ ބޯޑުގެ މެމްބަރުންނާއި ޕީޓީއޭ ގުޅިގެން ކުރެވުނު މަސައްކަތް ކާމިޔާބުކޮށް ދިނުމުގައި އެހީތެރިކަން ދެއްވީތީ ސިޓީ ކައުންސިލަށް ހިރާ ފައުންޑޭޝަނުން ޝުކުރުއަދާ ކުރެއްވިއެވެ.