އެންމެ ބޮޑު އިދިކޮޅު ޕާޓީ ޑީއާރުޕީގެ ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު އަބްދުﷲ އަބްދުއްރަހީމް މިދިޔަ ހުކުރު ދުވަހުގެ ރޭ އެމްޑީޕީ އަށް ސޮއިކުރެއްވުމަށް ފަހު 24 ގަޑިއިރު ނުވަނީސް އެ ސޮއި އަނބުރާ ގެންދަވައިފި އެވެ.
ސަރުކާރަށް އެންމެ ބޮޑު ޕްރެޝަރެއް ކުރިމަތިވެފައިވާ މާލިއްޔަތު ގާނޫނަށް އިސްލާހު ގެނައުމުގެ ބިލް މަޖިލީހަށް ހުށަހެޅުއްވި އަބްދުﷲ އަބްދުއްރަހީމް މިއަދު "ހަވީރަ" ށް ވިދާޅުވީ "އެމްޑީޕީ އަށް ސޮއިކުރީ އެ މީހުން [އެމްޑީޕީ] ބުނިބުނުމަކަށް" ކަމަށެވެ.
"އަޅުގަނޑަށް ފަހުން ވިސްނުނީ އެމްޑީޕީއާ އެކު މަސައްކަތް ނުކުރެވޭނެކަން. އެހެންވެ ސޮއި އަނބުރާ ގެންދިޔައީ. ރޭގައި އަޅުގަނޑު ވާނީ އެމްޑީޕީ އަށް ގުޅާފައި ބުނެފައި ސޮއި އަނބުރާ ގެންދަނީ ކަމަށް. އެމީހުން އެކަން ގަބޫލުކުރި،" އަބްދުﷲ އަބްދުއްރަހީމް ވިދާޅުވި އެވެ. "އަޅުގަނޑަކީ ޑީއާރުޕީ މީހެއް. އަޅުގަނޑު މަސައްކަތް ކުރާނީ ޑީއާރުޕީ ކުރިއެރުވުމަށް."
އެމްޑީޕީ އަށް ސޮއިކުރެއްވީ ގިނަ އަދަދެއްގެ ފައިސާ ދިނުމަށް އެ ޕާޓީން އެއްބަސްވުމުން ކަމަށް އާންމުންގެ ތެރޭގައި ދެކެވޭ ވާހަކަތަކާ ގުޅިގެން އަބްދުﷲ އަބްދުއްރަހީމް ވިދާޅުވީ އެއީ ދޮގެއް ކަމަށާއި ފައިސާގެ އެއްވެސް މުއާމަލާތެއް ހިންގަވާފައި ނުވާނެ ކަމަށެވެ.
އޭނާ ވިދާޅުވީ އެމްޑީޕީ އަށް ސޮއިކުރެއްވުމަށް ފަހު ހުކުރު ދުވަހުގެ ރޭ ރައީސް މުހައްމަދު ނަޝީދާ މުލީއާގޭގައި ބައްދަލު ވެސް ކުރެއްވި ކަމަށެވެ. އަދި މިހާތަނަށް ހަތަރު ފަހަރެއްގެ މަތިން ރައީސް ނަޝީދާ ބައްދަލުކުރެއްވި ނަމަވެސް ހުރިހާ ފަހަރެއްގައި ކަހަލަ ގޮތަކަށް ވެސް އެމަނިކުފާނަށް ދަންނަވާފައި ވާނީ، އަބްދުﷲ އަބްދުއްރަހީމް ވިދާޅުވި ގޮތުގައި، ސަރުކާރު ޒިންމާދާރު ކުރުވާނެ ކަމަށެވެ.
އޭނާ ވިދާޅުވީ ރައީސް ނަޝީދާ އެންމެ ފުރަތަމަ މުލީއާގޭގައި ބައްދަލުކުރެއްވީ އެމަނިކުފާނުގެ 42 ވަނަ އުފަން ދުވަސް ކަމަށްވާ މޭ ،17 2009 ގައި ކަމަށާއި އޭގެ ބޭނުމަކަށްވީ ރައީސް ނަޝީދަށް އުފަންދުވަހުގެ ތަހުނިޔާ ވިދާޅުވުން ކަމަށެވެ.
"އެއީ އަޅުގަނޑު އަމިއްލަ އަށް އެދިގެން ރައީސް ނަޝީދާ ބައްދަލުކުރި ހަމައެކަނި ދުވަސް. އެ ބައްދަލުކުރުމުގެ ބޭނުމަކީ ރައީސް ނަޝީދަށް އުފަންދުވަހުގެ ތަހުނިޔާ ދެންނެވުން. އަނެއްކާ އެ ދުވަހަކީ އަޅުގަނޑު މަޖިލީހަށް ހޮވުނު އިންތިހާބުގެ ދާއިމީ ނަތީޖާ އިއުލާން ކުރި ދުވަސް. އެހެންވެ އަޅުގަނޑުގެ ބޭނުމަކަށްވީ ރައީސް ނަޝީދާ ބައްދަލުކޮށް އެމަނިކުފާނަށް ޔަގީންކަން އެރުވުން ރައްޔިތުންގެ މަޖިލީހުގައި ރައީސް ނަޝީދުގެ ނޯ ކޮންފިޑެންސް ވޯޓު ނުނަގާނެކަން. އެ އެޝުއަރެންސް ރައީސް ނަޝީދަށް އެރުވުމަށް ފަހު އެކަމަކު އަޅުގަނޑު ދެންނެވިން ސަރުކާރު ޒިންމާދާރު ކުރުވުމަށްޓަކައި ހުރިހާ ކަމެއް އަޅުގަނޑު ކުރާނަމޭ،" އަބްދުﷲ އަބްދުއްރަހީމް ވިދާޅުވި އެވެ.
އޭނާ ވިދާޅުވީ ރައީސް ނަޝީދާ ދެން ބައްދަލުކުރެއްވީ ސަރުކާރުގެ އިގުތިސޯދީ ސިޔާސަތު ހާމަކުރުމަށްޓަކައި އިދިކޮޅު ފަރާތްތަކަށް ވެސް ދައުވަތު ދެއްވައިގެން މިދިޔަ އަހަރުގެ ރޯދަމަހު މުލީއާގޭގައި ބޭއްވި ބައްދަލުވުމުގައި ކަމަށެވެ.
"އެ ރޭ ވެސް އަޅުގަނޑު ދެންނެވިން މަނިކުފާނުގެ އިގުތިސޯދީ ސިޔާސަތު ކުރިއެރުވުމަށްޓަކައި މާލިއްޔަތު ގާނޫނަށް އިސްލާހު ގެނައުމުގެ ބިލް ހުށަހަޅާފައިވާ ވާހަކަ. ތިންވަނަ އަށް ރައީސް ނަޝީދާ އަޅުގަނޑު ބައްދަލުކުރީ އޮޑިޓަ ޖެނެރަލް އިބްރާހިމް ނައީމްގެ އިތުބާރު ނެތް ކަމުގެ މައްސަލައިގައި. އެ ފަހަރު އެމްޑީޕީގެ ބައެއް މެމްބަރުންނާ އެކު ރައީސް ނަޝީދު އެދިވަޑައިގެން ބައްދަލުކުރީ. މިއިން ކޮންމެ ފަހަރަކު އަޅުގަނޑު ރައީސް ނަޝީދަށް ދަންނަވަމުން ގެންގޮސްފައިވާނީ ސަރުކާރު ޒިންމާދާރުކުރުވުމަށްޓަކައި ކުރަން ޖެހުނު ކޮންމެ ކަމެއް އަޅުގަނޑު ކުރާނަމޭ،" އަބްދުﷲ އަބްދުއްރަހީމް ވިދާޅުވި އެވެ. "އެއިން އެއްވެސް ފަހަރަކު ނޯންނާނެ ފައިސާގެ މުއާމަލާތެއް ކޮށްފައެއް."
އޭނާ ވިދާޅުވި ގޮތުގައި ރައީސް ނަޝީދާއި އެމްޑީޕީގެ މެމްބަރުންނާ އެކު އެއް މޭޒުގައި ސައި ބައްލަވައި ހައްދަވަނީ ސިއްރުން ނޫން ކަމަށެވެ.
"އަޅުގަނޑަކީ އެންމެންނާ ވެސް ގުޅުން އޮންނަ މީހެއް. އެ ގުޅުން އޮތެއް ކަމަކު ޑީއާރުޕީގައި ހުރެގެން އަޅުގަނޑު އަދާކުރަން ޖެހޭ ވާޖިބު އަދާކުރާނަން. އަޅުގަނޑު އެ ބޭފުޅުންނާ ބައްދަލުކުރަނީ މަޖިލީހުގެ މަސައްކަތްތައް ސްޕީޑްކުރުމަށްޓަކައި ޑީއާރުޕީން ކަނޑައަޅާ ހުދޫދެއްގެ ތެރޭގައި. މިހާތަނަށް ވެސް އޮންނާނީ އެކަން އެ ގޮތަށް ކޮށްފައި. މާލިއްޔަތު ގާނޫނަށް އިސްލާހު ގެނައުމުގެ ބިލް ވެސް ހުށަހެޅީ އަޅުގަނޑު،" އޭނާ ވިދާޅުވި އެވެ.
މަޖިލީހުގަ އާއި ޑީއާރުޕީގެ އެކި އެއްވުންތަކުގައި ސަރުކާރަށާއި ރައީސް ނަޝީދަށް އެކި ފަހަރުމަތިން ވަރަށް ބޮޑަށް ފާޑުވިދާޅުވަމުން ގެންދަވާ އަބްދުﷲ އަބްދުއްރަހީމް އެމްޑީޕީ އަށް ސޮއިކުރެއްވުމަށް ފަހު އެ ނިންމެވުން އަނބުރާ ގެންދެވުމާ ގުޅޭ ގޮތުން ޑީއާރުޕީން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.