ށ. މިލަންދޫގައި އެއާޕޯޓު ގާއިމްކުރުމަށްޓަކައި ބޭނުންވާ ބިން ހިއްކުމުގެ މަސައްކަތް، މިއަދު އެއްކޮށް ނިންމާލާފައިވާކަމަށް ހައުސިން މިނިސްޓްރީން ބުނެފިއެވެ. މިދިޔަ އަހަރުގެ އޮކްޓޯބަރު މަހުގެ 15 ވަނަ ދުވަހު ރައީސް ޑރ. މުހައްމަދު މުއިއްޒު މިލަންދުއަށް ވަޑައިގެން، އެ ރަށުގައި އެއާޕޯޓް އެޅުމުގެ އަމަލީ މަސައްކަތް ފައްޓަވައިދެއްވިއެވެ. އޭރު ރައީސް ވަނީ، އަށް މަސްދުވަހުގެ ތެރޭގައި ބިން ހިއްކައި، ދެ އަހަރާއި ބައިގެ ތެރޭގައި އެ ރަށުގައި އެއާޕޯޓު އަޅައި ހުޅުވުމަށް ވައުދުވަޑައިގެންފައެވެ. ހައުސިން މިނިސްޓްރީގެ ޑެޕިއުޓީ މިނިސްޓަރު މުޙައްމަދު ނާޝިދު މިއަދު އެކްސްގައި ކުރެއްވި ޕޯސްޓެއްގައި ވަނީ، މިލަންދޫގައި އެއާޕޯޓް ތަރައްގީ ކުރުމަށް ބޭނުންވާ 25.90 ހެކްޓަރުގެ ބިން ހިއްކުމުގެ މަސައްކަތް މިއަދު އެއްކޮށް ނިންމާލާފައި ވާކަމަށެވެ. އެ މަޝްރޫއުގެ މަސައްކަތް ކުރިއަށް ގެންގޮސްފައިވަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ނެދަލެންޑްސްގެ ބޮސްކާލިސްއާ ހަވާލުކޮށްގެންނެވެ. https://x.com/naadu_mv/status/2051225716793241872 ނާޝިދު ވިދާޅުވީ ރައީސްގެ ވަޢުދުފުޅާ އެއްގޮތަށް، ކަނޑައެޅިފައިވާ ތާވަލަށްވުރެ ކުރިން އެ މަސައްކަތް ނިންމާލާފައިވާ ކަމަށެވެ. އަދި އެއީ، މި ސަރުކާރަކީ ރައްޔިތުންނަށް ވާ ވަޢުދުތައް ފުއްދައި، ހަލުވި ދުވެލީގައި ނަތީޖާ ނެރެދޭނެ ސަރުކާރެއްކަމުގެ ސާފު ހެއްކެއް ކަަމަށް އޭނާ ވަނީ ވިދާޅުވެފައެވެ. ރައީސް މިލަންދުއަށް ކުރެއްވި ދަތުރުފުޅުގައި ވަނީ އެ ރަށަށް ކޮންމެހެން އެއާޕޯޓެއް މުހިންމު ކަމަށް ވިދާޅުވެފައެވެ. https://sun.mv/212707 އެ ރަށުގައި އެއާޕޯޓު އެޅުމަށްޓަކައި ބަނދަރު އެހެން ސަރަހައްދަކަށް ބަދަލުކުރަންޖެހޭ ކަމަށާއި، އެއާޕޯޓުގެ މަސައްކަތް ކުރިއަށްދާނީ ބަނދަރުގެ މަސައްކަތާ ވެސް އެކުގައި ކަމަށް އެ މަނިކުފާނު އޭރު ވަނީ ވިދާޅުވެފައެވެ. މީހުން ދިރިއުޅޭ ކޮންމެ ރަށަކާ ގިނަވެގެން 30 މިނެޓު ދުރުގައި އެއާޕޯޓެއް އޮންނަކަން ކަށަވަރުކޮށްދިނުމަކީ މި ސަރުކާރުގެ ވައުދެކެވެ.