ރައްޔިތުންގެ މަޖިލީހުގެ ދުވާފަރު ދާއިރާގެ މެންބަރު އިސްމާއިލް އަހުމަދުގެ މައްޗަށް 8 ލައްކައަށްވުރެ ބޮޑު ދަރަންޏެއް ސާބިތުވެ، އެ ދައްކާ ހަލާސްކުރުމަށް ސިވިލް ކޯޓުން ހުކުމްކޮށްފި އެވެ.
އިސްމާއިލްގެ މައްޗަށް ސާބިތުވީ ތ. ކަނޑޫދޫ ސްކޫލްގެ ތިން ކްލާސްރޫމެއް ހަދަން އެޑިއުކޭޝަން މިނިސްޓްރީން 2018 ވަނަ އަހަރު އޭނާގެ ކުންފުންޏަށް ދިން މަޝްރޫއެއް، ސަބް-ކޮންޓްރެކްޓަރަކާ ހަވާލުކޮށް، އެ ފަރާތަށް ދޭންޖެހޭ 856،830 ރުފިޔާ ނުދީ އޮތުމުން އަރާފައިވާ ދަރަންޏެވެ.
މި މަޝްރޫއުގެ ސަބް-ކޮންޓްރެކްޓްކުރީ ހ.ވަލަންޖު/ މޫސާ ހަލީލް ކިޔާ މީހެކެވެ. އޭނާ ސިވިލް ކޯޓަށް ހުށަހެޅި ދައުވާގައި ބުނަނީ އޭނާ އަމިއްލަ ތަކެތީގައި ކުރި މަސައްކަތާއި އަަގަށް އިސްމާއިލް 1.2 މިލިއަން ރުފިޔާ ދޭންޖެހޭ ކަމަށެވެ.
ނަމަވެސް އެ ފައިސާގެ ތެރެއިން މިހާތަނަށް ލިބުނީ 425،000 ރުފިޔާ ކަމާއި ކޯޓު މެދުވެރިކޮށް ހޯދަން އެދެނީ 856،830 ރުފިޔާ ކަމަށް މޫސާ ހަލީލްގެ ދައުވާގައިވެ އެވެ.