ކަރަންޓު ކެނޑުނުތާ ހަތަރު ގަޑިއިރު ފަހުން މައްސަލަ ހައްލުކޮށް ހިޔާ ޓަރަވަރުތަކަށް ކަރަންޓު ދީފިއެވެ.
ހިޔާ ޓަވަރުތަކުން ކަރަންޓު ކެނޑުނީ މިއަދު ހަވީރު 5:30 ހާއިރުއެވެ.
ހިޔާ ފްލެޓްތަކަށް ކަރަންޓް ދިނުމަށް ސްޓެލްކޯއިން އެއިރުން ފެށިގެން ދިޔައީ ކެނޑިނޭޅި މަސައްކަތް ކުރަމުންނެވެ.
މާލޭ ސަރަހައްދުގައި ކަަރަންޓުގެ ޚިދުމަތްދޭ މައި ކުންފުނި، ސްޓޭޓް އިލެކްޓްރިކް ކޮމްޕެނީ (ސްޓެލްކޯ)އިން ބުނީ ހިޔާގެ ބައެއް ޓަވަރުތަކުން ކަރަންޓުގެ ހިދުމަތް މެދުކެނޑެން މެދުވެރިވީ ހިޔާގެ ފުރަތަމަ ޓަވަރުގެ ސަބްސްޓޭޝަންގެ ސުވިޗްގިއަރގެ ބަސްބާ ޝޯޓުވުމާއި ގުޅިގެން ކަމަށެވެ.
އެސަބްސްޓޭޝަންގެ ސުވިޗްގިއަރގެ ބަދަލު ކުރުމުގެ މަސައްކަތް މިހާރު ނިންމާލެވިފައިވާ ކަމަށް ސްޓެލްކޯއިން ބުނެއެވެ. މިމަސައްކަތަށް ގަޑިއިރުތަކެއް ހޭދަވުމުން ދިމާވި ދަތިތަކަށް މާފަށް އެދޭ ކަމަށް ސްޓެލްކޯއިންވަނީ ބުނެފައެވެ.
އެ ކުންފުނީގެ އޮފިޝަލަކު ވިދާޅުވީ، ވަގުތީ އާރުއެމް ޔުނިޓެއް ބަހައްޓައި އެކުންފުނީގެ މުވައްޒަފުން ކެނޑިނޭޅި ކުރި ބުރަ މަސައްކަތުން ހިޔާގެ ކަރަންޓުގެ ހިދުމަތް މެދުކެނޑުނު ހުރިހާ ޓަވަރަކަށް މިހާރު އަލުން ކަރަންޓު ދެވިފައިވާ ކަމަށެވެ.
ހިޔާ ޓަވަރުތަކުން ކަރަންޓު ކެނޑުނީ ބަންގިގޮވަން ކުޑަތަންވެފައި ވަނިކޮށެވެ. އެހެންވެ، ހިޔާގައި ދިރިއުޅޭ މީހުން މިއަދު ރޯދަ ވީއްލާފައި ވަނީ ކަނު އަނދިރީގައެވެ.