އިރާނާ ދެކޮޅަށް ކުރަމުންދާ އަސްކަރީ ކެމްޕޭން، ހޮރްމޫޒް ކަނޑުއޮޅި ބަންދުވެފައި އޮތް ނަމަވެސް ނިންމާލުމަށް ތައްޔާރަށް ހުންނެވި ކަމުގެ އިޝާރާތެއް އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި ކަމަށް ސަރުކާރުގެ އިސް އޮފިޝަލުންނާ ހަވާލާދީ ވޯލް ސްޓްރީޓް ޖާނަލް ނޫހުން މިއަދު ބުނެފި އެވެ.
އޮފިޝަލުން ހާމަކުރި ގޮތުގައި، ވޮޝިންޓަނުން ބޭނުންވަނީ ހަނގުރާމައިގެ ހަރަކާތްތައް މަޑުޖައްސާލައި ޑިޕްލޮމެޓިކް މަގުން މަސައްކަތް ކުރަން ފެށުމުގެ ކުރިން، އިރާނުގެ ކަނޑުގެ ސިފައިންނާއި މިސައިލް އުފެއްދުމުގެ ގާބިލުކަން ކުޑަކުރުން ފަދަ މުހިންމު ލަނޑުދަނޑިތަކެއް ހާސިލުކުރުމަށެވެ. މުހިންމު ވިޔަފާރި މަގެއް ކަމަށްވާ ހޮރްމޫޒް ކަނޑުއޮޅި އަލުން ހުޅުވުމުގެ މަސައްކަތް ފަސްކޮށް، އެކަމުގައި އިސްދައުރެއް އަދާކުރުން އެމެރިކާގެ އެކުވެރި ގައުމުތަކާ ހަވާލުކުރުމުގެ ފުރުސަތު އެބައޮތެވެ.
އެމެރިކާގެ ހާރިޖީ ވަޒީރު މާކޯ ރޫބިއޯ ވިދާޅުވީ، ކުރިއަށް އޮތް ހަފުތާތަކުގެ ތެރޭގައި އަސްކަރީ ލަނޑުދަނޑިތައް ހާސިލުކޮށް ނިންމާލެވޭނެ ކަމަށެވެ. އޭގެ ފަހުން ހޮރްމޫޒް ކަނޑުއޮޅީގެ މައްސަލައާ ކުރިމަތިލާން ޖެހޭނެ ކަމަށާއި ކޮންމެވެސް ގޮތަކުން އެ މަގު ހުޅުވޭނެކަން ކަށަވަރު ކުރާނެ ކަމަށް ވެސް އޭނާ ވިދާޅުވި އެވެ.
ނަމަވެސް، ފާޑުކިޔާ ފަރާތްތަކުން އިންޒާރު ދޭ ގޮތުގައި މިފަދަ ނިންމުމެއްގެ ސަބަބުން އިގްތިސާދީ ގޮތުން ނުރައްކާތެރި ނަތީޖާތަކެއް ނުކުމެދާނެ އެވެ. އެނަލިސްޓް ސޫޒަން މެލޯނީ ވިދާޅުވި ގޮތުގައި، ކަނޑުއޮޅި ނުހުޅުވައި ހަނގުރާމައިގެ އޮޕަރޭޝަންތައް ހުއްޓާލުމަކީ ގަބޫލުކުރަން ދަތި އަދި ޒިންމާދާރުކަން ކުޑަ އަމަލެކެވެ. އަދި މީގެ ސަބަބުން ދުނިޔޭގެ ހަކަތައިގެ ބާޒާރަށް ކުރިމަތިވެފައިވާ ގޮންޖެހުންތައް އިތުރަށް ގޯސްވާނެ ކަމަށް އޭނާ ފާހަގަކުރެއްވި އެވެ.
މި ކަންބޮޑުވުންތަކާ އެކު ވެސް، އެމެރިކާ ސަރުކާރުން ވަނީ އެމެރިކާއަށް އެ ކަނޑުއޮޅީގެ މުހިންމުކަން ކުޑަކަމަށް ދައްކަން މަސައްކަތްކޮށްފަ އެވެ. ހަމަ އެއާ އެކު، ޑިޕްލޮމެޓިކް މަސައްކަތްތައް ނާކާމިޔާބުވެއްޖެ ނަމަ، ގުޅިގެން ފިޔަވަޅު އެޅުމަށް ތައްޔާރުވުމަށް އެމެރިކާގެ އެކުވެރި ގައުމުތަކަށް ވަނީ ބާރުއަޅާފަ އެވެ.