ލުނބޯ ތޮށްޓަކީ އޭގައި ގިނަ އަދަދަކަށް ފައިބައާއި ވިޓަމިންސް އަދި އެންޓިއޮކްސިޑެންޓްތައް އެކުލެވޭ އެއްޗެކެވެ. މީގެ ސަބަބުން ދަތްތަކާއި، ހިތުގެ ދުޅަހެޔޮކަމަށާއި ދިފާއީ ނިޒާމަށް ގިނަގުނަ ފައިދާތަކެއް ކުރެއެވެ. ހަމައެއާއެކު ލުނބޯ ތޮށްޓަކީ ކެންސަރާ ދެކޮޅަށް މަސައްކަތް ކުރުމުގެ ބާރުވެސް ލިބިފައިވާ އެއްޗެއް ކަމަށް ކޯސްޓަ ރިކާއަށް ނިސްބަތްވާ ރެޖިސްޓަޑް ޑައިޓީޝަން އެރިއާނާ ލޭންގް ވެސް ވަނީ ވިދާޅުވެފައެވެ. ލުނބޯ ތޮށީގެ ފައިދާއާގެ މައްޗަށް ބިނާކޮށް އެރިއާނާ ޝާއިއުކޮށްފައިވާ ލިޔުމެއްގައި ބަޔާންކުރައްވާފައިވާ ގޮތުގައި ލުނބޯ ބޭނުންކުރުމަށްފަހު އޭގެ އެތެރޭގެ ބައިތަކާއި ހުތް ބޭނުން ކުރުމަށްފަހު ތޮށި އެއްލާލުމަކީ ވަރަށް ގިނަ ބައެއްގެ އާދައެކެވެ. ނަމަވެސް، ސިއްހީ ގޮތުން ބަލާއިރު ލުނބޯ ތޮށްޓަކީ ބަޔޯއެކްޓިވް ކޮމްޕައުންޑްތަކުން މުއްސަނދިވެފައިވާ، ހަށިގަނޑަށް ވަރަށް ފައިދާހުރި އެއްޗެއް ކަމަށް އެރިއާނާ ވަނީ ވިދާޅުވެފައެވެ. ލުނބޯ ތޮށިން ލިބިދޭ ބައެއް ފައިދާތަކަށް ބަލާއިރު އެއީ ނިއުޓްރިޝަންގެ ގޮތުން ވަރަށް މުއްސަނދި މޭވާގެ ބާވަތެކެވެ. ލުނބޯ ތޮށި ކެއުމުގައި މަދު މިންވަރަކަށް ބޭނުންކުރި ކަމުގައިވިޔަސް، އޭގެއިން ގިނަ އަދަދަކަށް ހަށިގަނޑަށް ބޭނުންވާ މާއްދާތައް ލިބެއެވެ. އެގޮތުން އެންމެ ސަމުސަލެއްގެ ( ހަ ގްރާމް) ލުނބޯ ތޮށިން ދުވާލަކަށް ބޭނުންވާ ވިޓަމިން ސީގެ ނުވަ އިންސައްތަ ލިބިދެއެވެ. މީގެ އިތުރުން ކެލްސިއަމް، ޕޮޓޭސިއަމް އަދި މެގްނީޒިއަމް ވެސް މީގައި އެކުލެވިގެންވެއެވެ. ލުނބޯ ތޮށި ބޭނުންކޮށްގެން ތައްޔާރުކޮށްފައި ލުނބޯ ކުޑި--ފޮޓޯ/ޕިންޓްރެސްޓް ލުނބޯ އަކީ އަނގައިގެ ދުޅަހެޔޮކަން އިތުރުކޮށްދިނުމަށް ވެސް އެހީތެރިވެދޭ ބާވަތެކެވެ. ދަތް ފަނިކެއުމާއި ހިރުގަނޑުގެ ބަލިތަކަކީ އަނގައިގައި އުފެދޭ ބެކްޓީރިއާގެ ސަބަބުން ދިމާވާ ކަންކަމެވެ. ލުނބޯ ތޮށީގައި އެކުލެވޭ އެންޓި-ބެކްޓީރިއަލް މާއްދާތަކުގެ ސަބަބުން މިފަދަ ޖަރާސީމުތައް އުފެދުމާއި އިތުރުވުން ހުއްޓުވައިދެއެވެ. އާއްމުކޮށް އަޅުގަނޑުމެން ކޮންމެ ދުވަހަކު ވެސް ކެއުމުގައި އަދި ކެއުން ތައްޔާރު ކުރުމަށް ބޭނުންކުރާ ލުނބޯގެ ތޮށްޓަކީ އެންޓިއޮކްސިޑެންޓްތަކުން މުއްސަނދިވެފައިވާ ޖަރާސީމާއި ފަންގަސްއާ ދެކޮޅަށް މަސައްކަތްކުރުމަށް އެހީވެދޭ ބާވަތެކެވެ. މީގެއިތުރުން ހަށިގަނޑުގެ ދިފާއީ ނިޒާމު ވަރުގަދަކޮށްދީ ހިތުގެ ދުޅަހެޔޮކަން ރަނގަޅުކޮށްދިނުމަށް ވެސް ލުނބޯ ތޮށީގައި ހިމެނޭ މާއްދާތައް އެހީވެދެއެވެ. ލުނބޯ ތޮށީގައި ކެންސަރާ ދެކޮޅަށް މަސައްކަތްކުރުމުގެ ބާރު ހުރެއެވެ. އޭގައި ހިމެނޭ ވިޓަމިން ސީގެ ސަބަބުން ހަށިގަނޑުގެ ދިފާއީ ސެލްތައް އުފެއްދުމަށް އެހީތެރިވެދެއެވެ. އަދި އޭގައިވާ ޑީ-ލިމޮނީން އަކީ ބައެއް ކަހަލަ ކެންސަރު ސެލްތައް ނައްތާލުމަށް އެހީތެރިވެދޭ މާއްދާއެކެވެ. ނަމަވެސް މިއީ ކެންސަރުގެ ފަރުވާއެއްގެ ގޮތުގައި ބެލުމުގެ ބަދަލުގައި، ރައްކާތެރިވުމަށް އެހީތެރިވާ ބައެއްގެ ގޮތުގައި ބެލުން މުހިންމު ކަމަށް އެރިއާނާ ވަނީ ވިދާޅުވެފައެވެ. ލުނބޯ ތޮށި ބޭނުންކުރުމުގައި އެއްވެސް ނުރައްކާތެރިކަމެއް އޮތްކަމަށް މިހާތަނަށް ރިޕޯޓްކުރެވިފައި ނުވާއިރު ލުނބޯ ހައްދާއިރު ޖަހާ ބޭސްތައް އޭގެ ތޮށީގައި ހުރެދާނެތީ، ބޭނުންކުރުމުގެ ކުރިން ރަނގަޅަށް ދޮވުމަކީ މުހިންމު ކަމެއް ކަމަށް ރެޖިސްޓަޑް ޑައިޓީޝަން އެރިއާނާ ފާހަގަކުރައްވާފައިވެއެވެ. ލުނބޯ ތޮށި އުކާލުމުގެ ބަދަލުގައި އެއިން ކުރެވިދާނެ ބޭނުންތަކުގެތެރޭ އެކި ވައްތަރުގެ ޕާން، ކޭކު ނުވަތަ ފޮނި ކެއުންތައް ތައްޔާރުކުރާއިރު ލުނބޯގެ ތޮށި ގާނާލުމަށްފަހު ބޭނުންކުރެވިދާނެއެވެ. މީގެއިތުރުން ލުނބޯ ތެޔޮ ތައްޔާރުކުރުން، އެކި ކަހަލަ ސައި ތައްޔާރު ކުރުމަށް ބޭނުންކުރުން، ސޫޕް ތައްޔާރުކުރުމަށް ބޭނުންކުރުން އަދި ގޭތެރޭގައި މީރުވަސް ދުއްވަން ސްޕްރޭއެއް ތައްޔާރު ކުރެވިދާނެއެވެ.