އައްޑޫގައި ފުޅާ ދާއިރާއެއްގައި މަސްތުވާތަކެތި ވިޔަފާރިކޮށް، މަނީލޯންޑަރިންގެ އަމަލުތަކެއް ހިންގާފައިވާ ކަމަށް ތުހުމަތުކުރެވޭ މައްސަލާގައި އެކަށީގެންވާ ހެކި ނެތިގެން، މައްސަލަ އަނބުރާ ފޮނުވާލައި އެ މައްސަލާގައި ހައްޔަރުކުރި އެންމެން ދޫކޮށްލަން ޕްރޮސެކިއުޓާ ޖެނަރަލް (ޕީޖީ)ގެ އޮފީހުން ރޭ ލަފާދީފި އެވެ. 
ވީ ކިހިނެއް؟ - ފުލުހުން ހިންގާ އޮޕަރޭޝަން 'އަލިމަގު'ގެ ތެރެއިން މިދިޔަ ޑިސެމްބަރުގައި މި މައްސަލައިގެ ތުހުމަތުގައި 6 މީހަކު ހައްޔަރުކުރި އެވެ. އެ މީހުންނަކީ:
އަލީ ނަދީމް، 30، ކޮންމުލި/ސ. ހިތަދޫ
ހާފިޒު ފައުޒީ، 31، ފަލާހް/ސ. ހިތަދޫ
އިބްރާހިމް ސިރާޖު، 43، ވެޔޮފެހެބުރުގެ/ސ. ހިތަދޫ
ހަސަން އަލްފާފް، 28، ދޮރުފޮތިމާގެ/ސ. ހިތަދޫ
އަމީން މުހައްމަދު، 23، ކެކުރިމާގެ/ސ. ހިތަދޫ
ޒަހްނާ އަހުމަދު، އަންބަރީގެ/ދ.ހުޅުދެލި
މި މީހުންނަށް ކުރަނީ ކުށް ކުރާ ޖަމާއަތެއްގައި ބައިވެރިވުމުގެ ތުހުމަތާއި މަނީ ލޯންޑްރިންގެ ތުހުމަތެވެ.
ބުނީ ކީކޭ؟ - ޕީޖީ އޮފީހުން ރޭ ބުނީ، އެ މައްސަލައިގެ ތަހުގީގު މުއްދަތު އިއްޔެގެ ނިޔަލަށް ހަމަވެފައިވާ ކަމަށެވެ. މައްސަލަ ތަހުގީގު ކުރުމަށް ގާނޫނުގައި ކަނޑައަޅާފައިވާ މުއްދަތު ހަމަވުމާ ހަމައަށް ލިބިފައިވާ ހެކި ގަރީނާ ވަޒަންކުރިއިރު، މި މައްސަލާގައި ތުހުމަތުކުރެވޭ މީހުން، ކުށްކުރާ ޖަމާއަތެއްގައި ބައިވެރިވިކަން ނުވަތަ މަނީ ލޯންޑާކުރިކަން ގާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވޭ މިންވަރަށް ހެއްކާއި ގަރީނާ ލިބިފައި ނުވާ ކަމަށް އެ އޮފީހުން ބުންޏެވެ.
ޕީޖީ އޮފީހުން ބުނި ގޮތުގައި:
މި މައްސަލައިގެ ތަހުގީގު މުއްދަތު ގާނޫނު ތަންދޭ އެންމެ ދިގު މުއްދަތާ ހަމައަށް އެކި ފަހަރުމަތިން އިތުރުކޮށްދީފައިވޭ
އެކަމަކު، އެ މުއްދަތުގެ ތެރޭގައި ވެސް ތަހުގީގު އެކަށީގެންވާ ވަރަށް ފުރިހަމަކުރެވި، ދައުވާކުރެވޭ މިންވަރަށް ހެއްކާއި ގަރީނާ ހޯދިފައި ނުވޭ 
ދައުވާކުރެވޭ މިންވަރަށް ހެކި ލިބިފައިނުވާ ނަމަ، ތަހުގީގު އިދާރާއިން އެ މީހަކު ބަންދުން ދޫކޮށްލަންވާނެ ކަމަށް ބަޔާންކޮށްފައިވޭ 
އެހެންކަމުން، މި ނިންމުމާ އެކު މައްސަލާގައި ތުހުމަތުކުރެވޭ މީހުންގެ ތެރެއިން ބަންދުގައި ތިބި މީހުން ބަންދުން ދޫކޮށްލުމަށް ފުލުހުންނަށް ލަފާދީފައިވާނެ
"މި މައްސަލާގައި ދައުވާކުރެވޭ މިންވަރަށް މިވަގުތަށް ހެއްކާއި ގަރީނާ ލިބިފައި ނުވާތީ މައްސަލަ ޑިކްލައިން ކުރި ނަމަވެސް، އާ ހެކި ލިބިއްޖެ ހާލަތެއްގައި އަލުން ދައުވާކުރުމަށް އެދި ހުށަހެޅުމަށް ފުލުހުނަށް ލަފާދީފައިވާނެ،" ޕީޖީ އޮފީހުން  ބުންޏެވެ.
އެނގުން މުހިންމު - ފުލުހުން މީގެ ކުރިން ބުނެފައިވާ ގޮތުގައި، މި ނެޓްވޯކުގެ އިސްފަރާތްތަކަށް އަމާޒުކޮށް މަސްތުވާތަކެތި ޓްރެފިކް ކުރުމާއި މަނީ ލޯންޑާ ކުރުމުގެ ތަހުގީގު ފެށީ މިދިޔަ އަހަރުގެ މާޗުގަ އެވެ. އެ ނެޓްވޯކުން، ފުޅާ ދާއިރާއަކަށް މަސްތުވާތަކެތި ވިއްކައި ވިޔަފާރިކޮށް، އެކަމުން ހޯދާ ފައިސާ ލޯންޑާކުރާކަމަށް ފުލުހުން ތުހުމަތުކުރެ އެވެ. އެގޮތުން ފުލުހުން އޭރު ބުނެފައިވަނީ:
މި ނެޓްވޯކްގެ ތެރެއިން 2017 އިން ފެށިގެން މަސްތުވާތަކެތިގެ ވިޔަފާރި ކުރަމުންދާކަން ފުލުހުންނަށް ވަނީ ހޯދިފައި
ފާއިތުވި 5 އަހަރު މި ނެޓްވޯކްގެ އިސް 4 މީހެއްގެ އެކައުންޓްގައި 19 މިލިއަނަށް ވުރެ ގިނަ ރުފިޔާ ދައުރުކޮށްފައިވާކަން ފާހަގަކުރެވިފައިވޭ