ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކުގެ ދަށުން ދޫކުރާ ގޯއްޗާއި ފްލެޓް ލިބޭނެ ކަމަށް ބުނެ، އޮޅުވާލައިގެން އާންމުންގެ އަތުން ފައިސާ ނަގަމުންދާ މައްސަލަތަކެއް ފެންމަތިވެފައިވާތީ އެކަމަށް ސަމާލުވުމަށް ހައުސިން މިނިސްޓްރީން މިއަދު އިލްތިމާސްކޮށްފިއެވެ. ހައުސިން މިނިސްޓްރީން މިއަދު ނެރުނު ބަޔާނެއްގައި ބުނީ، "ބިންވެރިޔާ" ސްކީމްގެ ދަށުން ދޫކުރާ ގޯއްޗާއި "ގެދޮރުވެރިޔާ" ސްކީމްގެ ދަށުން ދޫކުރާ ފްލެޓްތައް ލިބޭނެ ކަމަށް ބުނެ، އެކި ފަރާތްތަކުން އާންމުންގެ އަތުން ފައިސާ ނަގަމުންދާކަމުގެ މައުލޫމާތު އެ މިނިސްޓްރީއަށް ލިބެމުންދާ ކަމަށެވެ. މިކަމާ ގުޅިގެން މިނިސްޓްރީން ހާމަކުރި ގޮތުގައި، ސަރުކާރުން ހިންގާ ބޯހިޔާވަހިކަމުގެ ހުރިހާ މަޝްރޫޢުތަކެއްގެ ދަށުން ގޯއްޗާއި ފްލެޓް ދިނުމުގެ މަސައްކަތް ކުރިއަށްދާނީ ވަރަށް ދެފުށް ފެންނަ އުސޫލަކުންނެވެ. އެގޮތުން ހުރިހާ މުޢާމަލާތްތަކެއް ވެސް ކުރިއަށްގެންދާނީ ގެޒެޓުގައި ޝާއިޢުކޮށްފައިވާ އުސޫލުތަކާއި އިޖުރާޢަތުތަކުގެ އިތުރުން، މިނިސްޓްރީން އާންމުކުރާ ރަސްމީ އިއުލާނުތަކާ އެއްގޮތްވާ ގޮތުގެ މަތިން ކަމަށް ބަޔާނުގައި ބުނެފައިވެއެވެ. ސަރުކާރުގެ ގެޒެޓުގައި އާންމުކޮށްފައިވާ އުސޫލަކާ ނުވަތަ މިނިސްޓްރީގެ އިއުލާނަކާ ހިލާފަށް އެއްވެސް ފަރާތަކަށް ބޯހިޔާވަހިކަމުގެ މަޝްރޫޢުތަކުން ގޯއްޗާއި ފްލެޓް ލިބުމުގެ އެއްވެސް ފުރުސަތެއް ނޯންނާނެ ކަމަށް މިނިސްޓްރީން ވަނީ ބުނެފައެވެ. "އެކި ފަރާތްތަކުން ހިންގާ މިފަދަ އޮޅުވާލުންތަކާއި ސްކޭމްތަކަށް އާންމު ރައްޔިތުން ސަމާލުވުމަށް ދަންނަވަމެވެ. އަދި ސަރުކާރުން ހިންގާ ޕްރޮގްރާމެއްގެ ދަށުން ދޫކުރާ ގޯތި ނުވަތަ ފްލެޓް ހޯދުމުގެ ގޮތުން އެއްވެސް ފަރާތަކާ ފައިސާގެ ނުވަތަ އެފަދަ އެހެން އެއްވެސް މުޢާމަލާތެއް ނުކުރުމަށް އިލްތިމާސްކުރަމެވެ،" މިނިސްޓްރީގެ ބަޔާނުގައި ބުނެފައިވެއެވެ. މީގެ އިތުރުން، ރަސްމީ އުސޫލުތަކުން ބޭރުން ގޯއްޗާއި ފްލެޓް ހޯދުމަށް އެއްވެސް ފަރާތަކުން މުޢާމަލާތެއް ކޮށްފިނަމަ ނުވަތަ އެފަދަ ކަމެއްގެ މައުލޫމާތު ލިބިއްޖެނަމަ، ލަސްނުކޮށް މޯލްޑިވްސް ޕޮލިސް ސާވިސްގެ އެންޓި-ސްކޭމް ސެންޓަރުގެ ހޮޓްލައިން ނަންބަރު 125 އަށް ގުޅައި އެކަން ރިޕޯޓުކުރުމަށް ވެސް ހައުސިން މިނިސްޓްރީން ވަނީ އެދިފައެވެ.