ސޮބާހަށް އިވްލީން ފެނުމުން، ރިމްޝާ ދުރުކޮށްފައި އެތެރެއަށް ވަނެވެ. ކުއްލިއަކަށް ސޮބާހު އެތެރެއަށް ވަންގޮތުން އިވްލީނަށް ސިހުމެއް ލިބުނެވެ. ******** ސޮބާހު އިވްލީންގެ ފައިދަށަށް ތިރިވީ ކުށްވެރިއަކު ފަދައިންނެވެ. އޭނާގެ ދެލޮލުން އަންނަމުންދިޔަ ކަރުނަތަކުން ކޯތާފަތް ތެމެން ގިނައިރެއް ނުނެގިއެވެ. އިވްލީންގެ ހިތުގައި ދިލަ ރިހުމެއް އުފެދުނެވެ. އޭނާ ދެކުނީ ސޮބާހަކީ ގާތް އެކުވެރިއެއްގެ ގޮތުގައެވެ. އެހެނަސް، އެއީ ހަމައެކަނި އިވްލީން ދެކުނު ގޮތެވެ. އެންމެ ފުރަތަމަ ދުވަހުން ފެށިގެންވެސް ސޮބާހުގެ ވިސްނުން ތަފާތެވެ. މިއަދު ކުށްވެރިއެއްހެން ސޮބާހު އޭނާގެ ކުރިމަތީގައި އިނުމުން، އެމަންޒަރު ބަލަން އިވްލީނަށް ފަސޭހައެއް ނުވިއެވެ. "މިއަދު ތިހެން އިނުމުގެ އެއްވެސް މާނައެއް ނެތް... ތެދުވޭ!... ހަމަ މިހާރު..." އިވްލީނާއި ސޮބާހުގެ ދެމެދަށް ވަންނަމުން ރިމްޝާ ބުނެލިއެވެ. "އީވް ދޭ..." އިވްލީން ހިނގައިގަތެވެ. ރިމްޝާގެ އަޑު ގަދަވެގެން އާކިލްވެސް އައެވެ. ސޮބާހު ފެނުމުން، އާކިލްގެ މޫނު ބަނަވެގެން ދިޔައެވެ. "އަހަންނަށް ރުޅި އިސްކުރެވުނީ..." ކުރެހިފައިވާ އަޑަކުން ސޮބާހު ބުންޏެވެ. އިވްލީންގެ ފިޔަވަޅުތައް މަޑުޖެހުނެވެ. އާކިލް އިވްލީންގެ އަތުގައި ހިފައިލިއެވެ. "އަހަރެން ހީކުރީ، އީވްގެ އެއްޗެއްސަށް ގެއްލުންދީގެން އަހަރެންގެ ހިތަށް ހަމަޖެހުމެއް ލިބޭނެކަމަށް... އީވްގެ ހިތުން އާކިލްގެ ނަން ފޮހެލައިގެން، އަހަންނަށް އީވް ހާސިލުކުރެވިދާނެކަމަށް... އެކަމަކު..." އިވްލީންގެ ގޭގެ ބޭރުގައި ހުރި މިރާހް ފާރުގައި ލެނގިލިއެވެ. ގޭގެ ދޮރު ހުޅުވާފައި ހުރިއިރު، އެތެރެއިން ސޮބާހު ދައްކަމުންދިޔަ ވާހަކަ އޭނާއަށް އަޑު އިވެއެވެ. މިއަދު އިވްލީންގެ ކުރިމައްޗަށް އަރާނެ ހިތްވަރެއް މިރާހުގެ ގަޔަކު ނެތެވެ. އޭނާ އެންމެ އިތުބާރުކުރި އެންމެން ކެހި ދީފިއެވެ. "ކުރިންވެސް އީވްމެން ދުރުކުރީ ސޮބާހެއްނު... އެކަމަށް އައިޑިއާ ދިނީ ޝައުކަތު..." ރިމްޝާ ހަގީގަތް އެނގޭކަން އަންގައިލިއެވެ. "އަހަރެމެންނަށް މިހާރު ހަގީގަތް އެނގެޔޭ... ދެން އިތުރަށް ކޮންމެހެން ތިވާހަކަ ދެއްކުމުގެ މާނައެއް ނެތް..." ސޮބާހު އިސްޖަހައިލިއެވެ. މާޒީގައި އިވްލީނާއި އާކިލް ދުރުކުރީ ސޮބާހެވެ. ސޮބާހު ޖެހި މަޅިފަތީގައި އާކިލް ޖެހުނީއެވެ. އިވްލީންގެ ގޭގައި، ކޮޓަރިތެރޭގައި ސޮބާހާއި އިވްލީން ތިއްބައި، އާކިލްއަށް ފެނުނީއެވެ. އާކިލް ހީކުރީ ސޮބާހާއި އިވްލީންގެ ދެމެދުގައި ލޯބީގެ ސިއްރު ގުޅުމެއް އޮންނަ ކަމަށެވެ. ސޮބާހު އާކިލްއަށް ދައްކުވައިދިނީވެސް އެމަންޒަރެވެ. އާކިލްއަށް ފެންނަ ތަންތަނުގައި އިވްލީނާއި ގާތްވުންފަދަ ކަންކަން އޭނާ ކުރީ، ދެމީހުން ދުރުކުރުމުގެ ބޭނުމުގައެވެ. "އެދުވަހުވެސް އީވްގެ ކޮޓަރިއަށް ސޮބާހު ވަނީ، ފޮތެއް ބަލައޭ ކިޔާފައެއްނު... އެއީ ތިދެމީހުންގެ ދެމެދުގަ ގުޅުމެއް އޮންނަކަން އާކިލްއަށް ދައްކަން ސޮބާހު ގަސްދުގަ ކުރި ކަމެއްނު..." ސޮބާހު އެއްޗެއް ނުބުނެ އިންނަން ފެށުމުން ރިމްޝާގެ ރުޅި އިތުރަށް ގަދަވިއެވެ. "އާކިލްއަށް އެމަންޒަރު ދެއްކި މީހަކީ ޝައުކަތު.... ބުނެބަލަ މީ ދޮގެކޭ..." "ތެދު... ތީ ހުސް ތެދު..." ސޮބާހު އެއްބަސްވިއެވެ. "އަހަންނަށް އެނގޭ އަހަންނަށް ވަރަށް ގިނަ ކުށް ކުރެވުނުކަން... އެކަމަށް މާފު ހައްގު ނުވާކަންވެސް... އެކަމަކުވެސް އަހަރެން އީވްގެ މާފު ބޭނުން... އާކިލްގެވެސް..." އިވްލީން ފަސްއެނބުރި ސޮބާހަށް ބަލައިލިއެވެ. އެދެލޮލުން ފެނުނީ ވަރުބަލިކަމެވެ. އާކިލް އެއްޗެއް ބުނަން އުޅުމުން އިވްލީން އަތުގެ އިޝާރާތުން އެކަން މަނާކުރިއެވެ. "ގަސްދުގަ މީހަކަށް ގެއްލުމެއް ދީފިއްޔާ، އެމީހެއްގެ ދިރިއުޅުމުގަ ފަޅުކަމާ، ހުސްކަން ނޫން އެއްޗެއް ނުވާނެ ދުވަހެއް އަންނާނެ..." އިވްލީން ބުނީ މާނަފުން ޖުމުލައެކެވެ. "އުފާކުރަން ސޮބާހަށް ވިސްނުނީތީ..." އިވްލީންމެން ދިޔުމުންވެސް ސޮބާހު އެ އިންގޮތަށް އެތައް އިރަކު އިނެވެ. އޭނާގެ ދެލޮލުން އަންނަމުންދިޔަ ކަރުނަތަކަށް ހުއްޓުމެއް ނައެވެ. އެއްޗެއް ހާސިލުކުރުމަށް ގޯސް މަގެއް ހިޔާރުކޮށްފިނަމަ، އޭގެ ބަދަލު ލިބޭނީ ހިތި ގޮތަކަށް ކަން އޭނާއަށް ކުރިން ވިސްނައިނުލެވުނީއެވެ. ******** ތަހުގީގީ މަރުހަލާ ނިމި، ކުށްވެރިންނަށް ހައްގު އަދަބު ދިނުމަށް ހުކުން ކުރެވުނެވެ. ޝައުކަތުގެ ވަޒީފާ ގެއްލުނެވެ. ގެއްލުމުގެ ބަދަލެއްގެ ގޮތުން އެތައް ފައިސާއެއް ދައްކަން ޖެހުނެވެ. ޝައުކަތު ކޯޓުން ނުކުތްއިރު، މިރާހު ބޭރުގައި މަޑުކޮށްލައިގެން ހުއްޓެވެ. "އަހަރެން މަސައްކަތްކުރީ ހަމައެކަނި އަހަރެންގެ ފައިދާއަކަށް ނޫން..." މިރާހާއި އަރާ ހަމަވެފައި ޝައުކަތު ބުނެލިއެވެ. "ހުރިހާ ކަމެއްގެ ކޮންޓްރޯލް ނަގަން އުޅުމުގެ ހިތި ނަތީޖާ ނުކުންނާނީ މިކަހަލަ ގޮތަކަށް..." މިރާހް ބުނެލީ ވިސްނައިދޭ ކަހަލަ ރާގަކަށެވެ. ޝައުކަތު އިސްޖަހައިލިއެވެ. އެހުރިހާ ދުވަހު އާރާއި، ބާރާއި، ނުފޫޒުގެ ބޭނުން ހިފައިގެން ނަހަމަގޮތުގައި ކަންކަން ކުރިޔަސް، މިއަދު އޭނާއަކީ ނިކަމެއްޗެކެވެ. އާރާއި ބާރެއް ނެތެވެ. މުއްސަނދި ދިރިއުޅުން ބަދަލުވާން ނެގީ މަދު ވަގުތުކޮޅެކެވެ. އަމިއްލަ މައިންބަފައިން ފަހުރުވެރިވި މަގާމު ގެއްލިއްޖެއެވެ. މިއަދު އޭނާއަކީ އަމިއްލަ ދަރިއެކޭ ބުނަން އެމީހުން ލަދުގަނެއެވެ. ގެންގުޅުނު އެކުވެރިން ގެއްލިއްޖެއެވެ. އެހީތެރިކަމަށް ބޭނުންވިއިރު، ކައިރީގައި އެކަކުވެސް ނެތެވެ. މަތީ މަގާމެއް ލިބުމަކީ ފަހުރުވެރިވާންޖެހޭ ކަމެއް ނޫނެވެ. ފަހުރުވެރިވާންވީ، އެ މަގާމުގެ ބޭނުން ހެޔޮގޮތުގައި ހިފަން އެނގޭނަމައެވެ. ގިނަފަހަރު އާރާއި، ބާރު ލިބުމަކީ މީހާގެ ހަލާކެވެ. ******** ކެފޭގެ ދޮރު ހުޅުވައިލުމާއިއެކު، އިވްލީންގެ މެޔަށް ފިނިވެގެން ދިޔައެވެ. އެތައް ދުވަހަކަށްފަހު، ކެފޭ އަލުން ހުޅުވީ ކުރިއަށްވުރެ ފުރިހަމައަށް ހިދުމަތް ދެވޭނެ އިންތިޒާމްތައް ހަމަޖައްސާފައެވެ. ކާތަކެތި ތަރުތީބުކުރަން ހުރި އިވްލީންގެ ތުންފަތުގައިވީ ލުއި ހިނިތުންވުމެކެވެ. އާކިލްގެ އެހީތެރިކަމާއިއެކު، ކެފޭ ހިންގުމަކީ އިވްލީން އެންމެ ކުރިއްސުރެ ދެކެމުން އައި ހުވަފެނެކެވެ. މިއަދު ފެންނަމުންދަނީ އެ ހުވަފެނުގައި ކުލަޖެހެމުންދާ ތަނެވެ. ދޮރު ހުޅުވުނު އަޑަށް އިވްލީން ދޮރާއި ދިމާއަށް ބަލައިލިއެވެ. އެތެރެއަށް ވަދެގެން އައި ސާލިޔާގެ މޫނުމަތިން ފެނުނީ ހަމަޖެހުމުގެ އަސަރެވެ. "އެސޮރުގެ މަންމަމެން އެބަތިބި ބޭރުގަ..." ސާލިޔާ އިޝާރާތްކުރީ ކެފޭގެ ބޭރުގައި ތިބި އާކިލްގެ މައިންބަފައިންނަށެވެ. "ބޮޑުދައިތަ ކީއްވެ އެމީހުން ކައިރީ އެތެރެއަށް ވަންނަން ނުބުނީ؟..." އިވްލީން އުޅުނީ ބޭރަށް ނުކުންނާށެވެ. "އެސޮރު އަންނަންދެނޯ މަޑުކޮށްގެން ތިބީ..." ސާލިޔާ ތަފްސީލް ދިނެވެ. "އެންމެފަހުން ކައިވެނި ހަމަޖެހުނީއޭ ދޯ... ލައިގަނެގެން އުޅުނު ބަލިގަނޑުވެސް ރަނގަޅުވީ... އޭރުވެސް ބުނީމެއްނު، ތި ފަށަކީ ދެލޯބިވެރިން ގުޅުވާ އެއްޗެކޭ..." "ދެން ބޮޑުދައިތާ... ތިކަހަލަ ކަންކަން ގަބޫލުކުރާކަށް ނުވާނެ..." ސާލިޔާގެ ވާހަކަ ގަބޫލުކުރާކަށް އިވްލީން ބޭނުމެއް ނުވިއެވެ. "އަހަރެން މި ފަށަށް ލޯބިކުރަނީ މީ މަންމަ ލޯބިކުރި އެއްޗަކަށްވީމަ... ބަލި ރަނގަޅުވީ ޑޮކްޓަރަށް ދައްކައިގެން އެކަމަށް ފަރުވާކުރީމަ...." "އިވްލީން މާ ފަރުވާކުޑައީއޭ... ކަމެއްވިޔަސް ޑޮކްޓަރަށް ނުދައްކާ ހުންނަނީ... މިހާރުވެސް ކުރިން ދިމާވި ކަންތައް ދިމާވޭތަ؟... ފަށުން ހޫނުކަން އިހުސާސްވޭތަ؟..." އެއްޗެއް ޔަގީންކޮށްލާ ފަދައިން ސާލިޔާ އަހައިލިއެވެ. ނޫނެކޭ ބުނުމުގެ ގޮތުން އިވްލީން ބޯ ހޫރައިލިއެވެ. "އަހަނ!... ބޮޑުދައިތަވެސް އެބަހުރިންދޯ..." އެތެރެއަށް ވަން އާކިލްއަށް ސާލިޔާ ފެނުމުން، މަޖާ ރާގަކަށް ބުނެލިއެވެ. އާކިލްގެ ފަހަތުން ވަން އާޒިމާ އާއި ޝުކޫރު ފެނި، އިވްލީންގެ އަތްފައި ފިނިވިއެވެ. އަދިވެސް އިވްލީނަށް ހީވަނީ އާކިލްގެ މައިންބަފައިން އޭނާއާއި ދެކޮޅު ހެންނެވެ. އިވްލީންގެ ކުރިމަތީގައި އާކިލްގެ މައިންބަފައިން ފެހި ސިގުނަލެއް ދީފައި ނުވާތީއެވެ. އިވްލީނަށް ބަލަން އިރުކޮޅަކު ހުރުމަށްފަހު، އާޒިމާ ކުރިއަށް ޖެހިލިއެވެ. އޭނާ މިފަހަރު މާލެއިން އައީ ފަހުގޮތް ނިންމައިގެންނެވެ. "ތިވަރުގެ ހިތްވަރުގަދަ އަންހެން ކުއްޖަކު އަހަރެން އަދި ނުދެކެން..." އާޒިމާ ބުނެލިއެވެ. "އޭނ؟..." އިސްޖަހައިގެން ހުރި އިވްލީނަށް އާޒިމާއަށް ބަލައިލެވުނީ ހައިރާންވެފައެވެ. އޭގެ ކުރިން އެހާ ގާތްކޮށް ވާހަކަ ދައްކާފައިނުވާ އާޒިމާ މިއަދު ހުރީ ފުޅާ ހިނިތުންވުމެއް ތުންފަތަށް ވެރިކުރުވައިގެންނެވެ. އެއީ ހަމަ އާކިލްގެ މަންމަ އާޒިމާ ހެއްޔެވެ؟ ޝުކޫރުގެ މޫނުންވެސް ފެންނަން ހުރީ ގާތް ގޮތެކެވެ. އިވްލީނަށް ގަބޫލުނުކުރެވިގެން އާކިލްގެ މޫނަށް ބަލައިލިއެވެ. އާކިލް ހުރީ ފުޅާ ހިނިތުންވުމެއް ތުންފަތަށް ވެރިކުރުވައިގެންނެވެ. މަންމަގެ ތައުރީފުން އޭނާގެ ހިތަށް ބުނެދޭން ނޭނގޭ އުފާވެރިކަމެއް ލިބުނެވެ. އިވްލީން ރަކި ގޮތަކަށް ހިނިތުންވެލުމަށްފަހު އަވަސްއަވަހަށް އިސްޖަހައިލިއެވެ. "މަންމަމެން ކައިރީ އޭރުވެސް ބުނީމެއްނު މީ ވަރަށް ސްޕެޝަލް ކުއްޖެކޭ... އަދި ޔަގީން އީވް ކައިރީ ދުވަސްކޮޅަކު އުޅެފިއްޔާ މަންމަގެ ހިތް ފުރިގެން ބަންޑުންވާނެކަން..." އާކިލް އިވްލީންގެ އަތުގައި ހިފައިލިއެވެ. އިވްލީން އަތް ދަމައިގަންނަން އުޅުނު ނަމަވެސް، އާކިލް ކުރިއަށްވުރެ ބާރަށް އިވްލީންގެ އަތުގައި ހިފައިލިއެވެ. އެމަންޒަރު ފެނުމުން، ޝުކޫރު އަވަސް އަވަހަށް އާޒިމާ ގޮވައިގެން މޭޒާއި ދިމާއަށް ހިނގައިގަތެވެ. އޭރުވެސް އާކިލްގެ ވާހަކަ މަޖާވެގެން އާޒިމާ ހެނީއެވެ. އިވްލީންގެ މަޑުމައިތިރި މިޒާޖާއި، ރިވެތި އަހުލާގުން އާޒިމާގެ ހިތް ފަތަހަކުރަން ނެގީ މަދު ދުވަސްކޮޅެކެވެ. ނިކަމެތިވިޔަސް، އިވްލީންގެ ގައިގައި އާޒިމާ ބޭނުންވާ އެތައް ސިފައެއް ހުއްޓެވެ. ގެވެހިކަމާއި ރިވެތި އަހުލާގެވެ. އެންމެން އެކުގައި ކޮފީބޯން ތިބިއިރު، ކޮންމެ މީހެއްގެ މޫނުންވެސް ފެންނަމުން ދިޔައީ އުފާވެރިކަމެވެ. އެ ދަތުރު އާޒިމާ އައީ އެންމެ ބޭނުމެއްގައެވެ. އެއީ އިވްލީނާއި އާކިލްގެ ކައިވެނީގެ ކަންކަން ހަމަޖެއްސުމެވެ. "މަންމަ އޭރު ހީކުރީ ހުރިހާވެސް އުފަލަކީ ފައިސާ ކަމަށް..." އާޒިމާ އޭނާ ބޭނުންވި މައުޟޫޢަށް ވާހަކައިގެ މިސްރާބު ބަދަލުކޮށްލިއެވެ. "އެކަމަކު، ހަގީގީ އުފަލަކީ ހަރުދަނާ އާއިލާއެއް ބިނާކުރެވުން... މަންމަ އަތުގަ މުދަލާއި ފައިސާ އެބަހުރި... ނެތީ އެންމެ އެއްޗެއް، އުފާވެރި އާއިލާއެއް... ގޭތެރޭ ހީ ސަކަރާތް ޖަހާލާނެ ކުދިބަޔަކު... މަންމަ ބޭނުން މާމަ ކިޔާނެ ދަރިން... ގޭތެރޭގެ ފަޅުކަން މި އިހުސާސްވަނީ މާ ބޮޑަށް.... ދަރިފުޅުމެން އެކަން ކޮށްދޭންވީނު..." އިވްލީނާއި އާކިލްވެސް ތިބީ ކައިވެނީގެ ވާހަކަ ދައްކަން ބޭނުންވެފައެވެ. އެކަމަކު އާޒިމާ އެހާ ފާޅުކަންބޮޑު ގޮތެއްގައި އެވާހަކަ ދެއްކުމުން، އިވްލީން އިނީ ލަދުން މޮޔަވާވަރު ވެފައެވެ. "އަހަރެމެން ދެމީހުންވެސް ބޭނުންވަނީ އަވަހަށް މެރީކުރަން..." އާކިލް ބުނެލިއެވެ. އާކިލް މޭޒުގެ ދަށުން އިވްލީންގެ އަތުގައި ހިފައި، އަތަށް ފިތައިލިއެވެ. އިވްލީންގެ ދެކޯތާފަތް ލަދުން ރަތްވާން ނެގީ ހިނދުކޮޅެކެވެ. ******* ފުރޮޅުލީ ގޮނޑީގައި އިން މަހުމޫދުގެ ނަޒަރު ހުއްޓިފައިވީ، ކުރިމަތީގައި ހުރި އޭނާގެ ދަރިފުޅަށެވެ. ކައިވެނީގެ ހުދު ހެދުމުގައި އިވްލީން ހީވަނީ ހޫރު ޕަރީއެއް ހެންނެވެ. އިވްލީންގެ ހިނިތުންވުމާއި އުފާވެރިކަން ފެނި މަހުމޫދުގެ ހިތް އުފަލުން ފުރިގެން އައެވެ. މަރުވުމުގެ ކުރިން އެދުވަސް ފެނިދާނެކަމަށް އޭނާ ކުޑަކޮށްވެސް އުއްމީދެއް ނުކުރެއެވެ. މަހުމޫދުގެ ދެލޯ ކަރުނުން ފުރުނެވެ. އެދުވަސް ދެކެން މަމްދޫހާ ދުނިޔޭގައި ހުރިނަމައޭ އޭނާގެ ހިތަށް އެރިއެވެ. އަތިރިމަތީގެ ހިތްގައިމު މާހައުލު ތައްޔާރު ކުރެވިފައިވީ، ކައިވެނީގެ ހާއްސަ ހަފުލާއަށެވެ. އިވްލީނާއި، އާކިލް ހުރީ އެމީހުންނަށް ހާއްސަކޮށްފައިވާ ސަރަހައްދުގައެވެ. ކުލަބޮކިތަކުން މުޅި ތަން އަލިކޮށްފައިވާއިރު، އަތިރިމައްޗަށް ބީއްސަމުންދިޔަ ރާޅުތަކުގެ އަޑު އިވިއިވި ހުރީ ހިތްގައިމު މިއުޒިކެއް ފަދައިންނެވެ. އާކިލް އިވްލީންގެ އުނަގަނޑުގައި އަތް އަޅުވައި، ގާތަށް ދަމައިލިއެވެ. އިވްލީން ހާސްވެގެން ދުރަށްޖެހެން އުޅުނެވެ. "ތީ މިހާރު އަހަރެންގެ ހައްގެއް..." އާކިލް ބުނެލީ އިވްލީންގެ ކަންފަތް ކައިރީގައި ވައި އަޑުންނެވެ. "ބައްޕަމެން އެތިބީ ބަލަން..." އިވްލީން ތެޅިފޮޅިގަތެވެ. "ބައްޕަވެސް ބުނާނީ، މި ލޯބިލޯބި ކުއްޖާއަށް ލިބިފަ ހުރީ، ހާދަ ލޯބިވާ ފިރިއެކޭ..." އާކިލް ސަމާސާ ކޮށްލިއެވެ. އިވްލީނަށް ހެވުނެވެ. އާކިލްގެ އަމަލުތަކުން އިވްލީންގެ ތުންފަތަށް ހިނިތުންވުން ގެނުވަނީ ހުދު އޭނާގެ އަމިއްލަ ނަފުސަށްވެސް އެނގުމެއް ނުވާފަދަ ގޮތަކަށެވެ. މަހުމޫދާއި ވާހަކަ ދައްކަން ހުރި ރިމްޝާގެ ދެލޯ ހޯދަމުންދިޔައީ މިރާހެވެ. މިރާހް ހުރީ ކެފޭގައެވެ. އިވްލީންމެންގެ ކައިވެނީގެ ހަފުލާއަށް އައިސް ތިބި މެހެމާނުންނަށް ހިދުމަތް ކުރުމުގައެވެ. ޖޫސް ތަބަކެއް ހިފައިގެން ނުކުތް މިރާހްގެ ފިޔަވަޅުތައް ހުއްޓުނީ ރިމްޝާ ފެނުމުންނެވެ. ރަތްކުލައިގެ ވިދާ ހެދުމެއްގައި ރިމްޝާ ފެންނަނީ ނުހަނު ހިތްގައިމުކޮށެވެ. "ހާއި..." މިރާހް ފެނުމުން ރިމްޝާ އަތުން ހަނާ އަޅައިލިއެވެ. މިރާހް އެއްޗެއް ނުބުނެ، ޖޫސްތަށިތައް މޭޒުމަތީގައި އަތުރާފައި ކެފޭއަށް ވަންނަން ދިޔައެވެ. "އީވް ކައިރިއަށް ނުދާނަންތަ؟..." ޝަކުވާގެ ރާގަކަށް ރިމްޝާ އަހައިލިއެވެ. "މިރާހް ތިހާ ދުރުން އުޅުނީމަ އީވް ކިހާ ދެރަވާނެ... މިހާ ދުވަހު މާލޭގަ އުޅެފަ މިއަދު ރަށަށް ތި އައީ... ހިނގާ އަހަންނާއެކީ އީވްއާ މީޓްކުރަން..." "ނޯ..." މިރާހް ވަގުތުން ދެކޮޅު ހެދިއެވެ. "ކޮން ނޯ އެއް..." ރިމްޝާ ދެލޯ ހަނިކޮށްފައި މިރާހުގެ އަތުގައި ހިފިއެވެ. ތަބަށް އަތުލިއެވެ. "ނުގޮއްސިއްޔާ، އަހަރެމެންގެ ފްރެންޑްޝިޕްވެސް ނިމުނީ..." ރިމްޝާ ހިނގައިގަތުމުން، މިރާހަށް ރިމްޝާގެ އަތުގައި ހިފައިލެވުނެވެ. އެއީ އަމިއްލަ އިހުތިޔާރުން ބޭރުގައި މިރާހަށް ކުރެވުނު ކަމެކެވެ. (ނުނިމޭ)