ވޮޝިންޓަން (3 މާޗް 2026) : އެމެރިކާއާއި އިސްރާއީލުން އީރާނުގެ އަސްކަރީ އަދި މަދަނީ އަމާޒުތަކަށް އާދަޔާ ޚިލާފަށް ހަމަލާތައް ދެމުންގެންދާއިރު އަދި އީރާނުގެ ހަމަލާތައް މަތަކުރުމަށްޓަކައި ދިފާއީ މިސައިލްތައް އިންތިހާއަށް ބޭނުންކުރަމުން ގެންދާއިރު ހަނގުރާމައިގެ ހާލަތު ދިގު ދެމިގެންދާނަމަ އެމެރިކާއާއި އިސްރާއީލުން ދިފާއީ ހަތިޔާރު މަދުވެ ނޫނީ ހުސްވެދާނެކަމުގެ ބިރު އެބައޮތްކަމަށް އެމެރިކާގެ އަސްކަރީ މަސްދަރަކާ ހަވާލާދީ ވޮޝިންޓަން ޕޯސްޓް ބުނެފިއެވެ. ވޮޝިންޓަން ޕޯސްޓްގެ މި ޚަބަރު ބުނާގޮތުން އެމެރިކާގެ ހަނގުރާމައާބެހޭ ވުޒާރާ ޕެންޓަގަން އެންމެ ކަންބޮޑުވަނީ އީރާނުގެ ޑްރޯންތަކާއި ބަލިސްޓިކް މިސައިލްތައް ވައްޓާލުމަށް ބޭނުންކުރާ ދިފާއީ މިސައިލްތައް ހުސްވެދާނެތީއެވެ. މިއާއެކު އެތެކެތި ބޭނުންކުރާ މިންވަރު މިހާރުވެސް މަދުކުރަން ޖެހިފައިވާ ކަމަށް މި ނޫސް ބުނެއެވެ. އެމެރިކާގެ ދިފާއީ މިސައިލްތައް ހަތަރު އަހަރުވަންދެން ޔުކްރެއިންއަށް ދިނުމާއި ދެ އަހަރުވަންދެން އިސްރާއީލަށް ތަކުރާރުކޮށް ދޭންޖެހުމުގެ ސަބަބުން އޭގެ ސްޓޮކްގެ ބޮޑުބައެއް މަދުވެފައިވާކަން ވޮޝިންޓަން ޕޯސްޓްގެ ރިޕޯޓްގައި ފާހަގަކޮށްފައި ވެއެވެ. ވައިގެ ދިފާއުގައި ބޭނުންކުރާ އެންޓި ޑިފެންސް މިސައިލް ތަކަކީ ގިނަ ދުވަހުން އުފެއްދޭ ވަރަށް އަގުބޮޑު މިސައިލްތަކެކެވެ. އީރާނުން ފޮނުވާ މިސައިލްތައް އެހާ ގިނަ ނަމަވެސް ޑްރޯންތައް އިންތިހާއަށް ގިނައެވެ. އެތަކެތި ވައްޓާލުމަށް ބޭނުންކުރަން ޖެހެނީ މިދެންނެވި އަގުބޮޑު އަދި ދިގުމުއްދަތަކުން އުފެއްދޭ ދިފާއީ މިސައިލް ތަކެވެ. އަސްކަރީ ތަޖުރިބާކާރުން ވިދާޅުވާގޮތުގައި އީރާން ގެންގުޅޭ ކަމަށް ބެލެވެނީ އެމެރިކާއާއި އިސްރާއީލުގެ ހަމަލާތަކުން އެ ގައުމަށް ކިތަންމެ ގެއްލުމެއް ލިބުނު ނަމަވެސް ހަނގުރާމަ ދަންމާލުމުގެ ސިޔާސަތެކެވެ. އަދި އީރާން ބޭނުންކުރަނީވެސް މިސައިލްގެ ބަދަލުގައި ގިނައިން ޑްރޯން އެވެ. ޑްރޯން ގިނައިން ބޭނުންކުރަނީ އެތަކެތި ވައްޓާލުމަށް އެމެރިކާއާއި އިސްރާއީލުން ދިފާއީ މިސައިލްތައް ބޭނުންކުރާނެތީއެވެ. ބޭނުމަކީ މިގޮތަށް ބޭނުންކުރުވައިގެން އެމެރިކާއާއި އިސްރާއީލުގެ ދިފާއީ މިސައިލްތަކުގެ ސްޓޮކް ހުސްކުރުވުމެވެ. ދިފާއީ މިސައިލްތަކަކީ ދިގުމުއްދަތަކުން ނޫނީ އުފެއްދޭ އެއްޗަކަށް ނުވާތީ މީގެ ސްޓޮކް އިތުރުކުރުމަކީ ފަސޭހަ ކަމެއްނޫނެވެ. ދިފާއީ މިސައިލްތައް މަދުވެއްޖެނަމަ އީރާނުން ދޭ ހަމަލާތައް އިސްރާއީލަށާއި ގަލްފުގެ ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް މިހާރަށް ވުރެގިނައިން އަރާނެއެވެ. ނަތީޖާއަކީ އީރާނުގެ މިސައިލް ހަމަލާތަކުން ލިބޭ ގެއްލުންތައް އިންތިހާއަށް ބޮޑުވެގެން ދިޔުމެވެ. ނަމަވެސް މި ނޫސް ބުނާގޮތުން އެމެރިކާއާއި އިސްރާއީލުގެ މަގްސަދަކީ އޭގެކުރިން އީރާނުގެ މިސައިލް ކާރުޚާނާތަކާއި މިސައިލްތަކުގެ ސްޓޮކް ހުރި ތަންތަނަށް ހަމަލާދީ މިސައިލްތައް ހަލާކުކޮށްލުމެވެ. އީރާނުގެ މިސައިލް ކާރުޚާނާ ތަކާއި މިސައިލްތަކުގެ ސްޓޮކްގެ ބޮޑުބައި ހުރީ ފަރުބަދަތަކުގެ އަޑީގައި ކަމުން މިއީ ފަސޭހައިން ކުރެވޭނެ ކަމެއް ނޫންކަމަށްވަނީ ބެލެވިފައެވެ. ނަމަވެސް ބައެއް ކަރުޚާނާތަކާއި މިސައިލްތައް ހަލާކުކޮށްލެވިދާނެއެވެ. އެމެރިކާއާއި އިސްރާއީލުން އިއްޔެ އާއި ރޭގައި ވަނީ އީރާނުގެ ނުވަ ހޮސްޕިޓަލަކާއި ބައެއް ސްކޫލްތަކަށާއި އަސްކަރީ އެތައް މަރުކަޒަކަށާއި އާންމުންގެ ގެދޮރަށް ގަދަފަދަ ހަމަލާތަކެއް ދީފައެވެ. މީގެއިތުރުން އީރާނުގެ ރަސްމީ ޓީވީ ސްޓޭޝަނަށްވެސް ވަނީ ހަމަލާތަކެއް ދީފައެވެ. ރައްދުގައި އީރާނުންވަނީ އިސްރާއީލުގެ ބޮޑުވަޒީރުގެ އޮފީހަށާއި ޓެލްއަވީވުގެ މެދުތެރޭގައިވާ އިމާރާތްތަކަށާ އަދި އިސްރާއީލުގެ ތިން ތަނެއްގައިވާ އަސްކަރީ ބޭސްތަކަށް ވަރުގަދަ ހަމަލާތަކެއް ދީފައެވެ. މިތަންތަނަށް ލިބުނު ގެއްލުންތަކުގެ ތަފްސީލާއި އިސްރާއީލުން މަރުވެ ޒަޚަމްވި މީހުންގެ އަދަދު އިސްރާއީލުން ސިއްރުކޮށްފައިވާކަމަށްވަނީ ބެލެވިފައެވެ. މީގެއިތުރުން އީރާންވަނީ ބަހްރައިން އާއި ކުވައިތު އަދި ގަތަރާއި ސައޫދީ ގައި ހުންނަ އެމެރިކާގެ އަސްކަރީ މަރުކަޒުތަކަށް ވަރުގަދަ ހަމަލާތަކެއް ދީފައެވެ. ގަލްފުގެ ގައުމުތަކުގައިވާ އެމެރިކާގެ އަސްކަރީ މަރުކަޒުތައް އީރާނުގެ ހަމަލާތަކުން ދިފާއުކޮށް ދިނުމުގައި އެމެރިކާގެ އަސްކަރިއްޔާ ވަނީ ފެއިލް ވެފައެވެ. މީގެއިތުރުން ގަލްފުގެ އަރަބި ގައުމުތަކުގައި ހަރަކާތްތެރިވާ އެމެރިކާގެ ސިފައިންނާއި އެމީހުންގެ އާއިލާތައް ތިބޭ ގެތަކާއި ހޮޓާތަކާއި އެޕާޓްމަންޓްތަކަށްވެސްވަނީ ވަރުގަދަ ހަމަލާތަކެއް ދީފައެވެ.