ދާދިފަހުން އަހުރެންނަށް ގުޅި އަންހެނަކު ބުނީ ކައިވެނީގެ ފުރަތަމަ ދުވަހުން ފެށިގެން އޭނާއަށް އަނިޔާކުރަމުން އަންނަ ކަމަށެވެ. އެންމެ ބޮޑަށް ޙައިރާންވީ އެއްދާންކުރަން އެދުމުގެ ކުރިންވެސް އަނިޔާކުރާތީއެވެ. މީހަކަށް އަނިޔާކޮށް ތަދު އިޙްޞާޞްކުރަން ޖެއްސެވުމަށްފަހު އޭނާގެ ކިބައިން އުފާވެރިކަމަށް އެދުމުން ލިބޭނީ ކޮން އުފާވެރިކަމެއް ހެއްޔެވެ؟ 
ދެން އެންމެ ޙައިރާންވި ކަންތައްތަކުގެ ތެރޭގައި އެޙާލުގައި އުޅެމުން 3 ދަރިން ލިބިފައިވާ ކަމމާއި މިހާރުވެސް އިނީ ބަލިވެކަމާއި އަނިޔާވެރިކަމުން ސަލާމަތްވާން އެހީތެރިވެދިނުމަށް މައިންބަފައިންގެ ގާތުގައި އެދުމުން "ތިއައީ ދިރިއުޅުމުގެ ބައެއް" ކަމަށް ބުނެ އެހީތެރިނުވުން ހިމެނެއެވެ. 
އަހުރެން ބުނާނީ މިފަދަ މީހުންނަކީ ފަރުވާއަށް ވަރަށް ބޮޑަށް ބޭނުންވެފައިވާ ބައަކު ކަމަށެވެ. އެހެންކަމުން ކޮންމެވެސް ބައަކު އެކަމުގައި މެދުވެރިވާން އެބަޖެހެއެވެ. އެކަމަށް އެންމެ ޙައްޤުކަންބޮޑީ އޭނާގެ ޢާއިލާއެވެ. (ފިމީހާގެ ޢާއިލާއެވެ.) ވީމާ އަނބިމީހާގެ ޢާއިލާއިން އޭނާގެ ޢާއިލާއާއި ބައްދަލުކުރަންޖެހޭނެއެވެ. ހައްލުހޯދަން މަސައްކަތްކުރަންޖެހޭނެއެވެ. "ތިއައީ ދިރިއުޅުމުގެ ބައެއް" ކަމަށް ބުނެ ދޫކޮށްލުމަކީ ދަރިފުޅު މަރުވާން ދޫކޮށްލުން ކަމަށެވެ. 
މިޙާލަތުގައި އުޅެންޖެހިފައިވާ އަންހެނުންނަށް އަހުރެން އިލްތިމާސްކުރާނީ އެހެން ގޮތެއް ނެތި  މަގުމަތީގައި ސަލާންޖަހަން އުޅެންޖެހުނަސް މިފަދަ އަނިޔާއަށް ކެތްތެރިވެގެން ނުއިނުމަށެވެ. ފުރަތަމަ ކަމަކަށް މިފަދަ މައްސަލަތަކަށް އެހީތެރިވެދޭ ޖަމާޢަތްތަކާއި މަޝްވަރާކުރާށެވެ. ސަރުކާރުގެ ފަރާތްތަކަށްވެސް މައްސަލަ ހުށަހަޅާށެވެ. އެއްވެސް ގޮތަކުން ކުރިއެރުމެއް ނުލިބުނުނަމަ އަމިއްލަ ސަލާމަތްކުރެވެން އޮތް ގޮތަކުން ސަލާމަތްކުރާށެވެ!
 
- ތަޖުރިބާކާރު ޢިލްމްވެރިއެއްގެ ވާހަކަފުޅަކުން