އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާ (މޭރީ) މަރާލި ކަމަށް ތުހުމަތުކުރެވޭ އޭނާގެ ފިރިމީހާ، މާވިން އެސްވައި ވާގަސް ދިފާއުގައި ހުށަހެޅި ހަތަރު ހެކިވެރިއަކު ކޯޓަށް ހާޒިރުވާން ދިން ފަހު ފުރުސަތުގައި ވެސް ކޯޓަށް ހާޒިރުވެފައި ނުވާތީ، އެ މީހުންގެ ހެކިބަހާ ނުލައި މައްސަލަ ކުރިއަށް ގެންދަން ނިންމައި މައްސަލައިގެ ހެކިބަސް ނެގުން ނިންމާލައިފި އެވެ. 
ވީ ކިހިނެއް؟ - މާވިންގެ "ގުޑް ކެރެކްޓާ" ސާބިތުކުރުމަށް އޭނާގެ ފަރާތުން، ރާއްޖޭގައި ދިރިއުޅޭ ފިލިޕީންސް ފަސް މީހަކު ހެކިވެރިންގެ ގޮތުގައި ހުށަހަޅާފައިވެ އެވެ.
އެކަމަކު އޭގެ ތެރެއިން ކޯޓަށް ހާޒިރުވެ މިހާތަނަށް ހެކިބަސް ދީފައިވަނީ އެންމެ މީހެކެވެ. ބާކީ ތިބި ހަތަރު މީހުން ކޯޓަށް ހާޒިރުވެފައި ނުވާތީ އެ މީހުން ހާޒިރުކުރަން މިދިޔަ އާދިއްތަ ދުވަހު އޮތް އަޑުއެހުމުގައި ފަހު ފުރުސަތު ދީފައިވެ އެވެ.
ތަފްސީލް - މިއަދު 1 ޖަހާއިރު ބާއްވަން އޮތް އަޑުއެހުން ފެށުނީ 2:30 ވީ ފަހުންނެވެ.
އޭރު ވެސް ކޯޓަށް ހެކިވެރިން ހާޒިރުވެފައިނުވާތީ މާވިންގެ ވަކީލު އިސްމާއިލް މުހައްމަދު ވިދާޅުވީ، ހެކިވެރިން ކޯޓަށް ހާޒިރުކުރުމުގެ ކަންކަން ކުރަމުންދަނީ މާވިންގެ މަންމަ ކަމަށާއި އެ މީހުން ހާޒިރުކުރެވޭތޯ ވަރަށް މަސައްކަތްކޮށްފައިވާ ކަމަށެވެ. އެކަމަކު، އެމީހުން އެއްވެސްގޮތަކަށް ފޯނަށް ޖަވާބުނުދޭތީ، އިިތުރަށް ކޯޓަށް ހާޒިރުކުރެވިދާނެ ކަމަށް ނުދެކޭ ކަމަށް ވިދާޅުވި އެވެ.
އެހެންވެ، މިއަދު ނިންމީ އެ މީހުންގެ ހެކިބަހާ ނުލައި މައްސަލަ ކުރިއަށް ގެންދިއުމަށެވެ. އެ މީހުންގެ ހެކިބަސް ނުނަގަން ނިންމުމުން، ހެކިބަސް ނެގުމުގެ މަރުހަލާ ނިމިފައިވާތީ، ދެން އޮންނާނީ ހުލާސާ ބަޔާން އިއްވުމެވެ.
ހުލާސާ ބަޔާން ހުށަހެޅުމަށް އަންނަ މަހުގެ 14ގައި އިތުރު އަޑުއެހުމެއް ބާއްވަން ތާވަލުކުރުމަށް ފަހު މިއަދުގެ އަޑުއެހުން ވަނީ ނިންމާލާފަ އެވެ.
ފާހަގަކޮށްލެވޭ ކަމެއް - މިއަދުގެ އަޑުއެހުމުގައި މާވިން ވަނީ، ލޮލުގެ މައްސަލައެއްގައި ސިއްހީ ފަރުވާ ބޭނުންވާ ކަމާއި ސާޖަރީއެއް ހަދަން ކުރިން ދެއްކި ޑޮކްޓަރަކު އިރުޝާދު ދީފައިވާތީ، ސްޕެޝަލިސްޓެއްގެ އެހީތެރިކަން ބޭނުންވާކަން ފާހަގަކޮށް، ކަރެކްޝަނުން އެކަން ފަހިކޮށްދިނުމަށް ގިނަ ދުވަސްތަކެއް ނަގާތީ ކަންބޮޑުވުން ފާޅުކޮށްފަ އެވެ. ތަދުކަޑުވާ ބޭހަށް އެލާޖިކް ވާތީ، ތަދަށް ބޭސް ވެސް ނުނެގޭ ކަމަށާއި އެހެންކަމުން ސްޕެޝިއަލިސްޓެއްގެ އެހީތެރިކަން ވީހާ ވެސް އަވަހަކަށް ބޭނުންވާކަން އޭނާ ފާހަގަކުރި އެވެ.
ދައުލަތުން ބުނީ އެފަދަ އެއްވެސް ކަމެއް ޕީޖީގެ ސަމާލުކަމަށް މީގެ ކުރިން ގެނެސްފައިނުވާތީ އެކަން ހިނގާ ގޮތެއް ބަލާފައިނުވާ ކަމަށާއި ސިއްހީ ފަރުވާ އަވަސްކޮށްދިނުމުގެ ކަންކަން ކަރެކްޝަނާ ގުޅިގެން ކުރާނެ ކަމަށެވެ.
މއ. އުދުހޭކޮކާގޭގެ ފުރަތަމަ ފަންގިފިލާގައި ދިރިއުޅެމުން އައި މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްލައިގެން، 19 އޮކްޓޫބަރު 2021 ވަނަ ދުވަހު އޭނާ މަރާލާފައިވާ ކަމަށް ބުނާ މައްސަލާގައި ދައުލަތުން ދައުވާ އުފުލާފައިވަނީ:
މޭރީގެ ފިރިމީހާ މާވިންގެ މައްޗަށް؛ އެނގި ހުރެ މީހަކު މެރުމުގެ ދައުވާ  
މާވީން ލޯބީގެ ގޮތުން ގުޅިގެން އުޅޭ ކަމަށް ބުނާ އައިޖީއެމްއެޗުގެ ނަރުހެއް ކަމަށްވާ ލަމްހާގެ މައްޗަށް؛ އެނގި ހުރެ މީހަކު މެރުމުގައި ބައިވެރިވުން (އަސާސީ އަދަބަކީ ހަ އަހަރަށް ޖަލަށްލުން)
ލަމްހާގެ މައްޗަށް ކުރާ އިތުރު ދައުވާތައް - އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ (އަސާސީ އަދަބަކީ ދެ މަހާއި 12 ދުވަހަށް ޖަލަށްލުން) އަދި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުން (އަސާސީ އަދަބަކީ ދެ މަހާއި 12 ދުވަހަށް ޖަލަށްލުން) 
ދައުލަތުގެ ދައުވާތަކުގައި ބުނެފައިވާ ގޮތުން، މޭރީ މަރާލާފައިވަނީ އޭނާގެ ފިރިމިހާ މާވިން އާއި މާވިންގެ ލޯބިވެރިޔާ ލަމްހާ ދުރާލާ ރާވައިގެން 19 އޮކްޓޫބަރު 2021 ދުވަހު އެވެ. އެގޮތުން:
19 އޮކްޓޫބަރު 2021 ވަނަ ދުވަހުގެ މެންދުރު 12 އާއި 12:49އާ ދެމެދުގެ ވަގުތެއްގައި، އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި މޭރީ މަރާލުމުގައި ލަމްހާ އެހީތެރިވެދީފައިވޭ 
މޭރީ މަރާލުމަށް ރޭވި ރޭވުމުގައި ބައިވެރިވެ، މޭރީ މަރާލުމުގެ އަމަލު ހިންގުމަށް މާވިންއަށް މަގުފަހިކޮށްދީފައިވޭ 
ދައުވާތައް ސާބިތުވެއްޖެ ނަމަ ދެ މީހުންނަށް ވެސް މަދުވެގެން 10 އަަހަރުގެ ޖަލު ހުކުމެއް އަންނާނެ