ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މި މަހު ވަރަށް ބޮޑަށް ދަށަށް ގޮސްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
އެ މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާ ގޮތުން މި މަހުގެ މިހާތަނަށް ރާއްޖެއަށް އައިސްފައިވަނީ 110,000 ފަތުރުވެރިންނެވެ. މިދިޔަ އަހަރުގެ މި މުއްދަތުގައި 150,000 ފަތުރުވެރިން ޒިޔާރަތްކޮށްފައިވާ އިރު، މިއީ 40,000 އެއްހާ ފަތުރުވެރިންގެ މަދުވުމެކެވެ. އެއީ 27 ޕަސެންޓުގެ ދަށްވުމެއް ކަމަށް ތަފާސްހިސާބުތަކުގައި ފާހަގަކޮށްފައިވެއެވެ.
ފަތުރުވެރިންގެ އަދަދު މިހާ ބޮޑަށް ދަށަށް ދިޔަ މައިގަނޑު ސަބަބަކީ ޔޫރަޕާއި ހުޅަނގުގެ ގައުމުތަކުން ރާއްޖެއަށް ދަތުރުކުރާ ރޫޓުތަކަށް ބުރޫއެރުން ކަމަށް ތަފާސްހިސާބުތަކުގައި ބުނެފައިވެއެވެ. ހާއްސަކޮށް ޔުނައިޓެޑް އަރަބް އެމިރޭޓްސް (ޔޫއޭއީ) އާއި ގަތަރު މެދުވެރިކޮށް ރާއްޖެއަށް އަންނަ ފަތުރުވެރިންގެ އަދަދު ވަރަށް ބޮޑަށް މަދުވެފައިވާ ކަމަށް އެ ތަފާސްހިސާބުތަކުން ދައްކައެވެ.
މި އަހަރުގެ މިހާތަނަށް ރާއްޖެއަށް ޖުމްލަ 750,000 ފަތުރުވެރިން ޒިޔާރަތްކޮށްފައިވާ އިރު، މިދިޔަ އަހަރުގެ މި މުއްދަތުގައި އެ އަދަދު ހުރީ 790,000 ގައެވެ. މިއީ މިދިޔަ އަހަރާ އަޅައިބަލާއިރު ހަތަރު ޕަސެންޓުގެ ދަށްވުމެކެވެ.