އެތުލެޓިކޯ ކަޓުވާލައި ބާސެލޯނާ އިން ފައިނަލުގައި ރެއާލާ ދެކޮޅަށް އެތުލެޓިކޯ ކަޓުވާލައި ބާސެލޯނާ އިން ފައިނަލުގައި ރެއާލާ ދެކޮޅަށް

މެޑްރިޑް (އޭޕްރީލް 3) - ސްޕެނިޝް ކަޕް (ކޮޕަ ޑޭލް ރޭ) ސެމީ ފައިނަލުގެ ދެ ވަނަ ލެގުގައި 1-0 އިން އެތުލެޓިކޯ މެޑްރިޑް ބަލިކޮށް، އެ ޓީމު ކަޓުވާލުމަށް ފަހު، ފައިނަލުގައި ބާސެލޯނާ އިން ރެއާލް މެޑްރިޑާ ދެކޮޅަށް ކުޅެން ޖެހިއްޖެ އެވެ.
މި ދެ ޓީމު ބާސެލޯނާ ދަނޑުގައި ކުޅުނު ފޯރިގަދަ މެޗުގައި އެތުލެޓިކޯ އިން ވަރުގަދަ ކުޅުމެއް ދައްކައި މެޗު 4-4 އިން އެއްވަރުކުރި އެވެ. އެހެންކަމުން، ރޭ އެތުލެޓިކޯ ދަނޑުގައި ކުޅުނު މެޗުގައި ކޮންމެ ޓީމެއް މޮޅުވި ނަމަވެސް އޮތީ ފައިނަލުގެ ފުރުސަތު ހުޅުވިފަ އެވެ.
އެތުލެޓިކޯގެ ދަނޑު، ވަންޑާ މެޓްރޮޕޮލިޓާނޯ ސްޓޭޑިއަމްގައި ރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު ބާސެލޯނާ އިން ކާމިޔާބުކުރީ މެޗުގެ 27 ވަނަ މިނިޓްގަ އެވެ. އެ ގޮތުން، ލަމީން ޔަމާލް ދިން ހިތްގައިމު ޕާހަކުން އޭރިއާތެރެއިން އަރައި، މި ލަނޑު ޖެހީ ފެރާން ޓޮރޭސް އެވެ.
ބާސެލޯނާގެ ލީޑުފުޅާކޮށްދޭން އެންމެ ރަނގަޅު ހަަމަލާތަކެއް ފޮނުވާލީ ރަފީނިއާ އެވެ. އެކަމަކު ގޯލެއް ޖެހޭގޮތެއްނުވި އެވެ. އެތުލެޓިކޯ އަށް އެއްވަރުކޮށްދޭން އަލެކްސަންޑަ ސޯލޯތު އާއި އަންޓުއާން ގްރީޒްމަން އެޓޭކްތަކެއް ކުރި ނަމަވެސް ގޯލެއް ޖެހޭގޮތެއްނުވި އެވެ.
ސްޕެނިޝް ކަޕްގެ ޗެމްޕިއަންކަން، ރެކޯޑް 31 ފަހަރު ހޯދާފައިވާ ބާސެލޯނާ އިން މި މަހު 26 ވަނަ ދުވަހު ކުޅޭ ފައިނަލުގައި ރެއާލްއާ ބައްދަލުކުރާއިރު، ބާސެލޯނާ އިން އެންމެ ފަހުން ކުޅުނު 21 މެޗުން ވެސް ބަލިވެފައިނުވެ އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ