އޮލްމޯ އަށް ސީޒަން ނިމެންދެން ބާސެލޯނާ އަށް ކުޅެވޭނެ ކަމަށް ކަނޑައަޅައިފި އޮލްމޯ އަށް ސީޒަން ނިމެންދެން ބާސެލޯނާ އަށް ކުޅެވޭނެ ކަމަށް ކަނޑައަޅައިފި

ބާސެލޯނާ (އޭޕްރީލް 4) - ރެޖިސްޓްރޭޝަން މައްސަލަ ޖެހިފައިވާ ބާސެލޯނާ އަށް ކުޅޭ ސްޕެއިން ފޯވާޑް، ޑަނީ އޮލްމޯ އަށް ސީޒަން ނިމެންދެން ބާސެލޯނާގެ މެޗުތަކުގައި ކުޅެން ހުރަހެއް ނެތް ކަމަށް ސްޕެއިނުގެ ނެޝަނަލް ސްޕޯޓްސް ކައުންސިލް (ސީއެސްޑީ) އިން ނިންމައިފި އެވެ.
ބާސެލޯނާގެ މާލީ މައްސަލަތަކުގެ ސަބަބުން، އެ ޓީމުން މި ސީޒަނުގައި ގެނައި، އޮލްމޯ އާއި ޕައު ވިކްޓޯގެ ރެޖިސްޓްރޭޝަން ކެންސަލްކޮށްލި މައްސަލައިގައި، ބާސެލޯނާ އިން ވަނީ ކޯޓު މެދުވެރިކޮށް ވަގުތީ ހައްލެއް ހޯދައިފަ އެވެ. އެއީ، މި އެޕީލް މަރުހަލާ ނިމެންދެން އޮލްމޯ އާއި ޕައު ވިކްޓޯ އަށް ކުޅެވޭ ގޮތަށެވެ. އެކަން އެހެން އޮއްވައި، ދާދި ފަހުން، ސްޕެނިޝް ލީގު ހިންގާ ލަލީގާ އިން ވަނީ، ބާސެލޯނާގެ މާލީ ހާލަތު އޮތީ އޮލްމޯ ރަޖިސްޓްރީ ކުރެވޭ ގޮތަށް ނޫން ކަމަށް ހާމަކޮށްފަ އެވެ.
ލަލީގާގެ މި ނިންމުމާ އެކު، ސްޕޯޓްސް ކައުންސިލުން ބުނެފައިވަނީ، މި ވަގުތު އެއްބަސްވެވިފައި އޮތް އުސޫލުން ސީޒަން ނިމެންދެން، އޮލްމޯ އާއި ޕައު ވިކްޓޯ އަށް ބާސެލޯނާގެ މެޗުތަކުގައި ކުުޅެން ހުރަހެއް ނެތް ކަމަށެވެ.
ސްޕޯޓްސް ކައުންސިލްގެ މި ނިންމުން އެޕީލް ކުރަން ލަލީގާ އިން އަންނަނީ މަސައްކަތް ކުރަމުންނެވެ.
މި ސީޒަން ފެށުމުގެ ކުރިން، ބާސެލޯނާ އިން ވަނީ އޮލްމޯ ގަންނަން ލައިޕްޒިގަށް 65 މިިލިއަން ޑޮލަރު ޖުމްލަ އެކު ދައްކަން ނިންމައިފަ އެވެ. އޮލްމޯގެ ޑީލްގެ ފައިސާތައް ދެ އަހަރަށް ބަހާލައިގެން ދައްކަން، ބާސެލޯނާ އިން އެއްބަސްވީ އެ ކްލަބްގެ މާލީ ހާލަތަށް ބަލައިފަ އެވެ.
އެކަމަކު، ސްޕެނިޝް ލަލީގާގެ ގަވާއިދުގެ ތެރެއިން އޮލްމޯ ރަޖިސްޓްރީ ކުރަން ބާސެލޯނާ އަށް އެންމެ ފުރަތަމަ ދުވަހުން ވެސް މައްސަލަ ދިމާވި އެވެ. އެއީ، އޭނާގެ ކޮންޓްރެކްޓް ހިނގާ ހަ އަހަރުގެ މުއްދަދަށް އެކަށޭނެ މިންވަރަށް ބާސެލޯނާގެ މާލީ ހާލަތު އެ ވަގުތު ތަން ނުދޭތީ އެވެ. އެކަމަކު، ލަލީގާ އިން ވަނީ ކުޅުންތެރިއާގެ ހައްގަށް ވިސްނުމަށް ފަހު، ރަޖިސްޓްރޭޝަން ނިންމަން، އޮގަސްޓުން ފެށިގެން މިދިޔަ ޑިސެމްބަރު ނިޔަލަށް ފުރުސަތު ދީފަ އެެވެ. އެހެންނަމަވެސް އެ މުއްދަތު ތެރޭގައި ބާސެލޯނާ އަށް އެކަން ނުނިންމި މިހާރު ވަނީ ބޮޑު މައްސަލަތަކެއްގެ ތެރޭގައި ތާށިވެފަ އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ