ރޯދަ މަހު މެންދުރާއި ހަވީރުގެ ވަގުތުތަކުގައި ވެސް ކަރަންޓް ލޯޑް މަތިވެ އެވެ. އެހެންވެ ކަރަންޓް އިގްތިސޯދު ކުރަން ސްޓެލްކޯއިން އިލްތިމާސް ކުރެ އެވެ.
އާއްމު ދުވަސްތަކުގައި މާލެ ސަރަހައްދުގައި ކަރަންޓުގެ ލޯޑް މައްޗަށް ހިފަނީ ރެއަކާއި ދުވާލުގެ ތެރޭގައި އެއް ވަގުތެއްގަ އެވެ. އެއީ މެންދުރު އެކަންޏެވެ. އެކަމަކު ރޯދަ މަހު މެންދުރާއި ރޭގަނޑުވެސް ކަރަންޓުގެ ލޯޑް ޕީކަށް އުފުލެމުންދާ ކަމަށް ސްޓެލްކޯގެ ހިސާބު ތަކުން ދައްކަ އެވެ. އެހެންވެ ކަރަންޓުގެ ލޯޑް މަތިވާ ވަގުތުތަކުގައި އާއްމުން ކަރަންޓް އިގްތިސޯދު ކުރަން ސަމާލުކަން ދޭން ސްޓެލްކޯ އިން އިލްތިމާސް ކުރެ އެވެ. 
މާލެ އަށް ކަރަންޓުގެ ހިދުމަތް ފޯރުކޮށްދޭތާ 75 އަހަރުވީ ކުންފުނިން ބުނީ ރަމަޟާންމަހުގެ ފުރަތަމަ ހަފުތާގައި މާލެ އާއި ހުޅުމާލޭގައި ކަރަންޓު ބޭނުންކުރެވިފައިވާ ގޮތަށް ބަލާއިރު އެއް ޕެޓާން އަކަށް ކަރަންޓު ބޭނުން ކުރެވެމުންދާކަން ފާހަގަ ކުރެ ކަމަށެވެ.އެ ކުންފުނިން ވަނީ މި ސަރަހައްދުގައި ކަރަންޓް ބޭނުން ކުރުމުގެ ޓްރެންޑް ހުރިގޮތް ހާމަކޮށްފަ އެވެ. ސްޓެލްކޯގެ ހިސާބުތައް ދައްކާ ގޮތގައި މި ދުވަސްވަރު ރޭގަނޑު 12:00 އިން ފެށިގެން ހެނދުނު 6:00 ޖެހުމާއި ހަމައަށް ކަރަންޓު ބޭނުން ކުރާ މިންވަރު ދަށް ކަމަށް ދައްކަ އެވެ. އެ ކުންފުނިން ބުނީ ކަރަންޓް ބޭނުން ކުރާ މިންވަރު ހެނދުނު 6:00 އިން 9:00 ޖެހުމާއި ހަމައަށް އެއްހަމައެއްގައި މަތިވަމުންގޮސް، ހެނދުނު 9:00 އަކުން ފެށިގެން މެންދުރު 1:00 ޖެހުމާއި ހަމައަށް އިތުރަށް އުފުލެ އެވެ. "މި ގަޑިތަކަކީ ހޫނު ގަދަވަމުންދާ ގަޑިތަކަކަށްވުމުގެ އިތުރުން އެއީ އޮފީސް ގަޑިއަށްވުމާއެކު ކަރަންޓު ބޭނުން ކުރަމުންދާ މިންވަރު އިތުރުވަމުންދާކަން ވަނީ ފާހަގަ ކުރެވިފައި،" ސްޓެލްކޯ އިން ބުނެފައިވެ އެވެ.
މި ރޯދަމަހުގެ ފުރަތަމަ ދުވަހުން ފެށިގެން މާލެ ސަަރަހައްދުގައި ކަރަންޓް ބޭނުން ކުރާ މިންވަރު ހާމަ ކުރަމުންދާ ސްޓެލްކޯ އިން ބުނީ މެންދުރު 1:00 އާއި ހަވީރު 5:00 އާ ދެމެދު ހޫނުވުމުގެ އިތުރުން، ރަމަޟާން މަސްކަމުން ކަރަންޓް ބޭނުން ކުރުން މަތިކަމަށް ދައްކަ އެވެ. - މިމި ވަގުތަކީ ބަދިގޭގެ އެޕްލަޔަންސްތައް ގިނައިން ބޭނުންކުރާ ވަގުތުތަކެވެ. އެ ކުންފުނިން ބުނީ ހަވީރު 5:00 އިން ފެށިގެން ރޭގަނޑު 7:00 ޖެހުމާއި ހަމައަށް ކަރަންޓު ބޭނުން ކުރާ މިންވަރު ދަަށްވިނަމަވެސް އޭގެ ފަހުން ދަންވަރު 12:00 ޖެހުމާ ހަމައަށް މެންދުރުގެ ލޯޑާއި އެއްވަރެއްގައި ކަރަންޓު ބޭނުން ކުރަމުންދާކަން ފާހަގަކުރެވެ އެވެ. - އެހެންވެ ރޯދަ މަހު ދެ އިރަށް މާލެ ސަރަހައްދުގައި ކަރަންޓުގެ ލޯޑް މަތިވަމުންދާކަން އެ ކުންފުނިން ފާހަގަކޮށްފައިވެ އެވެ. ސްޓެލްކޯއިން ބުނީ އެހެން ކަމުން ކަރަންޓު ބޭނުން ކުރާ މިންވަރު އިތުރުކަމަށް ފާހަގަ ކުރެވިފައި މިވާ ގަޑިތަކުގައި ކަރަންޓު އިގްތިސޯދު ކުރުމަށް ހާއްސަ ސަމާލުކަމެއް ދިނުމަށް އެ ކުންފުނިން އިލްތިމާސް ކުރެ އެވެ. 
ކަރަންޓަކީވެސް އެހެން އެއްޗިސެކޭ އެއްވަރަށް ބޭނުން ކުރުމުގައި ސަމާލު ވެއްޖެނަމަ ހަރަދު މަތިވެގެންދާނެ އެއްޗެކެވެ. ސަބަބަކީ ކަރަންޓަކީ ބޭނުން ކުރާ މިންވަރަކުން ޗާޖު ވަމުންދާ އެއްޗަކަށްވުމެވެ. އެންމެ ބޮޑަށް ކަރަންޓް އިގްތިސޯދު ކުރުމުގައި ސަމާލުވާން ޖެެހެނީ އޭސީ އާއި ފިނި ކުރަން ބޭނުން ކުރާ ސާމާނަށެވެ. އޭސީ ބޭނުން ކުރުމުގައި ކޮޓަރިން ބޭރުގައި އެއް ގަޑިއިރަށްވުރެ ގިނައިރު އުޅޭނަމަ އޭސީ ނިއްވާލުމަކީ ބުއްދިވެރިކަމެވެ. މީގެ އިތުރުން އޭސީގެ ފިލްޓަރު ސާވިސް ކުރުމާއި ރަނގަޅު އޭސީއެއް ހޯދުން އަދި ފިނި ލީކް ނުވާނެހެން ކޮޓަރި ރަނގަޅަށް ސިލްކޮށްފައި ބެހެއްޓުން ހިމެނެ އެވެ. މީގެ އިތުރުން އަހަރު އެއްފަހަރު މަދުވެގެން އޭސީ ފުލް ސާވިސްއެއް ކުރުން މުހިންމުކަން ބޮޑެވެ. މީގެ އިތުރުން މިހާރު ލައިފް ސްޓައިލަަށް އައިސްފައިވާ ބަދަލާއެކު އޭސީ ކޮށްފައި ހުންނަ ތަންތަނުގައި ގޭގެ ތެރޭގައި ގަސް ވެސް އިންދަ އެވެ. މިއީ ވެސް އޭސީން ކުރަން ޖެހޭ މަސައްކަތް ދެގުނަ ބޮޑުވާނެ ކަމެކެވެ. އޭސީ ކޮށްފަ ހުންނަ ތަނެއްގެ ތެރޭގައި ފެން ހުރެއްޖެނަމަ މި ފެނުގެ ސަބަބުން އޭސީން ކުރަން ޖެހޭ މަސައްކަތް ބޮޑުވެ އެވެ. މީގެ އިތުރުން ހޫނުކޮށް ހުންނަ އެއްޗިހީގެ ފިނި ނުކެނޑެނީސް ފްރިޖަށްލުމާއި ފެން ކުރާ އިރުއިރުކޮޅާ ޖައްސަން ނުޖެހޭނެ ގޮތަކަށް އިންތިޒާމު ކުރުން ހިމެނެ އެވެ. މީގެ އިތުރުން އަވަސް އަވަހަށް އިސްތިރި ކުރުމުގެ ބަދަލުގައި ހަފުތާއަކު އެއް ދުވަހު އިސްތިރި ކުރުން ފަދަ ކަންކަން އިންތިޒާމުކޮށްލައިގެން ކުރިއަށް ގެންދިއުމަކީވެސް ކަރަންޓް ބިލަށް އަންނަ ބަދަލު ކުޑަކުރަން އެޅިދާނެ ފިޔަވަޅެކެވެ.
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ