ޓްރީޓޮޕް ހޮސްޕިޓަލުން ފުރަތަމަ ފަހަރަށް އޮޓޮމެޓިކް އިމްޕްލާންޓަބަލް ކާޑިއޯވާޓާ-ޑީފިބްރިލޭޓާ (އޭއައިސީޑީ) ޓްރާސްޕުލާންޓްކުރުމުގެ އޮޕަރޭޝަން ކާމިޔާބުކަމާއެކު ފުރިހަމަކޮށްފި އެވެ.
އެނގުން މުހިންމު - އައިސީޑީ އަކީ ހިތުގެ ވިންދު ޖެހުމަށް ކުއްލި ބަދަލުތައް އަންނަ ފަރާތްތަކަށް ފުރާނަ ސަލާމަތްކޮށްދޭ ޒަމާނީ އާލާތެކެވެ. އެގޮތުން:
ޑިވައިސްއިން ހިތުގެ ވިންދު ދާއިމީކޮށް ބަލަހައްޓަމުން ގެންދާނެ 
މިއީ ކުޑަ ޖެނެރޭޓަރަކާއި ވަޔަރުތަކެއް ހިމެނޭ، ހަށިގަނޑުގައި އިމްޕްލާންޓް ކުރާ ވަސީލަތެއް 
ނުރައްކާވާ ފަދަ ހިތުގެ ވިންދެއް ދެނެގަނެވިއްޖެނަމަ އާންމު ހާލަތަށް ގެންނަން އެކަށީގެންވާ މިންވަރެއްގެ ކަރަންޓް ޝޮކެއް އެ ޑިވައިސްއިން ދޭނެ 
ތަފްސީލް - ޓްރީޓޮޕް ހޮސްޕިޓަލުން މިއަދު ބުނީ އެ އޮޕަރޭޝަން ކުރިއަށް ގެންގޮސްފައިވަނީ:
ރާއްޖޭގެ ތަޖުރިބާކާރު ހިތުގެ ޑޮކްޓަރު، ކާޑިއޮލޮޖީ ސްޕެޝަލިސްޓް ޑރ. މިގުދާދު ޝަރީފް އަދި ޓްރީޓޮޕް ހޮސްޕިޓަލްގެ ކާޑިއޯ ޑިޕާޓްމަންޓްގެ ހެޑް ޑރ. އަމިތް އަގަރްވާލް 
މިއީ ދިވެހި ސިއްހީ ދާއިރާގެ ފަންނީ މާހިރުން، ޒަމާނީ ޓެކްނޮލޮޖީ ބޭނުންކޮށްގެން ހިތުގެ ބަލިތަކަށް ފަރުވާދިނުމުގައި ކުރިއެރުން ހޯދަމުންދާކަން ދައްކުވައިދޭ މިސާލެއް
މީގެ އިތުރަށް އެ ހޮސްޕިޓަލުން ބުނީ އެ އޮޕަރޭޝަން ކާމިޔާބު ކަމާ އެކު ކުރެވުމުން ދައްކުވައި ދެނީ އެ ހޮސްޕިޓަލުގައި ހިތުގެ ބަލިތަކަށް ފަރުވާދިނުމުގެ ގާބިލުކަން ހުރި މިންވަރެވެ.
"ބަލި ދެނެގަނެވުނު ހިސާބުން ފެށިގެން މި ފަރުވާއަށް ބޭނުންވާ އާލާތްތައް އަވަސް މުއްދަތެއްގެ ތެރޭގައި ހޯދައި، ބަލިމީހާއަށް ލަސްވުމެއް ނެތި ފަރުވާ ފޯރުކޮށްދިނުމަށް ޓްރީޓޮޕް ހޮސްޕިޓަލުން ވަނީ ހާއްސަ މަސައްކަތްތަކެއް ކޮށްފައި،" އެ ހޮސްޕިޓަލުން ނެރުނު ބަޔާނެއްގައި ބުންޏެވެ. 
ފާހަގަކޮށްލެވޭ - ޓްރީޓޮޕް ހޮސްޕިޓަލަކީ ރާއްޖޭގެ ސިއްހީ ހިދުމަތުގެ ދާއިރާގައި މުހިންމު ދައުރެއް މިހާރު އަދާކުރަމުން އަންނަ ހޮސްޕިޓަލެލެވެ. އަދި އެ ހޮސްޕިޓަލުން ހޯދަމުން އަންނަ ކުރިއެރުންތަކާ އެކު ފެންވަރު މަތީ އަދި ފުރާނަ ސަލާމަތްކުރުމަށް ބޭނުންވާ ޒަމާނީ ފަރުވާތައް ރާއްޖޭގައި ތިބެގެން ހޯދޭނޭ މަގު ވަނީ ފަހިވެފަ އެވެ.