'ގެދޮރުވެރިޔާ' ސްކީމްގެ ދަށުން ފްލެޓްތައް ދޫކުރުމުގެ މައްސަލައިގައި ހިމެނޭ ފަރާތްތަކުގެ މައްޗަށް ދައުވާކުރުމަށް އެދެން ޕްރޮސެކިއުޓަރު ޖެނެރަލްގެ އޮފީހަށް ހުށަހެޅުމަށްޓަކައި ކުރަން ޖެހޭ މަޝްވަރާ ފަށައިފިއެވެ.
އޭސީސީން ބުނީ، އެ ކޮމިޝަނުން ތަހްގީގުކުރަމުންދާ ގެދޮރުވެރިޔާ ސްކީމްގެ ދަށުން ފްލެޓް ދޫކުރުމުގެ މައްސަލައިގައި ހިމެނޭ ފަރާތްތަކުގެ މައްޗަށް އެ މައްސަލައިގައި ދައުވާކޮށްދިނުމާ މެދު ގޮތެއް ނިންމުމަށް ޕްރޮސެކިއުޓަރު ޖެނެރަލްގެ އޮފީހާ އެކު ރަސްމީކޮށް ޑިއުޓީ ޕްރޮސެކިއުޝަން ފަށާފައިވާ ކަމަށެވެ.
މި މައްސަލައިގައި ޑިއުޓީ ޕްރޮސެކިއުޝަން ނިންމައި ދައުވާކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް އެދެން ކުރަން ޖެހޭ މަސައްކަތްތައް ވީ އެންމެ އަވަހަކަށް ކުރަމުން ގެންދާނެ ކަމަށް އެ ކޮމިޝަނުން ބުންޏެވެ.
އޭސީސީން ވަނީ ޕްރޮސެކިއުޓަރު ޖެނެރަލްގެ އަމުރަކަށް ގެދޮރުވެރިޔާ ސްކީމްގެ އިތުރުން 'ބިންވެރިޔާ' ސްކީމާ ގުޅޭ ޖިނާއީ ތަހްގީގެއް ފަށައިފައެވެ. މީގެ އިތުރުން 'ބިންވެރިޔާ' ސްކީމްގެ ދަށުން ގޯތިނުލިބޭ ބަޔަކަށް އެޗްޑީސީން ގޯތިތަކެއް ދިން މައްސަލައެއް ވެސް ތަހްގީގުކުރަން ވަނީ ފަށައިފައެވެ.