އަންނަ އަހަރުގެ ފުރަތަމަ ފީޗާ ފިލްމަކީ "ޕްރޮޖެކްޓް 37" ކަމަށް ޑާކްރެއިން އެންޓަޓެއިންމަންޓުން ބުނެފިއެވެ.
ޑާކްރެއިނުން ބުނީ އަންނަ އަހަރު ބެލުންތެރިންނަށް އެންމެ ފުރަތަމަ ފީޗާ ފިލްމަކަށް ފެނިގެންދާނީ އެ ފިލްމު ކަމަށާއި މިހާރު ފިލްމުގެ ޝޫޓިން ފެށިގެން ކުރިއަށްދާ ކަމަށެވެ. ފިލްމު ރިލީޒްކުރާނެ ދުވަހެއް އަދި އިއުލާންކޮށްފައިނުވާއިރު މި ފިލްމަކީ މިދިޔަ އޮގަސްޓް މަހު ޝޫޓިން ފެށި ފިލްމެއް ވެސްމެއެވެ. މި ފިލްމު ވެގެންދާނީ އެ ކުންފުނިން އަންނަ އަހަރު ގެނެސްދޭ ފުރަތަމަ ފިލްމަށެވެ.
މި ފިލްމަކީ އަހުމަދު ތޮލާލްގެ ސްކްރީންޕްލޭއަކަށް ޑައިރެކްޓަރު އަލީ ޝިފާއު ޗިއްޕެ) އާއި ރަވީ ފާރޫގް ގުޅިގެން ޑައިރެކްޓްކުރާ އެކްޝަން ތުރިލާއެކެވެ. މި ފިލްމުގައި ހަރަކާތްތެރިވާނެ ބައެއް ތަރިންނަކީ ރަވީ، މައިޝާ އާދަމް، ޝިލާ ނަޖީބް، އާދަމް ރިޒްވީ، މޫސާ އަލީފް އަހުމަދު ޝާކިރު ޝާއްކޮ (އައްމަޑޭ)، މުހައްމަދު ހާޒިފް އަދި ރަޒާންއެވެ.
ޑާކްރެއިނުން ބެލުންތެރިންނާ ހަމައަށް އެންމެ ފަހުން ގެނެސްދިން ފިލްމަކީ ހޮރޯ ކޮމެޑީ "ބިބީ" އެވެ. އެ ފިލްމަށް އާންމުންގެ ބޮޑު ތަރުހީބެއް ލިބިގެންދިޔައިރު ފިލްމު ވަނީ އަތޮޅުތަކުގެ އިތުރުން ރާއްޖެއިން ބޭރުގައި ވެސް އަޅުވާފައެވެ.