ރައީސް ރިޔާސީ ބަޔާން އިއްވަވާ ދުވަހަކީ ސަރުކާރު ބަންދު ދުވަހެއް ނޫން ކަމަށް ނިންމި ނިންމުން ބަދަލުކޮށް، އެ ދުވަހަކީ ބަންދު ދުވަހެއްގެ ގޮތުގައި ރައީސް އޮފީހުން މިއަދު ހަމަޖައްސައިފި އެވެ.
ވީ ކިހިނެއް؟ - މިދިޔަ އަހަރާ ހަމައަށް ވެސް ރިޔާސީ ބަޔާން އިއްވާ ދުވަސް ކަނޑައަޅާފައި އޮންނަނީ ރަސްމީ ބަންދު ދުވަހެއް ގޮތުގަ އެވެ.
ނަމަވެސް އެކަން ބަދަލުކޮށް، 18 ޖެނުއަރީ 2024ގައި ރައީސް އޮފީހުން ބުނީ:
"ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 84 ވަނަ މާއްދާގައިވާ ގޮތުގެ މަތިން، ކޮންމެ އަހަރަކު ރައްޔިތުންގެ މަޖިލީހަށް ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ދުވަހަކީ، މީގެ ފަހުން ސަރުކާރު ބަންދު ނޫން ދުވަހެއްގެ ގޮތުގައި ހަމަޖައްސަވައިފިކަމުގައި ދަންނަވަން ރައީސުލްޖުމްހޫރިއްޔާ ވިދާޅުވި އެވެ."
ތަފްސީލު - ނަމަވެސް ރައީސް އޮފީހުން މިއަދު ނެރުނު ދެންނެވުމެއްގައި އެ ނިންމުން ވަނީ ބާތިލުކޮށްފަ އެވެ.
މިއަދު ނެރުނު ދެންނެވުމުގައި ބުނީ:
"ރައީސުލްޖުމްހޫރިއްޔާ މި ދުވަސް ބަންދު ދުވަހެއްގެ ގޮތުގައި ހަމަޖެއްސެވީ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 84 ވަނަ މާއްދާގައިވާ ގޮތުގެ މަތިން، ކޮންމެ އަހަރަކު ރައްޔިތުންގެ މަޖިލީހަށް ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ދުވަހަކީ، ސަރުކާރު ބަންދު ދުވަހެއްގެ ގޮތުގައި ހަމަޖެއްސެވުމާ ގުޅިގެންނެވެ."
މިއަހަރު މަޖިލީހަށް ރައީސް ރިޔާސީ ބަޔާން އިއްވަވާނީ 6 ފެބްރުއަރީ ވާ ބުރާސްފަތި ދުވަހު އެވެ.
އެނގުން މުހިންމު - މިއީ ރައީސް މުއިއްޒު ދެއްވާނެ ދެވަނަ އަދި 20 ވަނަ މަޖިލީހުގައި އިއްވާނެ ފުރަތަމަ ރިޔާސީ ބަޔާނެވެ. އެ މަނިކުފާނުގެ ފުރަތަމަ ރިޔާސީ ބަޔާން މިދިޔަ އަހަރުގެ މަޖިލީހުގެ ފުރަތަމަ ޖަލްސާގައި އިއްވިއިރު، އޭރު އޮތީ އެމްޑީޕީގެ މެޖޯރިޓީ އޮތް 19 ވަނަ މަޖިލީހެވެ.
ގާނޫނުއަސާސީގައިވާ ގޮތުން، ރިޔާސީ ބަޔާނަކީ ގައުމެއްގެ ހާލަތު ބަޔާންކޮށްދީ އަދި ގައުމުގެ ހާލަތު އިތުރަށް ރަނގަޅުކުރުމަށްޓަކައި ކުރަން ޖެހޭ ކަމަށް ރައީސަށް ފެންނަ ކަންކަމުގެ މައްޗަށް އެކުލެވޭ ބަޔާނެކެވެ.