އެމެރިކާގައި ޓިކްޓޮކް ސަލާމަތްކުރަން އެ ގައުމުގެ ސުޕްރީމް ކޯޓަށް ހުށަހެޅި މައްސަލައިގައި އެޕީލްސް ކޯޓުގެ ނިންމުން ދެމެހެއްޓުމާ އެކު އެ ގައުމުގައި ޓިކްޓޮކް މަނާވާނެކަން ކަށަވަރުވެއްޖެ އެވެ.
އެމެރިކާގައި ޓިކްޓޮކް މަނާވަނީ ޑިމޮކްރެޓިކް ޕާޓީ އާއި ރިޕަބްލިކަން ޕާޓީގެ މެމްބަރުންގެ ރުހުމާ އެކު ކޮންގްރެސްއިން ފާސްކުރި ގާނޫނަކުންނެވެ.
އެމެރިކާގައި ޓިކްޓޮކް ހިންގާ ކުންފުނި އެ ގައުމުގެ ބަޔަކަށް ވިއްކާނުލައިފި ނަމަ އަންނަ އާދީއްތައިން ފެށިގެން އެމެރިކާގައި ޓިކްޓޮކް މަނާވާނެ އެވެ.
މިއީ ޗައިނާގެ ކުންފުންޏަކުން އުފައްދާ، ހިންގާ ޓިކްޓިކް މެދުވެރިކޮށް އެމެރިކާ ރައްޔިތުންގެ ޒާތީ މައުލޫމާތު ޗައިނާ ސަރުކާރަށް ފޯރުކޮށްދިނުމުގެ ފުރުސަތު އޮތުމުން އެމެރިކާއިން އަޅާ ފިޔަވަޅެކެވެ.
ކޮންގްރެސްއިން ފާސްކުރި ގާނޫނަށް އަމަލުކުރުން ހުއްޓުވަން ޓިކްޓޮކް އާއި ޓިކްޓޮކްއަށް ކޮންޓެންޓު އުފައްދައިދޭ އެމެރިކާ މީހުން އެމެރިކާގެ ފެޑެރަލް އެޕީލްސް ކޯޓަށް މައްސަލަ ވެއްދި އެވެ.
ނަމަވެސް އެ ކޯޓުން މިދިޔަ ޑިސެމްބަރުގެ ކުރީކޮޅު ނިންމީ 19 ޖެނުއަރީގެ ކުރިން ޓިކްޓޮކް ހިންގާ ޗައިނާގެ ބައިޓްޑާންސް ކުންފުނިން އެ އެޕްލިކޭޝަން ވިއްކާނުލައިފިނަމަ އެމެރިކާއިން ބޭރުވާން ޖެހޭނެ ކަމަށެވެ.
ތަފްސީލު - ސުޕްރީމް ކޯޓުގައި އެ މައްސަލަ އިސްތިއުފާނު ކުރުމުން އެ ކޯޓުން ވެސް ނިންމީ އެޕީލްސް ކޯޓުގެ ނިންމުން ދެމެހެއްޓުމަށެވެ.
ސުޕްރީމް ކޯޓުގެ ނިންމުމާ ހަވާލާދީ ބޭރުގެ ނޫސްތަކުން ރިޕޯޓުކޮށްފައިވާ ގޮތުގައި ޓިކްޓޮކްއަކީ 170 މިލިއަނަށް ވުރެ ގިނަ އެމެރިކާ މީހުން ބޭނުންކުރާ އެޕްލިކޭޝަނެއް ނަމަވެސް ޓިކްޓޮކް ބޭނުންކުރާ މީހުންގެ މައުލޫމާތު އެ އެޕްލިކޭޝަނުން ރައްކާ ކުރުމާއި އޭގެ ސަބަބުން ގައުމީ ސަލާމަތަށް ނުރައްކާވާތީ އެކަން ހުއްޓުވަން ފިޔަވަޅުތަކެއް އަޅަން ޖެހެ އެވެ.
އެމެރިކާގެ ވައިޓް ހައުސްއިން ނެރުނު ނޫސްބަޔާނަކާ ހަވާލާދީ ނޫސްތަކުން ރިޕޯޓުކޮށްފައިވާ ގޮތުގައި ޓިކްޓޮކްއަކީ އެމެރިކާގައި ބޭނުންކުރެވޭ އެޕްލިކޭޝަނެއްގެ ގޮތުގައި އޮންނަން ޖެހޭ ކަމަށް އެމެރިކާގެ ރައީސް ޖޯ ބައިޑެން ގަބޫލުކުރެއްވި ނަމަވެސް، އެކަން ކުރެވެން ވާނީ އެ ގައުމަށް ނިސްބަތްވާ ކުންފުންޏެއްގެ ދަށުންނެވެ.
އެމެރިކާގައި ޓިކްޓޮކް މަނާވާ ގޮތަށް ކޮންގްރެސްއިން ގެނައި އިސްލާހަށް އާދީއްތައިގައި އަމަލުކުރަން ފަށާއިރު، ހޯމަ ދުވަހު އެމެރިކާގެ އާ ރައީސްގެ ގޮތުގައި ޑޮނަލްޑް ޓްރަމްޕް ހުވާކުރައްވާނެ އެވެ.
ޓްރަމްޕް ވަނީ ޓިކްޓޮކް މަނާކުރުމާ ދެކޮޅަށް މީގެ ކުރިން ވާހަކަދައްކަވާފަ އެވެ. އަދި މިއަދު ޗައިނާގެ ރައީސް ޝީ ޖިންޕިންއަށް ކުރެއްވި ފޯނު ކޯލުގައި މަޝްވަރާ ކުރެއްވި ކަންކަމުގެ ތެރޭގައި ޓިކްޓޮކް ވެސް ހިމެނެ އެވެ.
ފާހަގަކޮށްލެވޭ ކަމެއް - އެމެރިކާގައި ޓިކްޓޮކް މަނާކުރަން ނިންމުމާ އެކު އެ ގައުމުގެ ގިނަ އަދަދެއްގެ މީހުން އަންނަނީ 'ރެޑް ނޯޓް' ކިޔާ ޓިކްޓޮކްއާ އެއްގޮތް އެޕްލިކޭޝަނަކަށް ހިޖުރަކުރަން ފަށާފަ އެވެ. އެގޮތުން ފާއިތުވެދިޔަ ދެ ދުވަހުގެ ތެރޭގައި އެކަނި ވެސް 700،000 އަށްވުރެ ގިނަ މީހުން ރެޑް ނޯޓް އެޕްލިކޭޝަނާ މުޅިން އަލަށް ގުޅިފައިވާ ކަމަށް ބޭރުގެ ނޫސްތަކުން ރިޕޯޓުކުރެ އެވެ.