ފަލަސްތީނުގެ ޣައްޒާ އަށް އިޒްރޭލުން ހަމަލާތައް ދެމުން އަންނަތާ 15 ‏މަސް ދުވަސް ފަހުން، ހަނގުރާމަ މެދުކަނޑައިލުމުގެ އެއްބަސްވުމަކަށް އާދެވި، މި އެއްބަސްވުމަށް އިޒްރޭލުގެ ސެކިއުރިޓީ ކެބިނެޓުން ވެސް ހުކުރު ދުވަހު ވަނީ ރުހުން ދީފައެވެ.
އެއްބަސްވުމަށް އަމަލު ކުރަން ފަށަން ހަމަޖެހިފައި ވަނީ އާދިއްތަ ދުވަހުއެވެ. މި އެއްބަސްވުމާމެދު، އިޒްރޭލުގެ މުޅި ކެބިނެޓުން މިއަދު ގޮތެއް ނިންމާނެ ކަމަށް ޚަބަރުތައް ބުނެއެވެ.
ހަނގުރާމަ ހުއްޓައިލުމުގެ އެއްބަސްވުމުގައި ވަނީ، ފަލަސްތީނުގެ މިނިވަންކަމަށް މަސައްކަތް ކުރާ ހަމާސް ޖަމާއަތުން ހައްޔަރު ކުރި އިޒްރޭލުގެ އަސީރުން ދޫކޮށްލަން ޖެހޭނެ ކަމަށެވެ.
މި އެއްބަސްވުމަށް އަމަލު ކުރަން ނިންމިޔަސް، ޔަހޫދީންގެ އަނިޔާވެރި ކަމަކަށް ނިމުމެއް ނާދެއެވެ.
މި ހަފްތާގައި އެއް ދުވަސް ތެރޭގައި، ޣައްޒާ އިން އެންމެ ގިނަ މީހުން ޝަހީދު ކޮށްލީ ވެސް، ހަނގުރާމަ ހުއްޓައިލަން އެއްބަސްވީ ފަހުންނެވެ. އެގޮތުން، ކުޑަކުދިންނާއި އަންހެނުން ހިމެނޭހެން 80އަށްވުރެ ގިނަ މީހުން 24 ގަޑިއިރު ތެރޭގައި ވަނީ ޝަހީދުކޮށްލައިފައެވެ.
އިޒްރޭލުން ޣައްޒާ އަށް ހަމަލާ ދޭން ފެށީ، 2023 ވަނަ އަހަރުގެ އޮކްޓޯބަރުމަހުގެ 07 ވަނަ ދުވަހުއެވެ. އެ ހަމަލާތަކުގައި 46000އަށްވުރެ ގިނަ މީހުން ޝަހީދުކޮށްލައި، ލައްކައަކަށްވުރެ ގިނަ މީހުން ޒަހަމް ކޮށްލިއެވެ.