އާޓިފިޝަލް ބީޗު ސަރަހައްދުގައި މިރޭ ވެސް، ބިދޭސީންތަކެއް މާރާމާރީ ހިންގައިފިއެވެ.
ފުލުހުން މިރޭ ބުނީ، އާޓިފިޝިއަލް ބީޗްގައި ބިދޭސީންތަކެއްގެ މެދުގައި މާރާމާރީ ހިންގިކަމުގެ ރިޕޯޓު މިރޭ 8:30 އެހާއިރު ލިބިފައިވާކަމަށެވެ.
ބިދޭސީން މާރާމާރީ ހިންގި މަންޒަރު ރެކޯޑުކުރި ދިވެއްސަކަށް ވެސް އެ މީހުން އަނިޔާކުރި ކަމަށް ބެލެވެއެވެ. މި މާރާމާރީގެ ވީޑިއޯ މީސްމީޑިއާގައި ވަނީ ދައުރުވެފައެވެ.
މި މައްސަލައިގައި ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވެއެވެ. އެ ތިން މީހުންނަކީ ވެސް އިންޑިއާ މީހުންނެވެ.
ހުކުރު ދުވަހަކީ ގިނަ ބިދޭސީންނަށް އޮފް ލިބޭ ދުވަސް ކަމަށްވާއިރު، މާލެ ސަރަހައްދުގެ ގިނަ ތަންތަނަށް އެ ދުވަހު އެމީހުން އެއްވެއެވެ. މީގެ ކުރިން ވެސް ހުކުރު ދުވަހު އާޓިފިޝަލް ބީޗުގައި ބިދޭސީން މާރާމާރީ ހިންގައިފައިވެއެވެ.