ދުނިޔޭގެ ކެންސަރު ބަލީގެ ދުވަހުގެ ގޮތުގައި ފާހަގަކުރާ ފެބްރުއަރީ 4 ވަނަ ދުވަސް ފާހަގަ ކުރުމަށް ކުޅޭ ހާއްސަ ފުޓްބޯޅަ މެޗު މާދަމާ ހަވީރު ކުޅުމަށް ހަމަޖެހިފައިވާ ކަމަށް ނިއު ރޭޑިއަންޓުން ބުނެފިއެވެ.
ރާއްޖޭގެ ކެންސަރ ސޮސައިޓީއަށް އެހީތެރިވުމަށް ނިއު އިން އިސްނަގައިގެން ކުރިޔަށްގެންދާ މި ހަރަކާތުގައި ކުޅޭ އެކުވެރިކަމުގެ މެޗުގައި ބައްދަލުކުރާނީ ނިއު ރޭޑިއަންޓާއި ކްލަބު އީގަލްސްއެވެ.
މި މެޗުގައި ނިއު އިން ކެންސަރ ސޮސައިޓީއަށް ފައިސާގެ އެހީތެރިކަން ފޯރުކޮށްދިނުމަށް ހަމަޖެހިފައިވާއިރު 2017 ވަނަ އަހަރުގެ ސީޒަންގެ ނިއުގެ ސްކޮޑާއި މެނޭޖްމަންޓް ގައި ހިމެނޭ ކުޅުންތެރިން ސޮއިކޮށްފައިވާ ހާއްސަ ޖާޒީއެއް ކެންސަރ ސޮސައިޓީއަށް ހަދިޔާ ކުރުމަށް ވަނީ ނިންމާފައެވެ.
ޓާފް އެއްނަންބަރު ދަނޑުގައި 16:00ގައި ފެށުމަށް ހަމަޖެހިފައިވާ މި ހަރަކާތުގެ ސްޕޮންސަރުންގެ ގޮތުގައި ހަމަޖައްސާފައިވަނީ ދެކުނު ކޮރެއާގެ ކޭ ޕާކް ރެސިޑެންސްއެވެ. ކޭ ޕާކް ރެސިޑެންސަކީ، ލަގްޒަރީ އެޕާޓްމެންޓުގެ ވިޔަފާރީ ކުރާ ރިއަލް އެސްޓޭޓް ކުންފުންޏެކެވެ. އެ ކުންފުނިން ދަނީ ހުޅުމާލޭގައި ލަގްޒަރީ ހައުސިން ޔުނިޓުތައް އެޅުމުގެ މަސައްކަތް ކުރަމުންނެވެ.
ނިއުގެ ބޯޑު މެންބަރ އަބްދުލް މުއިއްޒު ވިދާޅުވީ ރާއްޖޭގެ ކެންސަރ ސޮސައިޓީއަށް އެހީތެރިވުމަށް ނިއު އިން އިސްނަގައިގެން ކުރިޔަށްގެންދާ ހަރަކާތަކީ ނިއުގެ ސީއެސްއާރް ޕްރޮގްރާމުގެ ދަށުން ކުރިޔަށް ގެންދެވޭ ހަރަކާތެއް ކަމަށާއި މީގެ އިތުރުން ވެސް މިއަހަރު ގިނަ ހަރަކާތްތަކެއް ހިންގުމަށް ހަމަޖެހިފައިވާ ކަމަށެވެ.
މިއަހަރުގެ ތެރޭގައި ކުޑަކުދިންގެ ހިޔާ އަށް އެހީތެރިކަން ފޯރުކޮށްދިނުމަށްވެސް ހަރަކާތްތައް ކުރިއަށް ގެންދިޔުމަށް ނިއު ރޭޑިއަންޓުން ވަނީ ނިންމާފައެވެ.