ކުރިއަށް އޮތް ފުޓްބޯޅަ ސީޒަނަށް ތައްޔާރު ވުމުގެ ގޮތުން ވިކްޓަރީ ސްޕޯޓްސް ކުލަބުގެ ފަރިތަކުންތައް މާދަމާ ހަވީރު ފެށުމަށް ނިންމައިފި އެވެ.
ވީނިއުސްއާ ވާހަކަ ދައްކަމުން ވިކްޓަރީގެ ޖެނެރަލް ސެކްރެޓާރީ އަލީ ފަޔާޒް ވިދާޅުވީ، ސީޒަނަށް ތައްޔާރު ވުމުގެ ގޮތުން ވިކްޓަރީގެ ފަރިތަކުންތައް ފެށުމަށް ނިންމާފައި ވަނީ މާދަމާ ހަވީރު 4:00 ގައި އެފްއޭއެމްގެ ޓާފް އެއްނަންބަރު ދަނޑުގައި ކަމަށެވެ.
އައު ސީޒަނަށް ތައްޔާރު ވުމުގެގޮތުން ވިކްޓަރީގެ ފަރިތަކުންތައް މާދަމާ ހަވީރު ފަށަން ނިންމިއިރު، އެކުލަބުން ވަނީ މިއަހަރުގެ ސީޒަނަށް ޓީމް އިތުރަށް ވަރުގަދަ ކުރުމުގެ ގޮތުން ގިނަ ކުޅުންތެރިންތަކެއް ވެސް ހޯދައިފައެވެ. އެގޮތުން މިސީޒަންގައި ވިކްޓަރީއަށް ކުޅުމަށް ހޯދާފައިވާ ދިވެހި ކުޅުންތެރިންގެ ތެރޭގައި ހިމެނެނީ މިޑްފީލްޑަރު މުހައްމަދު އާރިފް (ބަކާ) އާއި އިސްމާއިލް އީސާ (މެސީ) އާއި ވެލެންސިއާއަށް ކުޅުނު ހަސަން އަދުހަމް (ސަޑޭ) އާއި ނިއުގެ ވައިސް ކެޕްޓަން އަހުމަދު ނިޔާޒް އަދި ބީޖީ ސްޕޯޓްސްގެ ކެޕްޓަން މުހައްމަދު ސާގިބް އެވެ. އަދި ބިދޭސީ ކުޅުންތެރިންގެ ތެރޭގައި ހިމެނެނީ މިދިޔަ އަހަރު ޔުނައިޓެޑް ވިކްޓަރީއަށް ކުޅުނު ސީރިއާ ގޯލްކީޕަރު މުހައްމަދު އަލް ޔޫސުފާއި ފޯވާޑް ކެރިކް އަންދްރޭ އާއި މިދިޔަ އަހަރު އީގަލްސް އަށް ކުޅުނު އެޓޭކިން މިޑްފީލްޑަރު މުހައްމަދު ސެޑިކާއި މިދިޔަ އަހަރު ނިއު ރޭޑިއަންޓަށް ކުޅުނު ޑިފެންޑަރު ބަލްގޭރިއާގެ ވެލިޗްކޯ އެވެ.
މީގެއިތުރުން ވިކްޓަރީން ވަނީ މިދިޔަ އަހަރުވެސް އެޓީމަށް ކުޅުނު މުހިންމު ކުޅުންތެރިންގެ ކޮންޓްރެކްޓް ވެސް އާކޮށްފައިވާކަމަށެވެ. އޭގެތެރޭގައި ކެޕްޓަން ރިލްވާން ވަހީދު ( ކަކާ ރިލޭ ) ހިމެނެއެވެ.
މިއަހަރުގެ ފުޓްބޯޅަ ސީޒަން ފެށުމަށް އެފްއޭއެމްއިން ނިންމާފައި ވަނީ އަންނަ މަހުގެ 16 ވަނަ ދުވަހު އެވެ.