ކަންނެލި މަސްވެރިކަމަށް ނިކުމެ އުޅެނިކޮށް ޚަބަރެއް ނުވެގެން މިއަދު ހަވީރު ހޯދަން ފެށި ނ.މިލަދޫ "މަންހާ" ދޯނި މިރޭ ފެނިއްޖެ ކަމަށް މޯލްޑިވްސް ނޭޝަނަލް ޑިފެންސް ފޯރސް އިން ބުނެފި އެވެ.
އެމްއެންޑީއެފް އިން މިރޭ ބުނެފައި ވަނީ، "މަންހާ" ދޯންޏާ ގުޅުނީ މިރޭ 20:30 ހާ އިރު ސެޓަލައިޓް ފޯނު މެދުވެރިކޮށް ކަމަށާއި، ދޯނީގައި ތިބި އެންމެންގެ ހާލު ރަނގަޅު ކަމަށް ދޯނީގެ ކެޕްޓަން ބުނެފައިވާ ކަމަށެވެ.
އަދި މީގެ އިތުރުން، އެ ބޯޓު މިވަގުތު އޮތީ ހައްދުންމަތީގެ ހުޅަނގު ފަރާތުން 70  ނޯޓިކަލް މޭލު ބޭރުގައި ކަމަށާއި، މިހާރު ދޯނި ވަނީ މާލެއާ ދިމާލަށް މިސްރާބު ޖަހާފައި ކަމަށް ކެޕްޓަން ބުނެފައިވާ ކަމަށް ފުލުހުން މަޢުލޫމާތު ދިނެވެ.
އެމްއެންޑީއެފް އަށް މަޢުލޫމާތު ދިން އެ ދޯނީގެ ވެރި މީހާ ބުނީ، 13 ފަޅުވެރިންނާ އެކު ކަންނެއްޔަށް ނިކުމެ އުޅުނު މި ދޯނީގެ ޚަބަރު އެންމެ ފަހުން ވެފައި ވަނީ މިދިޔަ ހަފްތާގެ ބުދަ ދުވަހު ދ އަތޮޅާއި ދިމާ ބޭރުން ކަމަށެވެ.
"މަންހާ" ދޯންޏަކީ 99 ފޫޓުގެ ދިގުމިނުގެ ދޯންޏެކެވެ.