ތިމަރަފުށީ ދާއިރާގެ ކޮންމެ ގެއަކަށް އެ ދާއިރާގެ މެމްބަރު ކޮންމެ ވައްތަރަކުން ކާޑު ބަސްތާއެއް ހަދިޔާކުރައްވައިފި އެވެ. މުސްތަފާ މިއަދު ވިދާޅުވީ އެ ދާއިރާގައި ހިމެނޭ ތިމަރަފުއްޓާއި ވޭމަންޑޫގެ ކޮންމެ ގެއަކަށް ހަކުރާއި ހަނޑޫ އަދި ފުށް ބަސްތާއެއް ހަދިޔާކުރީ ރޯދަ މަހު ރައްޔިތުންނަށް ކޮންމެވެސް އެހީތެރިކަމެއް ފޯރުކޮށްދިނުމުގެ ގޮތުން ކަމަށެވެ. މީގެ ކުރިން ފައިސާގެ ގޮތުން އެހީތެރިވެދިން ނަމަވެސް މިފަހަރު ކާޑު ފޮނުވީ ހުރިހާ ރައްޔިތުންނަށް ވެސް އެހީތެރިވެދޭން ކަމަށް އޭނާ ވިދާޅުވި އެވެ. "ގާތްގަނޑަކަށް ހާހެއްހާ ބަސްތާގެ ކާޑު ފޮނުވީ، އޭގެ އިތުރުން އަލަނާސި ވެސް ފޮނުވިން. ބޭނުމަކީ އަޅުގަނޑުގެ ފަރާތުން ކޮންމެވެސް އެހީތެރިކަމެއް ވެދިނުން،" މުސްތަފާ ވިދާޅުވި އެވެ. އޭނާ ވިދާޅުވި ގޮތުގައި ސިޔާސީ ގޮތުން ކޮންމެ ވާހަކައެއް ދެއްކެވި ނަމަވެސް ރަށްރަށުގައި ރައްޔިތުން ދިރިއުޅެމުން އަންނަނީ ވަރަށް ހާލުގަ އެވެ. މިދުވަސްވަރު މަސް ނުބާނާތީ ވެސް ރައްޔިތުންނަށް ދަތިތަކާ ކުރިމަތިލާން ޖެހޭނެ ކަމަށް އޭނާ ވިދާޅުވި އެވެ. މުސްތަފާ ވިދާޅުވި ގޮތުގައި ތ. އަތޮޅުގައި އަނެއް ދެ ދާއިރާ އަށް އެ ދެ ދާއިރާގެ މެމްބަރުން އެހީތެރިވެދެއްވައި އެހެން ދާއިރާތަކަށް ވެސް މެމްބަރުންގެ ކޮންމެވެސް އެހީތެރިކަމެއް ވެދެއްވުމަކީ އޭނާ އެދިވަޑައިގަންނަވާ ގޮތެވެ.