ދައުލަތަށް ދިގު މުއްދަތެއްގައި ހިދުމަތް ކުރައްވާފައިވާ ނިޝާން އިއްޒުއްދީނުގެ އިއްޒަތުގެ ވެރިޔާ އުމަރު ޒާހިރު، ފުވައްމުލައް ސިޓީގައި އަޅުއްވައި ދެއްވި މިސްކިތް ހުޅުވައިފިއެވެ.
ފުވައްމުލަކު ފުނާޑު އަވަށުގައި ކުރިން ހުރި މަސްޖިދުއް ސިއްދީގު ތަޅާލުމަށް ފަހު އެ ބިމުގައި އަދި ހަމަ އެ ނަމުގައި އުމަރު ޒާހިރު އަޅުއްވައިދެއްވި މިސްކިތް ހުޅުވާފައިވަނީ ބުދަ ދުވަހުގެ އަސްރު ނަމާދަށެވެ. 300 މީހުންގެ ޖާގައިގެ އެ މިސްކިތް ހުޅުއްވައި ދެއްވީ އުމަރު ޒާހިރާއި އެމަނިކުފާނުގެ ދައުވަތަށް އެ ރަސްމިއްޔާތަށް ވަޑައިގެންނެވި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.
މީގެ ދެ އަހަރު ކުރިން، ފުވައްމުލައް ސިޓީގެ މަސްޖިދުއް ސިއްދީގު ވަރަށް ބޮޑަށް ވީރާނާވެ ހަލާކުވާން ކައިރިވެފައި ހުރި ކަމަށް ބުނެ އެ މައްސަލަ އުމަރު ޒާހިރުގެ ސަމާލުކަމަށް މީހަކު ގެނެސްދިނުމުން، އެމަނިކުފާނު ވަނީ ފުވައްމުލަކުގައި މިސްކިތެއް އަޅުއްވައިދޭން ނިންމަވާފައެވެ.
މިސްކިތުގެ މަސައްކަތް އެއްކޮށް ނިންމާލީ މިސްކިތުގެ އަމަލީ މަސައްކަތް ފެށިތާ ގާތްގަނޑަކަށް ފަސް ވަރަކަށް ފަހުން ކަމަށް މައުލޫމާތުލިބެއެވެ.