ރާއްޖޭގައި ތިބި އިންޑިއާ ސިފައިންގެ އަދަދު 200 އަށް އަރާނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ގައުމީ ދުވަހުގެ މުނާސަބަތުގައި އުމަރު ފޮނުއްވި މެސެޖެއްގައި ވިދާޅުވީ މި ޒަމާނުގައި ދުނިޔޭގެ ބާރުތަކުން ގައުމުތައް އަޅުވެތި ކުރަނީ ހަނގުރާމަ ކުރާ އުސޫލުން ނޫން ކަމަށެވެ. މި ޒަމާނުގައި އަޅުވެތިކަމުގެ ދަށަށް ގެންދިއުމުގައި ތަފާތު އުކުޅުތައް ބޭނުން ކުރާ ކަމަށާއި އިންޑިއާ ސިފައިން ރާއްޖޭގައި ގާއިމްވެ ތިބުމަކީ މިނިވަންކަމަށް އޮތް ގޮންޖެހުމެއް ކަމަށެވެ.
އިންޑިއާގެ އަސްކަރިއްޔާގެ 200 ސިފައިން ރާއްޖޭގެ ތިން ސަރަހައްދެއްގައި ރުކުރުވާލާފައިވޭ، މިއީ ރާއްޖޭގެ މިނިވަން ކަމަށް އޮތް ވަރަށް ބޮޑު ގޮންޖެހުމެއް
- އުމަރު ނަސީރު
އިންޑިއާ ސިފައިން ރާއްޖޭގައި ތިބޭ ތިބުން ހުއްޓުމަކަށް ގެންނަންޖެހޭ ކަމަށްވެސް އުމަރު ވިދާޅުވި އެވެ.
އަސްކަރީ ތަމްރީނުތައް ހިންގުމާއި އެނޫންވެސް ބޭނުމުގައިކަމަށް ބުނެ އިންޑިއާގެ ގިނަ އަދަދެއްގެ ސިފައިން ރާއްޖޭގައި ތިބޭތީ ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ. އެގޮތުން ރާއްޖޭގައި ތިބި އިންޑިއާ ސިފައިންގެ އަދަދު ހާމަކުރަން އެދުމުން އެކަމާ ސަރުކާރުން ތަކުރާރުކޮށް ދެކޮޅު ހަދަމުން ދާ ދިޔުމާއިމެދު ގިނަ ބަޔަކު ދަނީ ސުވާލު އުފައްދަމުންނެވެ.
އެންމެ ފަހުން އިންފޮމޭޝަން ކޮމިޝަނަރު މެދުވެރިކޮށް އިންޑިއާ ސިފައިންގެ އަދަދު ހާމަކުރުމަށް ޑިފެންސް މިނިސްޓްރީގައި އެދުމުން ބުނީ އެމައުލޫމާތު އާންމުކޮށްފިނަމަ ރާއްޖެއާ އިންޑިއާއާއި ދެމެދު އޮތް ގުޅުމަށް ބުރޫ އަރައިފާނެ ކަމަށެވެ.
މިއަދު ރައީސް އިބްރާހިމް މުހައްމަދު ޞާލިހު ދެއްވި ހިތޯބުގައި ވެސް ވަނީ މިކަމަށް އަލިއަޅުއްވާ ލައްވަވައިފަ އެވެ. އެގޮތުން އެމަނިކުފާނު ވިދާޅުވި ގޮތުގައި ކޮންމެ ގައުމަކާއެކުވެސް ގުޅުން ބަދަހިކުރަނީ ރާއްޖޭގެ މިނިވަންކަމަށް ބުރޫ ނަރާނެހެންނެވެ.