އެކަށީގެންވާ ވިސްނުންތެރިކަމެއް ނެތި 2013 ވަނަ އަހަރުގެ ރިޔާސީ އިންތިހާބުގެ ވޯޓާއި މާދަމާ ބާއްވާ ޕީޕީއެމް ޕްރައިމަރީ ގައި ވޯޓު ދީފިނަމަ ކުރީގެ ރައިސް މުހައްމަދު ނަޝީދު މިގައުމުގެ ވެރިކަމަށް އައުމުގެ ފުރުސަތު އެބައޮތް ކަމަށް ޕީޕީއެމްގެ ޕްރައިމަރީގައި ވާދަކުރައްވާ ކުރިން އެޕާޓީގެ އިންތިގާލީ ނައިބު ރައީސްކަން ކުރެއްވި އުމަރު ނަސީރު ވިދާޅުވެއްޖެ އެވެ.
އުމަރު ޓީމުގެ ފަރާތުން އާޓިފިޝަލް ބީޗުގައި ރޭ ބޭއްވި ޖަލްސާގައި ވާހަކަދައްކަވަމުން އުމަރު ވިދާޅުވީ 2013 ވަނަ އަހަރު މިގައުމުގެ ވެރިކަމަށް ރައީސް ނަޝީދު ނާންނާނެ ހުރިހާ ކަމެއް ކުރަން ޖެހޭ ކަމަށާއި މިގައުމު އަދިވެސް ނަޝީދުގެ ކިބައިން މިނިވަން ނުވާ ކަމަށެވެ. އަދި އެމްޑީޕީ ހިސޯރުކޮށްގެން އުޅޭ ނަޝީދުގެ ފަރާތުން މިގައުމުގެ ދީނަށާއި ގައުމިއްޔަތަށް ވަރަށް ބޮޑަށް ނުރައްކާ އެބަހުރި ކަމަށް ވެސް އުމަރު ވިދާޅުވި އެވެ.
"މިގައުމު އަދިވެސް މިނިވަނެއް ނުވޭ މުހައްމަދު ނަޝީދުގެ ކިބަޔަކުންނެއް، އެކަން އަޅުގަނޑުމެންނަށް އެނގޭ މަގުތަކުން، އަޅުގަނޑުމެންނަށް އެނގޭ ހިނގާ މުޒާހަރާތަން، ރޯކުރާ އުޅަނދުތަކުން، ތަން ތަނަށްދޭ ހަމަލާތަކުން، މީހުންގެ ގަޔަށް ހަރާ ވަޅިތަކުން، ރޯކުރާ ސައިކަލުތަކުން އަޅުގަނޑުމެންނަށް އެނގޭ މުހައްމަދު ނަޝީދުގެ ނުރައްކަލުން މިގައުމު އަދި މިނިވަން ނުވާކަން." އުމަރު ވިދާޅުވި އެވެ.
ރައީސް ނަޝީދު މިގައުމުގެ ވެރިކަމަށް އަނބުރާ އައިސްފިނަމަ ރައީސް މައުމޫނާއި އޭނާ ވެސް ހައްޔަރުކޮށް ޖަލަށްލާނެ ކަމަށާއި މުޅި ގައުމު ސުންނާފަތި ކޮށް އެތަން މިތަން ވިއްކާނެ ކަމަށް ވެސް އުމަރު ވިދާޅުވި އެވެ. އަދި އެފަދަ ހާލަކަތަށް މިގައުމު ވެއްޓުނީމަ ދެން މިގައުމު ހިފައިގެން ތެދުވާނެ އެއްވެސް މީހަކު ނުހުންނާނެ ކަމަށް ވެސް އުމަރު ވިދާޅުވި އެވެ.
"އަޅުގަނޑަށް ހަމަ ޔަގީން ޓައި އެޅި ގްރޫޕް ގްރޫޕް ކޮންޑިޝަން ތެރެއަށް ވަދެ ފިލާނެކަން އަދިވެސް، އަދިވެސް މިގައުމު އައިސް ވެއްޓޭނީ ނިކަމެތިންގެ އުނގު މައްޗަށް، ނިކަމެތިންގެ ތެރެއިން ބަޔަކު ނިކުންނަން ޖެހޭނީ އަނެއްކާވެސް މިގައުމު ސަލާމަތްކުރަން." އޭނާ ވިދާޅުވި އެވެ.
އުމަރު ވިދާޅުވީ ރައީސް ނަޝީދުގެ ވެރިކަމުގައި ސުޕްރީމް ކޯޓުގައި ތަޅު އެޅުވި މައްސަލައިގައި އެމަނިކުފާނުގެ މައްޗަށް އިތުބާރު ނެތްކަމުގެ ވޯޓު ނެގުމަށްޓަކައި ރައްޔިތުންގެ މަޖިލީހަށް ވައްދަން މަސައްކަތްކުރެއްވި ކަމަށާއި ނަމަވެސް އެމައްސަލައިގައި ހިފަން ކެރުނު ލީޑަރެއް ނެތް ކަމަށެވެ.
އުމަރު ވިދާޅުވީ ނަޝީދު ވެރިކަމަށް އަޔަ ނުދިނުމަށްޓަކައި ޕީޕީއެމްގެ ރިޔާސީ ޓިކެޓު ދެއްވަން ވާނީ ނަޝީދު ދައްކާ ބަހުރަވައިން ވާހަކަދައްކާ ނަޝީދަށް ދޫނުކުރާ ވަރުގެ ލީޑަރެއް ކަމަށާއި ނަޝީދު އާދައިގެން ބަހުރުވަޔަކުން ބަލި ކުރެވޭނެ ނަމަ އޭނާ މިއަދު ޕޯޑިއަމްގައި ނުހުންނަވާނެ ކަމަށް ވެސް އުމަރު ރޭ ވިދާޅުވި އެވެ.
ރައީސް މައުމޫނު ތާއިދުކުރައްވަނީ ޔާމީނަށް ކަމަށް ޔާމީންގެ ކެމްޕެއިންގައި ހިމެނޭ ވަރަށް ގިނަ ބޭފުޅުން ތަކުރާރުކޮށް ވިދާޅުވަމުންގެންދަވާތީ އެކަމަށް ރައްދުދެއްވާ އުމަރު ވިދާޅުވީ އެއީ ރައީސް މައުމޫންގެ އިސްތަށިފުޅުގައި އަޅުވާ ވަރަށް ބޮޑު އިލްޒާމެއް ކަމަށާއި ރައީސް މައުމޫން ވަރަށް ގިނަ ފަހަރެއްގެ މަތިން އެއްވެސް ކެންޑިޑޭޓަކަށް ޕްރައިމަރީގައި ތާއީދުނުކުރައްވާނެކަން ވިދާޅުވެފައިވާ ކަމަށެވެ.
"އަޅުގަނޑު ދަންނަވާނީ އަޅުގަނޑުގެ އަނެއް ކޭމްޕަށް ރައީސް މައުމޫނަށް ކުޑާމީސް ވާކަހަލަ ވާހަކަ ނުދައްކަވާށޭ، ރައީސް މައުމޫން ވަނީ ސާފުކޮށް ވިދާޅުވެފައި ވަކި ބޭފުޅަކަށް ތާއީދުނުކުރައްވާނެ ކަމަށް، އޭގައި ވަރަށް ރީތި މިސާލެއް ރައީސް މައުމޫން ޑީއާރުޕީގައި ހުންނަވާފައި އެފަހަރު ތަބަކަށްލާފައި އެއްޗެއް ދެއްވަންވީމަ ދެއްވީކީ ކޮއްކޮއަކަށް ނޫން، ދެއްވީ ބޭބެއަކަށް ވެސް ނޫން، ދެއްވީ ދުރުހިލޭ މީހަކަށް އެފަހަރުވެސް." އުމަރު ވިދާޅުވި އެވެ.