ރައީސުލްޖުމްހޫރިއްޔާ މުހައްމަދު ނަޝީދު، ސްޓޭޓް މިނިސްޓަރު ކަމުގެ މަގާމަށް ދެ ބޭފުޅަކު މިއަދު އައްޔަން ކުރައްވައިފި އެވެ.
މިގޮތުން އައްޔަން ކުރެއްވި ދެ ބޭފުޅުންނަކީ، މިނިސްޓަރު އޮފް ސްޓޭޓް ފޯ ހެލްތް އެންޑް ފެމިލީ ކަމަށް ހެންވޭރު ނީލްވިލާ އަލްއުސްތާޛާ ލުބްނާ މުހައްމަދު ޒާހިރު ހުސައިނާއި މިނިސްޓަރު އޮފް ސްޓޭޓް، މެދު ދެކުނު ސަރަޙައްދުގެ ގައުމީ އިދާރާ ކަމަށް ހެންވޭރު ހިކިފިނިފެންމާގޭ އުމަރު އަބްދުއްރައްޒާގެވެ.
މިދެބޭފުޅުންނަށް މަގާމުގެ ފަތްކޮޅު ދެއްވުމުގެ ރަސްމިއްޔާތު އޮތީ، މިއަދު މެންދުރު ފަހު ރައީސުލްޖުމްހޫރިއްޔާގެ އޮފީހުގަ އެވެ.
މިރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ސަރުކާރުން ވެވަޑައިގެންފައިވާ ވައުދުތައް ފުއްދަވައިދެއްވުމުގެ މުހިންމު ކަމުގެ މައްޗަށް ބައްލަވާލައްވަމުން، ގާނޫނުތަކާއި ގަވާއިދުތަކާ އެއްގޮތްވާ ގޮތުގެ މަތިން، އެދެބޭފުޅުންވެސް ސަރުކާރަށް ހިދްމަތް ކޮށްދެއްވަމުން ގެންދަވާނެ ކަމުގައި ވިދާޅުވި އެވެ.
މިދެބޭފުޅުންގެ ތެރެއިން ލުބްނާ މުހައްމަދު ޒާހިރު ހުސައިން މިހާތަނަށް ހުންނެވީ، މިނިސްޓަރު ފޯ ހެލްތް އެންޑް ފެމިލީގެ ނައިބު ކަމުގެ މަގާމުގަ އެވެ.