ދެ ހަފުތާގެ މުއްދަތަށް ހަނގުރާމަ މެދުކަނޑާލުމަށް އީރާނާއެކު އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނުމާ ގުޅިގެން، ދުނިޔޭގެ ބާޒާރުގައި ސާފުނުކުރާ ތެލުގެ އަގު މިއަދު 100 ޑޮލަރަށްވުރެ ދަށަށް ވެއްޓިއްޖެއެވެ.
އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވި ގޮތުގައި، އީރާނަށް ދޭ ހަމަލާތައް ހުއްޓާލައިފިނަމަ އެ ގައުމުން ދޭ ހަމަލާތައްވެސް ހުއްޓާލާނެއެވެ. އަދި ކުރިއަށް އޮތް ދެ ހަފުތާގެ ތެރޭގައި އީރާނުގެ އަސްކަރިއްޔާއާ ގުޅިގެން ހޯރްމުޒް ކަނޑުއޮޅިން ރައްކާތެރިކަމާއެކު ދަތުރުކުރެވޭނެ ކަމަށް އޭނާ ބުންޏެވެ.