ދުނިޔޭގެ އިލެކްޓްރިކް ވެހިކަލް (އީވީ) އުފެއްދުމުގެ މާކެޓުގައި އެންމެ ނަގާކިޔާ އެމެރިކާގެ ޓެސްލާ ކުންފުނި ފަހަތަށް ޖައްސާލުމަށްފަހު، ދުނިޔޭގެ އެންމެ ގިނަ އިލެކްޓްރިކް ކާރު ވިއްކާ ކުންފުނީގެ މަގާމު ޗައިނާގެ ބީވައިޑީ އިން ހޯދައިފިއެވެ. މިއީ އޮޓޯމޯޓިވް ސިނާއަތަށް އައި ވަރަށް ބޮޑު ބަދަލެއް ކަމަށް ތަޖުރިބާކާރުން ދެކެއެވެ. ސީއެންބީސީން ރިޕޯޓުކޮށްފައިވާ ގޮތުގައި، 2025 ވަނަ އަހަރުގެ ވިޔަފާރީގެ ތަފާސްހިސާބުތައް ދައްކާގޮތުން، ބީވައިޑީން ވަނީ ޓެސްލާއަށްވުރެ ގިނަ އަދަދެއްގެ ބެޓެރި އިލެކްޓްރިކް ވެހިކަލް ވިއްކާފައެވެ. މިއީ ތާރީޚުގައި ވެސް މުޅި އަހަރެއްގެ މައްޗަށް ބަލާއިރު ޓެސްލާއަށްވުރެ ކުރި ހޯދައި، އެންމެ ގިނަ ކާރު ވިއްކި ކުންފުނީގެ މަގާމު ބީވައިޑީން ކަށަވަރުކުރި ފުރަތަމަ ފަހަރެވެ. ބީވައިޑީގެ މި ކާމިޔާބީގެ މައިގަނޑު ސިއްރަކީ، އެ ކުންފުނިން ބާޒާރަށް ނެރެފައިވާ ކާރުތަކުގެ އަގު ހެޔޮވުމާއި، އެކި ފަންތީގެ މީހުންނަށް ގަނެވޭނެ ތަފާތު މޮޑެލްތައް ލިބެން ހުރުމެވެ. https://sun.mv/201636 އަގުހެޔޮ ކުދި ކާރުން ފެށިގެން ލަގްޒަރީ ކާރުތައް ބީވައިޑީން އުފައްދަމުން އަންނައިރު، ޓެސްލާގެ ކާރުތަކަކީ ނިސްބަތުން އަގުބޮޑު، މަތީ ފަންތީގެ އުފެއްދުންތަކެއްގެ ގޮތުގައި ފާހަގަކުރެވެއެވެ. މިއީ ދުނިޔޭގެ އީވީ މާކެޓުގައި ޗައިނާގެ ކުންފުނިތަކުގެ ނުފޫޒު ގަދަވަމުން އަންނަކަމުގެ ވަރުގަދަ ހެއްކެކެވެ. ޓެސްލާގެ ވެރިޔާ އީލޮން މަސްކްގެ ކުންފުންޏަށް މިއީ ބޮޑު ގޮންޖެހުމެއް ނަމަވެސް، ޓެސްލާއިން އަދިވެސް ދަނީ އެމެރިކާ ފަދަ ބޮޑެތި މާކެޓުތަކުގައި ވަރުގަދަ ވިޔަފާރިއެއް ކުރަމުންނެވެ. އެހެންނަމަވެސް، ދުނިޔޭގެ އެންމެ ބޮޑު އީވީ އުފައްދާ ކުންފުނީގެ ލަޤަބު މިވަގުތު މިވަނީ ޗައިނާގެ ބީވައިޑީއަށް ލިބިފައެވެ. ބީވައިޑީއަކީ 1995 ވަނަ އަހަރު ބެޓެރި އުފައްދާ ކުންފުންޏެއްގެ ގޮތުގައި ވުޖޫދަށް އައި ކުންފުންޏެއް ނަމަވެސް، 2003 ވަނަ އަހަރު ކާރު އުފެއްދުމުގެ ސިނާއަތަށް ވަނުމަށްފަހު އެ ކުންފުނިން ވަނީ ހަލުވި ދުވެލީގައި ކުރިއެރުން ހޯދާފައެވެ. އެމެރިކާގެ މަޝްހޫރު އިންވެސްޓަރު ވޮރެން ބަފެޓްގެ ބާކްޝަޔާ ހެތަވޭ އިން ހިއްސާވާ މި ކުންފުންޏަކީ ކާރުގެ ބެޓެރިއާއި މައިކްރޯޗިޕް ފަދަ މުހިންމު ބައިތައް އަމިއްލައަށް އުފައްދާ ކުންފުންޏަކަށް ވުމީ، ވާދަވެރި އެހެން ކުންފުނިތަކާ އަޅާބަލާއިރު ކާރުގެ އަގު ދަށްކުރުމަށް އެ ކުންފުންޏަށް ލިބިފައިވާ އެންމެ ބޮޑު ބާރެވެ. ޗައިނާގެ މާކެޓުގައި ރަސްކަން ކުރުމަށްފަހު، ބީވައިޑީން މިހާރު އަމާޒު ހިފާފައިވަނީ ޔޫރަޕާއި ދެކުނު އިރުމަތީ އޭޝިޔާ އަދި ދެކުނު އެމެރިކާގެ މާކެޓުތަކަށް އެ ކުންފުނީގެ ވިޔަފާރި ފުޅާކުރުމަށެވެ.