އެއްދުވަހަކު އަހުރެންނާއި ބައްދަލުކުރި އަންހެނަކު ކިޔައިދިނީ ފިރިމީހާގެ ހިތަށް އަރާއިރަށް އޭނާގެ ގައިގައި ތަޅައި އަނިޔާކުރާ ވާހަކައެވެ. އަހުރެން ބުނީމެވެ. "ޖިސްމާނީ އަނިޔާކުރާނަމަ އަވަހަށް ވަރިވާށެވެ! އެކަމަކަށް އެއްވެސް ހުރަހެއް ނެތެވެ. ޖިސްމާނީ އަނިޔާކުރާ ފިރިއަކާއިއެކު ދިރިއުޅުމެއް ނެތެވެ. ތިއަ މަސައްލަ ކޮންމެ ދީނީ ޢިލްމުވެރިއަކަށް ހުށަހެޅިނަމަވެސް ވަޤުތުން ވަރިކޮށްދޭނެއެވެ."  
އޭނާދިން ޖަވާބު އެނގޭހެއްޔެވެ؟ "އެކަމަކުވެސް ފިރިމީހާ ދެކެ ވަރަށް ލޯބިވަމެވެ. ވަރިވާކަށް ނުވިސްނަމެވެ."  
ފިރިންނޭވެ! އަނބިމީހާ ތިބާދެކެ އެވަރަށް ލޯބިވާއިރު އޭނާގެ ގައިގައި ތަޅައި އަނިޔާކުރަން ހެޔޮވާނީ ކިހިނަކުންހެއްޔެވެ؟ އޭނާގެ ހިތުގައި ޖެހޭ ފަދަ ކަންކަން ކުރަން ހެޔޮވާނީވެސް ކިހިނަކުން ހެއްޔެވެ؟ އެގޮތަށް އެކަން ނުކުރާށެވެ! ދުލާއި އަތާއި ފައި އަމިއްލައަށް ކޮންޓްރޯލްކުރާށެވެ! ތިބާ އެކަން ނުކުރާނަމަ ﷲ ތަޢާލާ އެކަންކުރައްވަވައިފާނެތެވެ. މާނައަކީ ތިބާއަށް އަނބިމީހާއަށް އަނިޔާވެރި ނުވެވޭނެގޮތް، އަނިޔާ ނުކުރެވޭނެ ގޮތް ހައްދަވައިފާނެތެވެ. އެއިރުން ތިބާ ކުރަންޖެހޭ ހިތާމަ މާބޮޑުވާނެއެވެ.  
ހަމައެގޮތަށް އަނބިންނަށްވެސް ބުނެލަން އޮތީ ފިރިމީހާ ދެރަކޮށް ހިތުގައި ޖެހޭނެ ގޮތަށް ކަންކަން ނުކުރާށެވެ! އަނިޔާކުރުމަކީ ތަޅައި ޖިސްމާނީ އަނިޔާކުރުމެއް ނޫނެވެ. އަނެކާގެ ހިތުގައި ޖެހޭނެ ގޮތަށް ކުރާ ކޮންމެ ކަމަކީވެސް އަނިޔާއެވެ. އެކަން ﷲ ތަޢާލާގެ ޙަޟްރަތުގައި ވާނީ އަނިޔާއަކަށެވެ.  
އަބަދުވެސް ހަނދާންކޮށްދެވޭ އެއްކަމަކީ އަނިޔާ ލިބިގެންވާ މީހާގެ ދުޢާ އާއި ﷲ ތަޢާލާ އާއި ދެމެދަށް އެއްވެސް ހުރަހެއް ނެތްކަމެވެ. އޭނާގެ ދުޢާޢިޖާބަކުރައްވަވާނީ ކޮންވަޤުތަކު ކަމެއް ނުއެނގޭނެކަމެވެ. ސަލާމަތްވެގެން ދިރިއުޅުމަކީ އެމީހެއްގެ ކަމެކެވެ.
 
- މަޢުލޫމާތު: މުފްތީ މެންކުގެ ދަރުސަކުން