ފުރަތަމަ ބަލައިލަންވީ ދަތިޙާލުގައި އުޅެން މީސްތަކުންނަށް ޖެހޭ ސަބަބާއިމެދުގައެވެ. އަހުރެންގެ ވިސްނުމުން އެއީ ހަމައެކަނި އެމީހުން އިމްތިޙާން ކުރެއްވެވުމަކަށް ނޫނެވެ. ތަނަވަސްކަން ދެއްވެވުމުން ތަނަވަސްކަމުގައ ތިބި މީހުންވެސް އިމްތިޙާނުކުރެއްވެވުމަށެވެ.  
ހަމަޤައިމުވެސް އެންމެންނަކީ އެހެން މީހެއްގެ އެހީތެރިކަމަށް ބޭނުން ނުވެ ދުނިޔޭގައި އުޅެވޭނެ ބައަކުނަމަ ދަތިޙާލުގައި އުޅެންޖެހިފައިވާ މީހުންނަށް އެހީތެރިކަން ފޯރުކޮށްދިނުމުން ދެއްވަވާ ޘަވާބު ލިބޭނެ ހަމައެކަކުވެސް ނުހުންނާނެއެވެ.  
ﷲ ތަޢާލާ އަހަރެމެންނަށް އަމުރުފުޅު ކުރައްވަވާފައިވަނީ އަހަރެމެން ނަރަކައިން ސަލާމަތްވުމަށް މަސައްކަތްކުރުމާއިއެކު އެމީހެއްގެ އަހުލުވެރިންނާއި އެންމެހައި މީސްތަކުން ނަރަކައިން ސަލާމަތްކުރަން މަސައްކަތް ކުރުމަށެވެ. ޚާއްޞަކޮށް އެމީހެއްގެ އަހުލުވެރިން ނަރަކައިން ސަލާމަތްކުރަން މަސައްކަތްކުރުމަކީ ކޮންމެހެން ކުރަންޖެހޭނެ ކަމެކެވެ.  
އެއިގެ އިތުރުން އެހެން މީހުންނަށް އުފުލަންޖެހޭ ތަކްލީފްތައް ލުއިކޮށްދީ އެހީތެރިވުމަށެވެ. އެކަމަށް ދެއްވަވާ މަތިވެރި ޖަޒާނިކަން ދެކިބަލާށެވެ! މީހަކު އެހެން މީހުންނަށް އެހީތެރިވެދިނުންމަތީގައި ހުރިނަމަ އެމީހަކަށް އެހީތެރިވެވޮޑިގަތުންމަތީގައި ﷲ ތަޢާލާ ވޮޑިގެންވެއެވެ. ކިތަންމެ ކުޑަމިންވަރަކުން ނަމަވެސް އެންމެ މީހަކަށްނަމަވެސް ކުރިމަތިވާ ދަތިތަކުން ސަލާމަތްވާން އެހީތެރިވުމަކީ މީހަކަށް ކުރެވޭނެ އެންމެ ފައިދާހުރި ޢަމަލު ކަމަށްބުނީ މިސަބަބަށްޓަކައެވެ. 
ނަމަވެސް ގިނަ ބައަކު މިއަދު ވަނީ އެކަންކަމުގައި ވަރަށް ބޮޑަށް އިހްމާލްވެފައެވެ. މަދު މީހަކު  ނޫނީ ﷲ ތަޢަލާގެ އަމުރުފުޅުތަކުގެމަތިން ހަނދާންވާހެނެއްވެސް ހިއެއް ނުވެއެވެ. ނަތީޖާއެއްގެ ގޮތުން މީސްތަކުންނަށް އެހީތެރިވުމާއި ސަލާމަތާއި ރައްކައުތެރިކަން ފޯރުކޮށްދިނުމުގައި ގިނަ ބއަކު ދަނީ ވަރަށް ބޮޑަށް އިހްމާލްވަމުންނެވެ. 
ހައިހޫނުކަމުގައި ދަތިޙާލުގައި ތިބި މީހުންނަށް އެހީތެރިވަނީ މަދުމީހެކެވެ. ތަނަވަސްކަން ލިބިގެންތިބި އެންމެން ނިކަމެތިންނަށް އެހީތެރިވާނަމަ ދަތިޙާލުގައި އުޅެންޖެހޭނެ މީހަކު ދުނިޔެއަކު ނުހުންނާނެއެވެ. އިން ޝާ ﷲ  
އަހަރެމެންގެ އަހުލުވެރިންނާއި އެކުވެރިންނާއި އެންމެހައި މީސްތަކުން ނަރަކައިން ސަލާމްތަކުރަން އަހަރެމެންނަށް ކުރެވެނީ ކޮން މަސައްކަތެއް ކަމާއިމެދު ވިސްނައިލަމާތޯއެވެ! ހަމަ އެއާއިއެކު އަހަރެމެންގެ އެކުވެރިންނާއި އެންމެހައި މީސްތަކުންނަށް މިދުނިޔޭގައި އުފުލަން ޖެހޭ ތަކްލީފްތަކުން ސަލާމަތްވުމަށް އަހަރެމެންނަށް ފޯރުކޮށްދެވެނީ ކޮން އެހީތެރިކަމެއް ހެއްޔެވެ؟ މި ސުވާލުތައް ކޮންމެ މީހަކުވެސް އަމިއްލަ ނަފްސާއި ކޮށްލުން ކީއްހެއްޔެވެ؟ 
 
- އިސްލާމީ ތިލަފަތުގެ ދަރުސަކުން