އިއްޔެ ހިޔާ ޓަވަރު ފަހެއްގައި ހިނގި އަލިފާނުގެ ހާދިސާގައި 38 އެޕާޓުމަންޓުގެ ނަރުދަމާއާއި ފެން ހޮޅިއާއި އޭސީ އައުޓްޑޯ ޔުނިޓަށްވި ގެއްލުންތައް މަރާމާތު ކުރުމަށް ހަފުތާއެއް ވާނެ ކަމަށް ބެލެވޭ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން މިއަދު ބުނެފިއެވެ. އެ ހާދިސާ އެމްއެންޑީއެފަށް ރިޕޯޓުކުރީ، އިއްޔެ 18:33 ހާއިރެވެ. އެ ހާދިސާ ހިނގީ، އެ ޓަވަރުގެ ނުވަ ވަނަ ފަންގިފިލާއާއި 14 ވަނަ ފަންގިފިލައާ ދެމެދުގެ ވައިގޮޅީގައި ހުރި އޭސީ އައުޓްޑޯއެއްގައި ކަމަށް އެމްއެންޑީއެފުން ބުންޏެވެ. އެހެންވެ، އެ ޓަވަރުގައި ހުންނަ ވައި ގޮޅީގައި ހުރި ފެން ހޮޅިތަކަށް ބޮޑެތި ގެއްލުންތަކެއް ލިބިފައިވާ ކަމަށް އެމްއެންޑީއެފުން ވަނީ ބުނެފައެވެ. ހިޔާ ޓަވަރު ފަހެއްގައި އަލިފާނުގެ ހާދިސާ ހިނގި ސަރަހައްދުގައި ފުލުހުން ހަރަކާތްތެރިވަނީ --- ސަން ފޮޓޯ/ މުހައްމަދު ރިޔާޒް 'ސަން'އިން ސުވާލުކުރުމުން މެސެޖުން ދިން ޖަވާބުގައި އެޗްޑީސީގެ އޮފިޝަލަކު ވިދާޅުވީ، 38 އެޕާޓުމަންޓުގެ ފެނާއި ނަރުދަމާ ހޮޅިއާއި އޭސީ އައުޓްޑޯ ޔުނިޓުތަކަށް ގެއްލުންވެފައިވާ ކަމަށެވެ. މި ވަގުތު ކުރިއަށް ދަނީ، އެ ހާދިސާ ހިނގި ސަރަހައްދު ސާފު ކުރުމުގެ މަސައްކަތް ކަމަށާއި ގެއްލުންތައް މާރާމާތު ކުރުމަށް ހަފުތާއެއް ވަރު ވާނެ ކަމަށް އޮފިޝަލް ވިދާޅުވިއެވެ. ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ)އިން މިއަދު ބުނި ގޮތުގައި، މިހާތަނަށް 18 އެޕާޓުމަންޓުގައި ދިރިއުޅޭ 85 މީހުންނަށް ވަގުތީ ބޯހިޔާވަހިކަމާއި ކެއުމާއި ބުއިމަށް އެހީތެރިކަން ވަނީ ފޯރުކޮށްދީފައެވެ. https://sun.mv/217376 އޭގެއިތުރަށް، އެހީތެރިކަމެއް ބޭނުންވާނަމަ، އެންޑީއެމްއޭގެ އިމަޖެންސީ ނަމްބަރު 115އަށް ގުޅުމަށް އެ އޮތޯރިޓީން ވަނީ އެދިފައެވެ. ބޮޑު އާބާދީއެއް އޮންނަ ހިޔާ ޓަވަރުތަކުގައި މީގެ ކުރިން ވެސް އަލިފާނުގެ ހާދިސާތައް ހިނގައި، ގެއްލުންތައް ވެފައި އެބަހުއްޓެވެ.