މިވީ މަހެއްހާ ދުވަހުގެ ތެރޭގައި އެންމެ ގިނައިން ސާވިސް ޗާޖު ދިން ރިސޯޓަކަށް، ސާވިސް ޗާޖުގެ ގޮތުގައި 4،300އަށް ވުރެ ގިނަ ޑޮލަރާ އެކު ވެލާ ޕްރައިވެޓް އައިލެންޑް ވެއްޖެ އެވެ.
ވީ ކިހިނެއް؟ - ހައި ސީޒަންގެ 20 ޑިސެމްބަރުން 20 ޖެނުއަރީއާ ހަމައަށް ސާވިސް ޗާޖުގެ ގޮތުގައި ވެލާއިން ވަނީ 4،317 ޑޮލަރު މުވައްޒަފުންނަށް ދީފަ އެވެ. އެއީ ދިވެހި ރުފިޔާއިން ބަލާއިރު 66،740ރ. އެވެ.
ނ. އަތޮޅުގައި ހިންގާ ވެލާ ޕްރައިވެޓް އައިލެންޑަކީ ރާއްޖޭގެ އެންމެ އަގުބޮޑު އެއް ރިސޯޓެވެ.
ތަފްސީލު - 'ދައުރު'އަށް ލިބިފައިވާ ހިސާބުތަކަށް ބަލާއިރު، ވެލާއަށް ފަހު އެ މުއްދަތުގައި އެންމެ ގިނައިން ސާވިސް ޗާޖު ދިނީ ކ. ވޮލްޑޯފް އެސްޓޯރިއާއިންނެވެ. އެއީ 4،117 ޑޮލަރެވެ.
'ރިސޯޓް ވޯކާސް މޯލްޑިވްސް'ގެ ފޭސްބުކް ޕޭޖުން ވެސް ބައެއް ރިސޯޓުތަކުގެ ސާވިސް ޗާޖު މައުލޫމާތު އާންމުކޮށްފައިވާއިރު، މިހާތަނަށް ހުރި ހިސާބުތަކުން 4،000 ޑޮލަރަށް ވުރެ ގިނައިން ސާވިސް ޗާޖު ދިނީ ހަމައެކަނި ވެލާ އާއި ވޮލްޑޯފް އެސްޓޯރިއާއިންނެވެ.
އެންމެ މަތިން ސާވިސް ޗާޖު ދިން 10 ރިސޯޓު:
ވެލާ - 4317 ޑޮލަރު
ވޮލްޑޯފް އެސްޓޯރިއާ - 4117 ޑޮލަރު
ރިޓްޒް ކާލްޓަން ފަރި އައިލެންޑް - 3988 ޑޮލަރު
ޝެވަލް ބްލޯންކް ރަންދެލި - 3655 ޑޮލަރު
4 ސީޒަންސް - 3037 ޑޮލަރު
ޖޯލި މޯލްޑިވްސް - 2650 ޑޮލަރު
ވަންއެންޑްއޮންލީ ރީތި ރަށް - 2400 ޑޮލަރު
ޖޯލި ބީން - 2252 ޑޮލަރު
ސޮނޭވާ ފުށި - 2199 ޑޮލަރު
ޕާކް ހަޔަޓް - 2026 ޑޮލަރު
އެނގުން މުހިންމު - މިދިޔަ އަހަރުގެ ޖެނުއަރީގައި އެންމެ ގިނައިން ސާވިސް ޗާޖު ދިނީ ރިޓްޒް ކާލްޓަންއިންނެވެ. އެއީ 4،409 ޑޮލަރެވެ.
އޭގެ ކުރިން، 2024 އާއި 2023 ވަނަ އަހަރު އެ ލިސްޓުގައި އެންމެ ކުރީގައި އޮތީ ވޮލްޑޯފް އެސްޓޯރިއާ އެވެ.
ފާހަގަކޮށްލެވޭ ކަމެއް - މިދިޔަ އަހަރުގެ ޖެނުއަރީއާ އަޅާބަލާއިރު މިއަހަރު ރިސޯޓުތަކުން ސާވިސް ޗާޖު ދިން މިންވަރު ޖުމްލަކޮށް ބަލާއިރު ގިނަ އެވެ.
އެގޮތުން، މިދިޔަ އަހަރުގެ 30 ޖެނުއަރީގެ ނިޔަލަށް އޭރު ލިބުނު މައުލޫމާތުގެ އަލީގައި އެކުލަވައިލި ލިސްޓުގައި 4،000 ޑޮލަރަށް ވުރެ ގިނައިން ސާވިސް ޗާޖު ދިނީ އެންމެ ރިސޯޓަކުންނެވެ. އަދި ދެ ވަނައިގައި އޮތް ރިސޯޓުން 2،300 ވަރަކަށް ޑޮލަރު ދިންއިރު، 10 ވަނައިގައި އޮތީ 1،484 ޑޮލަރެވެ.
ނަމަވެސް މިއަހަރުގެ ލިސްޓުގެ 10 ވަނައިގައި ވެސް 2،000 ޑޮލަރަށް ވުރެ މަތިން ދިން ރިސޯޓެއް ހިމެނޭއިރު، 3،000 ޑޮލަރަށް ވުރެ ގިނައިން ދިން ފަސް ރިސޯޓެއް ހިމެނެ އެވެ.