އަދުލު އިންސާފު ގާއިމުކުރުމުގައި އެންމެ މަތީ ފެންވަރު ހާސިލް ކުރުމުގެ އަމާޒު އެބައޮތް ކަމަށް އުއްތަމަ ފަނޑިޔާރު އަބްދުލްޣަނީ މުހައްމަދު މިއަދު ވިދާޅުވެއްޖެއެވެ. އުއްތަމަ ފަނޑިޔާރު އެފަދައިން ވިދާޅުވީ، މިއަދު ފެށުނު ފަނޑިޔާރުންގެ މަހާސިންތާ 2026 ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އުއްތަމަ ފަނޑިޔާރުގެ ވާހަކަފުޅުގައި ވިދާޅުވީ، ގާނޫނުގެ ބާރުވެރިކަން ނެގެހެއްޓުމުގެ އަމާޒު ޖުޑީޝަރީގައި އެބައޮތް ކަމަށެވެ. "މުއައްސަސާއެއްގެ ގޮތުގައި ތަނެއް ކުރިއަރައިދިއުމަށް ބޭނުންވާ އެންމެ މުހިއްމު އެއް ކަމަކީ، އަމާޒެއް އޮތުން، މިސްރާބެއް އޮތުން، ވިޝަންއެއް އޮތުން. އެ ވިޝަން، އެ މިސްރާބު އެ އަމާޒު ދިވެހި ފަނޑިޔާރުގޭގައި އެބައޮތް. އެއީ، ޤާނޫނުގެ ބާރުވެރިކަން ނުވަތަ ގާނޫނުގެ ހުކުމް ނެގެހެއްޓުމާއެކު އަދުލު އިންސާފު ގާއިމުކުރުމުގައި އެންމެ މަތީ ފެންވަރު ހާސިލް ކުރުން،" އުއްމަތަ ފަނޑިޔާރު ވިދާޅުވިއެވެ. މީގެ އިތުރުން އުއްތަމަ ފަނޑިޔާރުގެ ވާހަކަފުޅުގައި، ޝަރުޢީ ދާއިރާގައި ޓެކްނޮލޮޖީ ބޭނުން ކުރުމުގެ މައްޗަށް އަލިއަޅުވާލައްވައި އެމަނިކުފާނު ވިދާޅުވީ، މި ޒަމާނުގައި ފަންނިޔާތުގެ ހުނަރަކީ ކޮންމެ މީހެއްގެ ގައިގައި ހުރުން މުހިންމު ހުނަރެއް ކަމަށެވެ. "އޭއައި ބޭނުންކުރުމުގައި އަޅުގަނޑުމެން ސަމާލުކަން ދޭންޖެހޭ ކަންތައްތަކެއްވެސް އެބަހުރޭ. ޓެކްނޮލޮޖީގެ ވަސީލަތްތަކުން މަސައްކަތްތަކުގައި ފަސޭހަކޮށްދިނަސް ބައިއެސްވުމުގެ ސިފަޔަކުން ސަލާމަތް ނުވޭ. އެހެންކަމުން އިންސާފު ޤާއިމްކުރުމުގައި އިންސާނީ ވިސްނުމާއި، އިހުސާސް އަބަދުވެސް ޓެކްނޮލޮޖީގެ މައްޗަށް މުހިންމު ދައުރެއް އަދާކުރާނެ،" ފަނޑިޔާރުންގެ މަހާސިންތާގެ މި އަހަރުގެ މައިގަނޑު މައުޟޫއަކީ، ޝަރުޢީ ދާއިރާގައި ޓެކްނޮލޮޖީއާއި އޭއައި ބޭނުންކުރުމެވެ. މި އަހަރުގެ މަހާސިންތާގެ ކީ ނޯޓް ސްޕީކަރަކީ ޕްރޮފެސަރު ޑރ. ޙަސަން އުގެއިލެވެ. މީގެ އިތުރުން އިންޑިއާގެ ޖުޑީޝަލް އެކަޑަމީގެ ފެސިލިޓޭޓަރުން ވެސް މި މަހާސިންތާގައި ބައިވެރިވެއެވެ.