އަންނަ އެޕްރީލް 4، ގައި ބާއްވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އިންތިހާބުގައި ވާދަކުރުމުގެ މުއްދަތު މާދަމާ ހަމަވާއިރު، އިންތިހާބުގައި ވާދަކުރުމަށް މިހާތަނަށް ހުށަހެޅި 2،888 ކެންޑިޑަންސީ ގަބޫލުކޮށްފި އެވެ.
އިލެކްޝަންސް ކޮމިޝަން އިން ބުނީ ރޭ 23:00 ޖެހުމާ ހަމައަށް ކެންޑިޑަންސީ ގަބޫލުކުރި 2،888 ކެންޑިޑޭޓުންގެ ތެރެއިން 1،556 ކެންޑިޑޭޓުންނަކީ ލޯކަލް ކައުންސިލް އިންތިހާބުގައި ވާދަކުރާ ކެންޑިޑޭޓުން ކަމަށެވެ. ބާކީ 1،332 ކެންޑިޑޭޓުުންނަކީ ޑަބްލިއުޑީސީގައި ވާދަކުރާ ކެންޑިޑޭޓުން ކަމަށް އެ ކޮމިޝަނުން ބުންޏެވެ.
ލޯކަލް ކައުންސިލް އިންތިހާބުގައި ވާދަކުރާ ކެންޑިޑޭޓުންގެ ތެރެއިން ކެންޑިޑަންސީ ގަބޫލުކުރި 1،556 ކެންޑިޑޭޓުންގެ ތެރެއިން 1،197 ކެންޑިޑޭޓުންނަކީ ސިޔާސީ ޕާޓީތަކުގެ ކެންޑިޑޭޓުން ކަމަށްވާއިރު، ބާކީ 359 ކެންޑިޑޭޓުންނަކީ އަމިއްލަގޮތުން ވާދަކުރާ ކެންޑިޑޭޓުންނެވެ.
ޑަބްލިއުޑީސީގައި ވާދަކުރާ ކެންޑިޑޭޓުންގެ ތެރެއިން ކެންޑިޑަންސީ ގަބޫލުކުރި 1،332 ކެންޑިޑޭޓުންގެ ތެރެއިން 1،091 ކެންޑިޑޭޓުންނަކީ ސިޔާސީ ޕާޓީތަކުގެ ކެންޑިޑޭޓުން ކަމަށްވާއިރު، ބާކީ 241 ކެންޑިޑޭޓުންނަކީ އަމިއްލަގޮތުން ވާދަކުރާ ކެންޑިޑޭޓުންނެވެ.
މީގެއިތުރުން ލޯކަލް ކައުންސިލާއި ޑަބްލިއުޑީސީގައި ވާދަކުރުމަށް ސިޔާސީ ޕާޓީތަކުންނާއި އަމިއްލަގޮތުން ފޯމު ހުށަހަޅައިގެން ޖުމްލަ 525 ކެންޑިޑަންސީ ގަބޫލުނުކުރެ އެވެ. ނަމަވެސް އޭގެ ތެރެއިން 478 ކެންޑިޑޭޓުން ވަނީ އަނބުރާ ފޯމު ހުށަހަޅާފަ އެވެ.
އިލެކްޝަނުން ބުނީ އާންމުކޮށް ކެންޑިޑަންސީ ގަބޫލުނުކުރާ ސަބަބުތަކުގެ ތެރޭގައި ހިމެނެނީ ކުށާއި ދަރަނީގެ ރެކޯޑު ފުރިހަމައަށް ހުށަހަޅާފައި ނުވުމާއި، ކުށެއް ނުވަތަ ދަރަންޏެއް އޮތް ނަމަ އެކަމުގެ ތަފްސީލު ހުށަހަޅާފައި ނުވުމުގެ އިތުރުން ކަރެކްޝަނަލް ސާވިސް އިން ފުރިހަމަކޮށް ހުށަހަޅަންޖެހޭ ކުށުގެ ރެކޯޑު ހުށަނާޅާތީ އެވެ.
ކައުންސިލް އިންތިހާބަށް ކުރިމަތިލުމުގެ މުއްދަތު ހަމަވާނީ މާދަމާ 15:00 ޖަހާއިރެވެ.
އިންތިހާބަށް ކުރިމަތިލުމުގައި ދަތިތަކެއް ދިމާވާތީ، ކުރިމަތިލުމުގެ މުއްދަތު 10 ދުވަހަށް އިތުރުކޮށްދޭން އިދިކޮޅު އެމްޑީޕީން އެދުނެވެ. ނަމަވެސް ކުރިމަތިލުމުގެ މުއްދަތު މިހާތަނަށް ވެސް އެ ކޮމިޝަނުން އިތުރުކޮށްދީފައެއް ނުވެ އެވެ.
މި އަހަރު އިންތިހާބަށް ކުރިމަތިލާ މީހުން ހުރިހާ ލިޔެކިޔުންތަކާއި، އިދާރީ ފީ ދައްކަން މިފަހަރު ޖެހެނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ. ހުށަހެޅުންތަކާމެދު ނިންމި ގޮތާއި ކެންޑިޑޭޓުންނަށް އަންގަންޖެހޭ އެންގުންތައް އިލެކްޝަނުން އަންގާނީ ވެސް ޕޯޓަލް މެދުވެރިކޮށެވެ.
އެޕްރީލް 4، ގައި ބާއްވާ އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރާނެ އެވެ. އިންތިހާބުގައި ވޯޓުލުމަށް ޖުމްލަ 621 ވޯޓު ފޮށި ބެހެއްޓުމަށް ވަނީ ނިންމާފަ އެވެ.